Read Banggai LUKAS 23 Bible Online

LUKAS 23 - Banggai bible

LUKAS 23

¹Sasaibino do mianoo kokondong, maka babayo Yesus doi Pilatus salaano.

²Idoo yanila tambuuno motuduwo Yesus. Yanila bantile, “Kami laatemo namian nia, atapayo ko rayat. Yana bontiikene komian sulano inai nababeal lulu doi Tomundo, sabab konabantilano Yana daano Kristus meeng kotomundo.”

³Maka Pilatus mansadai doi Yesus, “Kai tutuu Ikoo Yahudi miano natomundo?” Yesus timbiliyo, “Bunomo komubantilano.”

⁴Maka Pilatus bantile doi imam-imam kapalano tukon do mianoo mobadaang, “Yaku aki kumalaat mau nabaino meeng kona kasalaan doi mian nia sulano nainukum Yana.”

⁵Bai yanila pololokon desaake koidan, “Tukon kona otunggul, yana pangaruiyomo ko Yudea miano sasaibino; tumbe-tumbe doi Galilea, tukon diabudodoo polongo koidan dimbaa.”

⁶Salataa Pilatus lengele doiya, yana mansadai, “Oilakai namian nia Galilea miano?”

⁷Salataa lapa binontiikon baikon Yesus kona lenggetan doi lipu mo daano Herodes mokuasaiyo, Pilatus kapatuwo Yesus doi Herodes, doiya kosinggatoo daano koidan doi Yerusalem.

⁸Herodes sanaang tuuno salataa kitayo Yesus, sabab malumbito yana namolongolan tentang Yesus tukon yase namokita. Yana moinikene namoola sakisiiyo Yesus mokubaiyo komo minasaindinggon.

⁹Tobikon doiya Herodes pelenggene kona pasadai mobadaang doi Yana, bai Yesus aki namotimbili.

¹⁰Imam-imam kapalano tukon guru-guru agama mangadap koidan idoo tukon tuduwe Yesus tuuno.

¹¹Herodes tukon naanggota suludadu maenggene tukon totulaiyo Yesus, maka pekeikene Yana kopakean kobasaran, doibundu kinapatu koidan doi Pilatus.

¹²Doi oloyonodoo koidan Herodes tukon Pilatus, doi loolukonoo pomusu, bai posobato koidan.

¹³Pilatus pototongikene koimam-imam kapalano, katua-katua, tukon rayat,

¹⁴maka bantile doi yanila, “Komuyu babayo Namian nia doi yaku tukon bantile baikon Yana atapayo komian. Diabudodoo doi salaamuyu yaku lapamo palesayo Yana, bai yaku aki kumalaat meeng kona kulokisan doi komuyu mo tuduwe Yana.

¹⁵Buno lakon Herodes napandapat, sabab yanadoo lapamo kapatuwo Yesusoo koidan doi kami. Namian nia aki nakubaiyo kooioila mo moola inukum tukon ukuman mate.

¹⁶Tobikon doiya yaku naikon bobokiiyo Yana tukon doibundu Yana sinodii.” [

¹⁷Doi samba kolamekanano ko Paskah, Pilatus sio namosodii meeng komian motinalunggu tuuk doi narayat.]

¹⁸Sasaibino komian mo pototongi idoo nggeleamon, “Akateyo Yana! Sodiiyo Barabas tuuk doi kami!” (

¹⁹Barabas tinalunggu sabab nggimalan mo teali doi kota tukon sabab namangakatean.)

²⁰Pilatus yase osodiiyo Yesus, tobikon doiya yana basilingan idan koidan doi mian badaangoo.

²¹Bai yanila nggeleamon, “Posempangemo Yana! Posempangemo Yana!”

²²Maka doi kotoluno luunggon Pilatus nggeleamon doi yanila, “Bai oila kona sala? Yaku aki kulaate meeng kona kasalaan mo moola inukum tukon ukuman mate! Yaku naikon umbase Yana, maka nasinodii Yana.”

²³Bai yanila banggadudul nggeleamon kokobukuan baikon Yesus sio nasinempanggon. Tukon doibundu yanila nanggeleamonan daano kohasilo.

²⁴Maka Pilatus otuwongikene doi Yesus koukuman mate buno do mianoo namongiasan,

²⁵tukon sodiiyo domianoo yanila mo kabiyo, doiyamo mian mo tinalunggu sabab nanggimalan tukon namangakatean. Doibundu Yesus sinalakanggono doi yanila sulano napo kubaiyo baino bulaamo yanila nayasano.

²⁶Maka do yaniladoo babayomo Yesus. Doi loloon tangano, yanila pososuung tukon meeng komian kosambuno Simon, kona luwean doi Kirene, mo sodo usok doi kota. Yanila lakoyo yana, maka pinakisaa yana motanggunge Yesus nakayung sempang doi Yesus tonggulungo.

²⁷Badaang komian moampakon tunduwo doi Yesus tonggulungo — doi yaniladoo daano kobubula koboine. Do boi-boinedoo kokiiliyo tukon mandaunggene Yesus.

²⁸Bai Yesus mbalenge doi yanila maka bantile, “Boi-boine Yerusalem! Inai pokokiiliyo Yaku! Pokokiiliyo kobutomu susuumu tukon mulabuk-labuk.

²⁹Sabab naikon lubat kotempono komian naikon bantile, ‘Bukan maen kona monondokan koboiboine mo aki nabiasa tianan, mo akiyoon nadaano kona pau tukon akiyoon nabiasa mosusu pau!’

³⁰ Doiyamo kosinggatoo komian naikon bantile doi bunggul-bunggul, ‘Pisaiyomo kami!’ Tukon doi bunggul-bunggul bungkukono, ‘Tonoiyomo kami!’

³¹Sabab kalu buno kayung mo daano motubo komian lapamo kubaiyo buno naiya, oila koidan naikon yanila mo kubaiyo tuuk doi kayung mo lapamo motuul!”

³²Daano koidan kolua komian bailon — domo luailadoo mian lokis — yanila mo babayo sulano nainukum mate polaing-laing tukon Yesus.

³³Salataa polong doi lipu mo sinombuikon “Oluno tobongo”, yanila sempangemo Yesus tukon do mianoo molua molokis — komeeng doi bakalingano taikon tukon komeeng koidan doi Yesus bobono.

³⁴ Maka Yesus sambeang, “Tama, ompuniyo yanila! Yanila aki napo toiyo oila yanila nakinubai.” Yesus napakean inobos-obos idoo doi antara yanila tukon undian.

³⁵ Komian kokondong idoo tukon mapatookon, modaano kokatua-katua Yahudi mototulaiyo Yesus tukon bantile, “Yana lapamo salamatene komian bailon; soba kai diabudodoo Yana nasalamatene kobutongo susuungo, kalu Yana bisa-bisa Tomundo Pasalamat Mian Bisa mo piliyo!”

³⁶ Kosuludadu-suludadu totulaiyo Yana. Yanila lubat tukon beena anggur momeele doi Yana,

³⁷tukon bantile, “Kalu Ikoo tomundo Yahudi miano, salamatene kobuto-Mu!”

³⁸Doi babo taikon do kayungo sempangngano Yesus, totulis nabantilan-bantilan nia: “Naiyamo ko Tomundo Yahudi Miano.”

³⁹Daano komeeng domianoo molokis mo sinempang idoo totulaiyo Yesus. Yana bantile, “Ikoo Tomundo Pasalamat, bolikon? Nah, salamatene kobutomu tukon kami!”

⁴⁰Bai domianoo molokis meeng koidan anuukene do tulanodoo, bantile, “Oilakai ikoo aki mumatakutene ko Mian Bisa? Ikoo posinggat-singgat inukum mate buno Yana.

⁴¹Tolongo konda ukuman lua kita takainomo pokokonoi tukon nda kokubai. Bai Yana tutuu akiyo kona sala!”

⁴²Maka yana bantile, “Yesus, neneeke yaku, kalu Ikoo lubat pokakana ko Tomundo!”

⁴³“Anggayomo,” Yesus bantile doi yana, “Oloyo nia ikoo naikon polaing Yaku doi Firdaus.”

⁴⁴Uga-ugaate batong songulo lua suung kooloyo, kooloyo akiyono kopanano, tukon posaapon do lipudoo teali kalipookan tuuno tukon polong batong tolu kikinobian.

⁴⁵ Lalanse mo tagantung doi Temeneno Na Bonua lalomo, mosiak teali lua.

⁴⁶ Maka Yesus nggeleamon tukon alalo mobabasal, “Tama! Doi limamu kusalakanggene kobutonggu!” Salataa bantile buno doiya, Yana matemo.

⁴⁷Pasukan kapalano kitayo oila komo lapamo teali, yana nggaale ko Mian Bisa. Maka yana bantile, “Bisa yana aki nasala!”

⁴⁸Mian badaang mo lubat idoo, sulano namapatookon, kitayo oilamo komo teali. Yanila sasaibino mule tukon manasal konoano tutuuno.

⁴⁹ Tukon sasaibino Yesus napomanaanggonan, tololo doboiboinedoo mo lainge yana doi Galilea, mokokondong doi nadodoonan tukon kitayo sasaibino doiya.

⁵⁰Daano komeeng komian kosambuno Yusuf, kona luwean doi kota Arimatea doi lipu Yudea. Yana meeng komian monondok mian mo inodotii, tukon daano mototiili tempono ko Mian Bisa namaparenta buno Tomundo. Mau kai yana anggota Pangadilan Agama, yana aki nasatujuiyo kokaputusan tukon do pangadilan agamadoo nakokubai.

⁵¹

⁵²Yusuf nia ampakon momangadap doi Pilatus tukon kabiyo sulano Yesus bajano nabineekon doi yana.

⁵³Doibundu yana obulusene Yesus bajano doi kayung sempang, maka bunguse tukon toik kafan moute moluwedoi linen. Lapa doiya yana abese doi kibuloo lalomo mo kinubai doi batu bungkono — kibuloo akiyoon napinake.

⁵⁴Oloyodoo oloyo Jumat; tukon oloyo Tadean kabimo mangatambuun.

⁵⁵Boi-boine mo lubat tukon Yesus moluwedoi Galilea lainge Yusuf tukon kitayo do kibuloo. Yanila kitayo koidan bulaandomo Yesus bajano nainabosan doi kibuloo lalomo.

⁵⁶ Doibundu yanila mule maka sadiayo kolamuan-lamuan tukon lisison mobabangi sulano natinulu Yesus bajano. Doi oloyo Tadean, yanila tade mobalimang sulano tulutiyo koukum agama.