Read Banggai LUKAS 4 Bible Online

LUKAS 4 - Banggai bible

LUKAS 4

¹Yesus Mian Bisa Na Roh kuasaiyo salataa Yana tinggale ko Yordan Paisunobatango. Ko Mian Bisa Na Roh lolainge Yana doi padang lalomo.

²Idoo Yana Ibiliis sobaiyo sangkap kolono kooloyo kona kalumbit. Sangkap kolonodoo kooloyo Yana aki namakaan oioila. Jadi doibundu Yana neemiyomo momalaal.

³Ibiliis bantile doi Yana, “Ikoo Mian Bisa Napau, bolikon? Jadi, sumboliiyo naiya batu nia nateali roti.”

⁴ Yesus timbiliyo, “Doi Kitab Moliyous lalomo totulis, ‘Kobanggapi aki namoola tubo luwe tongo doi roti tolong.’ ”

⁵Maka Ibiliis babayo Yesus doi lipu mo tatandak, tukon tolongo sopiyoman Ibiliis tudoikene doi Yana sasaibino kobatomundoan doi dunia.

⁶“Sasaibino kokakuasaan tukon nakaasaan nia yaku salakanggene doi-Koo,” Ibiliis nabantilan doi Yesus. “Sabab sasaibino lapamo bineekon doi yaku tukon yaku moola kubeekene doi indee komiano yaku mo yase beekene.

⁷Sasaibinodoo naikon teali Komu langge, kalu Ikoo tootuku sosubaiyo yaku.”

⁸ Yesus timbiliyo, “Doi Kitab Moliyous lalomo totulis, ‘Sosubaiyo komu Temeneno Mian Bisa tukon leleaniyo Yana tolong.’ ”

⁹Maka do Ibiliisoo babayo Yesus doi Yerusalem tukon abese Yana doi Temeneno Na Bonua tinggupo maka bantile doi Yana, “Ikoo Mian Bisa Napau, bolikon? Jadi bakatuwongo naimbaa.

¹⁰ Sabab doi Kitab Moliyous lalomo totulis, ‘Ko Mian Bisa naikon sumboliiyo kona malaekat-malaekat modagaiyo Ikoo mono-monondok.’

¹¹ Tukon koidan, ‘Malaekat-malaekat naikon labete Ikoo tukon yanila limano, sulano koai-Mu naaki natakait doi batu.’ ”

¹² Yesus timbiliyo, “Doi Kitab Moliyous lalomo totulis, ‘Inai mosobaiyo komu Temeneno Mian Bisa.’ ”

¹³Salataa Ibiliis lapamo sobaiyo Yesus tukon sasaibino kona akal kaliangano, yana otinggalemo Yesus tukon montotiili tempo mo monondok.

¹⁴Doibundu Yesus abali doi Galilea; tukon ko Mian Bisa Na Roh kuasaiyomo Yana. Bilita motuuk doi butongo tololongolo doi posaapon do lipudoo.

¹⁵Yana mongotunggul doi bonua-bonua kaleda tukon sasaibino komian nggaale Yana.

¹⁶Yesus ampakon koidan doi Nasaret, lipu Yana nainakabasalan. Doi oloyo Tadean, monurut nakabiasaan Yana ampakon doi bonua kaleda. Yana kokondong sulano nabacayo ko Kitab Moliyous,

¹⁷tukon bineekon kobuku Nabi Yesaya. Yana bukayo do bukudoo luluno, maka nalaate naiya ayat nia,

¹⁸ “Ko Temeneno Na Roh daano doi Yaku, sabab Yana lapamo molantike Yaku sulano Kubabilitakene ko Bilita Monondok doi mian motalalais. Yana bintekene Yaku sulano Kupopitoikene kona tongosodiiyan komian motinalunggu tukon natangalinan komian mopiit; sulano natongosodii komian mopinipik

¹⁹tukon babotilanggene kotempono ko Temeneno nalubatan mosalamatene Kona mian.”

²⁰Yesus lulune koidan do kitabpoo, tukon abalikene doi potugas, maka osulang. Sasaibino komian doi bonua kaledadoo pateekene Yana.

²¹Tukon Yesus atambuunemo konabantilan doi yanila, buno naiya, “Ayat-ayat Kitab Moliyous nia doi oloyo nia sukupo doi tempo komuyu pondongoliiyano.”

²²Kona bantilan-bantilan mo pelenggene monondok tuuno, tobikon yanila sosibong tukon tombonio Yana. Yanila bantile, “Bolikon kai Yana Yusuf na Pau?”

²³Maka Yesus bantile doi yanila, “Pasti komuyu naikon mopakeyo naandean nia motuuk doi Yaku, ‘Dokter, alinemo kobuto-Mu susuumu. Komo minasaindinggon kami mo lengele Ikoo mokubaiyo doi Kapernaum, kubaiyo koidan doi mukampung susuumu.’ ”

²⁴ Yesus suungiyo, “Neneeke, akiyo konabi mo inangga doi nakampung susuungo.

²⁵ Bai polengele: doi lounudoo Elia, singgatoo aki nalubat koudan tolu kotaun sembeleng kona kalumbit, teali komalaalan mo hebat tuuno doi posaapon kolipu. Doiya singgatoo daano mobadaang kobalu-balu doi Israel.

²⁶ Mau kai nabuno doiya, ko Mian Bisa aki nasumboliiyo Elia ampakon doi meeng komian luwedoi balu-baludoo bai tolongo doi meeng kobalu doi Sarfat doi lipu Sidon.

²⁷ Bunomo koidan doi lounu Nabi Elisa daano badaang komian doi Israel motakatolon mo minosikiton, bai akiyo komeeng komian doi yanila mo inalin tongo Naaman Siria mianoo.”

²⁸Sasaibino komian doi bonua kaledadoo nggimal tuuno salataa ndongoliiyo do langgedoo.

²⁹Yanila kokondong maka siikayo Yesus doi kota tonggulungo, tukon babayo doi bunggul motombing bibilo, doi naando yanila nabangunano kona pokota. Yanila namakisuut duwekene Yana doi motombing lalomo.

³⁰Bai Yesus tobuat doi mianoo namadaangan maka ampakon.

³¹Doibundu Yesus ampakon doi kota Kapernaum doi Galilea. Imbali Yana mongotunggul mian doi oloyo Tadean.

³² Yanila masainding mokitayo Yana nacara mongotunggulan, sabab Yana basilingan tukon nanggaanganan.

³³Idoo doi bonua kaleda daano komeeng komian mo kinuasaimo ibiliis. Do mianoo mangga-manggadidi.

³⁴“He Yesus, Nasaret miano, Ikoo yase kubaiyo oila tukon kami? Ikoo lubat sulano musilakayo kami? Yaku toiyo indee Ikoo: Ikoo sosumbolii mo moliyous doi Mian Bisa!”

³⁵“Tade!” Yesus nggalaiyo do ibiliisoo. “Tobuato doi mian nia!” Maka do ibiliisoo tikakene do mianoo doi yanila sasaibino salaano, doibundu maka tobuato doi mianoo aki naasakite.

³⁶Sasaibino komian masainding, tukon pobantikon meeng maka bailon, “Bukan maen kona bantilan-bantilan. Tukon nanggaanganan tukon nakuasa, Yana parentayo koibiliisoo motobuat, tukon yanila tobuat koidan!”

³⁷Maka bilita tentang Yesus tololongolo doi posaapon kowilayahdoo.

³⁸Yesus tinggale do bonua kaledadoo, maka ampakon doi Simon nabonua. Simon namonianan moluko daano moseselon maligoot, tukon komian popitoikene doiya langgedoo doi Yesus.

³⁹Yesus ampakono doi bolokidoo namooloan, maka siikayo do maligootoo. Do maligootoo leal, tukon doi Simon namonianan moluko banggadudul bangun tukon leleaniyo yanila.

⁴⁰Salataa kooloyo sosoopo, sasaibino komian babakene doi Yesus koutus-utusoila mo malaat sesel moimoiya kokalinga-No. Yesus binggakene kolimano doi yanila bunggono meeng-meeng tukon aline yanila.

⁴¹Do ibiliis-ibiliisoo tobuato doi mianoo badaang, maka nggele-nggeleamon, “Ikoomo kai ko Mian Bisa Napau!” Bai Yesus nggalaiyo yanila tukon aki napataikene yanila mobasilingan, sabab yanila toiyo baikon Yanamo ko Tomundo Pasalamat.

⁴²Salataa kooloyo mangatambuuno sumbot Yesus tinggalemo do kotadoo maka ampakon doi meeng kolipu mo kiis. Komian tambuuno moumboliiyo Yana, tukon salataa yanila pososuunggene, yanila kakaate sulano inai Yana natinggale yanila.

⁴³Bai Yesus bantile, “Bilita Monondok tentang bulaando ko Mian Bisa namaparentaan sio Kubabotilanggene doi kota bailon, sabab tobikon doiyamo ko Mian Bisa bintekene Yaku doi dunia.”

⁴⁴Tobikon doiya Yesus bangotunggul doi bonua-bonua kaledaan lalomo doi posaapon kolipu Yudea.