Read Banggai LUKAS 3 Bible Online

LUKAS 3 - Banggai bible

LUKAS 3

¹Doi taun kosongulono lima luwedoi Tomundo Tiberius namaparentaan, Pontius Pilatus natealian gubernur doi Yudea, tukon Herodes nabaparentaan doi Galilea. Filipus, Herodes utuso nabaparentaan doi wilayah Iturea tukon Trakhonitis, bai Lisanias baparentaan doi Abilene.

²Komo taaniyo koimam-imam babasal doiyamo Hanas tukon Kayafas. Doiyamo kotaun ko Mian Bisa nabasilinganan doi Yohanes, Zakaria napau doi padang lalomo.

³Maka Yohanes ampakon doi yayaandomo doi posaapon kolipu Yordan Paisunobatango tukon pelenggene ko Mian Bisa nabilita. Yohanes nggele-nggeleamon, “Pobadodoloon doi polalim-lalim, tukon komuyu sio posinau, sulano ko Mian Bisa naompuniyo komuyu.”

⁴ Doiya pokokonoi tukon komo totulis doi Nabi Yesaya nakitab lalomo: “Daano komian monggele-nggeleamon doi padang lalomo, ‘Sadiayo kololoon motuuk doi Temeneno, apatale kololoon motuuk doi Yana.

⁵Samba-samba kopeak siokai pookuiyo, samba-samba kobunggo tukon bunggo bungkukono poapatale. Kololoon mo patek-patek pokoloyose, tukon loloon mo bunggul pokeseayo.

⁶Komian doi posaapon kodunia nia naikon kitayo ko Mian Bisa salamatene kobanggapi!’ ”

⁷ Badaang komian molubat doi Yohanes sulano nasinau. Yohanes bantile doi yanila, “Komuyu mian molokis! Indee komo bantile baikon komuyu moola tongosodii doi Mian Bisa naukuman naikon mo lubat?

⁸ Potudoikene tukon mukokubai baikon komuyu molapamo badodoloon doi polalim-lalim! Inai potambuun bantile baikon Abraham daano mumbumbu. Neneeke: Doi batu-batu nia ko Mian Bisa moola kubaiyo Abraham natulunan!

⁹ Koolowang tasadiamo patape kayung polong doi anggol-anggolo. Samba-samba kokayung mo akiyo kosaono mo monondok tinape tukon sinakukon doi aung lalomo.”

¹⁰“Jadi, oila komo moola kami kubaiyo?” domianoo sadaiyo Yohanes.

¹¹Yohanes timbiliyo, “Mian mo daano lua kona bokukum, sio nabeekene komeeng doi mo akiyo koona; tukon komian mo daano kona kinaan sio naebe-ebese.”

¹² Pakabi-pakabi lulu koidan lubat doi Yohanes sulano nasinau. Yanila mansadai, “Tama Guru, oila komo moola kami kubaiyo?”

¹³Yohanes timbiliyo, “Inai pokabiyo lobian badaang oila komo lapamo tinantukon.”

¹⁴Daano koidan kosuludadu mo mansadai, “Bulaando tukon kami? Oila komo moola kami kubaiyo?” Yohanes timbiliyo, “Inai posakisaayo mau doi indee komiano tukon inai polambase komian nadoy tukon tudukon-tudukon moaki nabisa. Sukupo tukon pogaji!”

¹⁵Doiya kosinggatoo tambuuno komian momansa-mansadai, oilakai Yohanes doiyamo do Tomundodoo Pasalamat yanila mo totiiliyo.

¹⁶Doiyamo kosababpo Yohanes bantile doi yanila sasaibino, “Yaku sauwo komuyu tukon paisu, bai totiiliyo naikon lubat komian mo lobian babasal doi yaku. Mobukayo kona sapatu aloso yaku aki namoola. Yana naikon sauwo komuyu tukon Mian Bisa Na Roh tukon bilat.

¹⁷Doi limano daano kokiapan sulano natapise sasaibino kona gandum sampe bilisii. Kolabue pinototongikon doi longgo lalomo, bai sasaibino kobulung sinua doi aung lalomo mo aki naposo!”

¹⁸Bunomo doiya Yohanes naotunggulano komian tukon bula-bulaa kocara, doiya kosinggatoo nababilitakanano ko Bilita Monondok.

¹⁹ Bai Herodes, pamarenta Galilea, Yohanes anuukene kona basoowaanan tukon Herodias, utuso naboloki, tukon sasaibino kokaliangano kona kulokisan bailon mo lapamo yana kubaiyo.

²⁰Bai Herodes tolongo suungiyo kona kulokisan tukon usekene Yohanes doi talunggu lalomo.

²¹Salataa do mianoo sinaumo, Yesus koidan sinaumo. Tukon salataa Yana daano mosambeang, tobuka kotimbu,

²² tukon ko Mian Bisa Na Roh obulus doi bunggono pokakana kotomisi lapatiing. Maka linongol ko Mian Bisa alalo mobantile, “Ikoomo daku Pau sinoyang. Ikoomo komo kindendeke konoanggu.”

²³Doiya singgat Yesus atambuune kona balimangan, yana kona umur uga-ugaatene tolu kolonomo kotaun. Manurut mian napalaat, Yana Yusuf napau, Eli napau,

²⁴Matat napau, Lewi napau, Malkhi napau, Yanai napau, Yusuf napau,

²⁵Matica napau, Amos napau, Nahum napau, Hesli napau, Nagai napau,

²⁶Maat napau, Matica napau, Simei napau, Yosekh napau, Yoda napau,

²⁷Yohanan napau, Resa napau, Zerubabel napau, Sealtiel napau, Neri napau,

²⁸Malkhi napau, Adi napau, Kosam napau, Elmadam napau, Er napau,

²⁹Yesua napau, Eliezer napau, Yorim napau, Matat napau, Lewi napau,

³⁰Simeon napau, Yehuda napau, Yusuf napau, Yonam napau, Elyakim napau,

³¹Melea napau, Mina napau, Matata napau, Natan napau, Daud napau,

³²Isai napau, Obed napau, Boas napau, Salmon napau, Nahason napau,

³³Aminadab napau, Admin napau, Arni napau, Hezron napau, Peres napau, Yehuda napau,

³⁴Yakub napau, Ishak napau, Abraham napau, Terah napau, Nahor napau,

³⁵Serug napau, Rehu napau, Peleg napau, Eber napau, Salmon napau,

³⁶Kenan napau, Arpakhsad napau, Sem napau, Nuh napau, Lamekh napau,

³⁷Metusalah napau, Henokh napau, Yared napau, Mahalaleel napau, Kenan napau,

³⁸Enos napau, Set napau, Adam napau, Mian Bisa napau.