Read Banggai LUKAS 6 Bible Online

LUKAS 6 - Banggai bible

LUKAS 6

¹ Doi meeng kooloyo Tadean, salataa Yesus alon doi meeng koanggur asino, kona pololaing-pololaing bapupuimo gandum. Yanila lesese do gandumoo tukon limano, maka kaane.

²Bubula ko Parisi miano bantile, “Bulaando komuyu molanggaremo koparaturan-paraturan nda agama tukon kubaiyo komo pinantanggon doi oloyo Tadean?”

³ Yesus timbiliyo, “Akiyoon kai komuyu pobacayo tentang Daud nakinubai, singgatoo yana tukon na mian-mian momalaal?

⁴ Yana usok doi Temeneno Na Bonua lalomo tukon mangala roti mo lapamo sinosubakon doi Mian Bisa, maka yana kaane. Doibundu bineekon koidan dorotidoo doi namian-mianoo. Banggokai monurut nda agama aturano, tongo imam-imam komo moola kaane do rotidoo.”

⁵Maka Yesus bantile, “Manusia na Pau berkuasa doi oloyo Tadean.”

⁶Doi meeng kooloyo Tadean bailon, Yesus ampakon mongotunggul doi bonua kaleda. Idoo daano komian mo lemat kolimano sembeleng.

⁷Bubula koguru agama tukon Parisi miano yase umboliiyo Yesus nakasalaan sulano namoola tudowe Yana. Jadi yanila pateekene momeenggon kai naikon Yana aline komian doi oloyo Tadean.

⁸Bai Yesus toiyo yanila napikilan. Maka Yana bantile doi mianoo mo lemat kolimano, “Mai kokondong diimbaa muka nia!” Mianoo bangun, maka kokondong idoo.

⁹Doibundu Yesus mansadai doi mian mo daano idoo, “Manurut agama, oila komo moola kita kubaiyo doi oloyo Tadean? Kubaiyo komo monondok kai kubaiyo komo kulokis? Salamatene komian kai osilakayo komian?”

¹⁰Yesus kitayo potikunggon doi yanila sasaibino, maka bantile doi mianoo, “Ulule kolimamu.” Do mianoo ululemo kolimano, tukon dolimanodoo tangalino.

¹¹Bai do guru-guru agamadoo tukon Parisi miano nggimal tuuno, tukon tambuuno posadaikene tentang oila komo moola yanila kubaiyo motuuk doi Yesus.

¹²Doiya kosinggatoo Yesus tolibo doi meeng kobunggul sulano nasambeang. Idoo Yana sambeang doi Mian Bisa meeng kopopook.

¹³Salataa kooloyo taraango, Yana uange Kona pololaing-pololaing, maka molilik songulo lua komian doi yanila. Yana sombuikene domo songulodoo lua komian rasul-rasul. Doi yaniladoo doiyamo:

¹⁴Simon (mo binantil Petrus), tukon Andreas Simon utuso; Yakobus tukon Yohanes, Filipus tukon Bartolomeus,

¹⁵Matius tukon Tomas, Yakobus Alfeus napau, tukon Simon (mo binantil Patriot),

¹⁶Yudas Yakobus napau tukon Yudas Iskariot komo doibundu teali dadaate Yesus.

¹⁷Doibundu Yesus obulus doi bunggulo polaing-laing tukon do rasul-rasuloo, maka tade tukon kokondong doi meeng kotampat mo patal. Idoo daano komeeng kotambuno mobadaang kona pololaing-pololaing bailon tukon badaang komian mo lubat doi yayaa doi posaapon ko Yudea, Yerusalem, tukon kota-kota Tirus tukon Sidon mo doi tobun bibilo.

¹⁸Yanila lubat momondongolii Yesus tukon sulano nainalin doi yanila nasesel-sesel. Yanila mo inusoki ibiliis lubat koidan tukon inalin.

¹⁹Sasaibino komian kakaate motaape Yesus, sabab daano kokuasa mo tobuat doi butongo mo aline yanila sasaibino.

²⁰Yesus mbalenge kona pololaing-pololaing maka bantile, “Kinatauwan komuyu mian motalalais, sabab komuyu daano anggota Mian Bisa naumat!

²¹Kinatauwan komuyu mo malaal diabudodoo; komuyu naikon inokobosuli! Kinatauwan komuyu mo kokiil diabudodoo; komuyu naikon kokumbit!

²² Kinatauwan komuyu kalu komuyu minosikiton, inakiyonggon, tinotulai tukon binasalitakon tobikon tongo sabab Manusia na Pau!

²³ Nabi-nabi looluk bunomo doiya kona kinubaiyan. Kalu do lobodoo teali komuyu siokai posanaang konoamuyu tukon poosuleng polaba, sabab babasal kotambono mo tasadia tuuk komuyu doi surgaa.

²⁴Bai silakamo komuyu mo kaasa diabudodoo nia; sabab komuyu lapamo toupiyo kona monondokan!

²⁵Silakamo komuyu mo bobosul diabudodoo nia; sabab komuyu naikon malaal! Silakamo komuyu mo kokumbit diabudodoo nia; sabab komuyu naikon poloon tukon kokiil!

²⁶Silakamo komuyu, kalu sasaibino komian nggaale komuyu; sabab bunomo koidan yanila naturunan nggaale konabi-nabi mokala-kala loolukoo.”

²⁷“Bai doi komuyu mo molongolo doi Yaku diabudodoo, Yaku mebee nateteba nia: seseange komu musu-musu, tukon kubaiyo komo monondok doi mian mo mosikitonggon.

²⁸Balakaatiyo komian mo kutuke ikoo, tukon sambeanggene komian mo kulokisanggene ikoo.

²⁹Kalu komian tapiyo kopapaimu sembeleng, sodiiyomo yana natapiyo kopapaimu sembeleng koidan. Kalu komu jubah linambas, beekene koidan komu kalambi.

³⁰Kalu komian makabi oioila doikoo, beekene doiya doi yana; tukon kalu komu lobo linambas, inaimo mokabiyo koidan.

³¹ Polakukanggene komian bailon buno komuyu moyase pokinubaikon doi yanila.

³²Kalu komuyu tolongo seseange komian mo seseange komuyu, oila komu jasa? Mau komian mobaladosa toiyo seseange komian mo seseange yanila.

³³Tukon kalu komuyu tolongo kubaiyo komonondokan doi mian mo kubaiyo komonondokan doikoo, oila komu jasa? Mau komian mobaladosa toiyo kubaiyo komo buno doiyadoo!

³⁴Tukon kalu komuyu tolongo binggotiiyo doy tongo doi mian mo moola abalinggene, oila komu jasa? Mau komian mobaladosa bai toiyo binggotiiyo doy doi mian mobaladosa, maka nakabiyo naabalinggene.

³⁵Kona bisaan aki nabuno doiya! Komuyu kona bisaan sio poseseange kopo musu tukon pokubaiyo kopokindokonan doi yanila. Komuyu sio pobeena babingkat, tukon inai pomoinikene namoola abalinggene. Kalu buno doiya, komu tambo naikon babasal tukon komuyu naikon teali Mian Bisa Mo Tatandak Tuuno napau-pau. Sabab ko Mian Bisa monondok konoano doi mian mo aki natoiyo mantalima seang, tukon doi lobo nalokisan koidan.

³⁶Siokai komuyu pomamaasikene buno ko Tamamu koidan napomamaasikon!”

³⁷“Inai pohakimiyo komian bailon, sulano mau komuyu susuumuyu inai Mian Bisa nahakimiyo. Inai poukume komian bailon, sulano komuyu susuumuyu koidan ko Mian Bisa aki naukume. Ompuniyo komian bailon, sulano ko Mian Bisa koidan naompuniyo komuyu.

³⁸Beena doi mian bailon, sulano ko Mian Bisa koidan beena doikoo; komuyu naikon mantalima sabeat molobi-lobian mo lapamo inukul mono-monondok tuuk doikoo. Sabab koukulan komuyu mo pakeyo tuuk doi mian bailon naikon ko Mian Bisa pakeyo tuuk doikoo.”

³⁹ Doibundu Yesus salitaikene doi yanila koandean buno naiya, “Kalu komian piit tandane komian mopiit bailon, pasti domo luailadoo naikon otuwong doi bitu lalomo.

⁴⁰ Akiyo komurit mo lobian kona babasalan doi naguru. Bai komurit mo lapamo inotunggul, naikon sasaibino teali buno naguru.

⁴¹Bulaando komuyu mokitayo kokayung bisilo doi utusomu matano lalomo bai kobalok mo doi matamu susuumu aki mupalatikanggene?

⁴²Bulaando kai komuyu moola bantile doi utusomuyu, ‘Mai utus, kubuate kokayungoo bisilo luwedoi matamudoo,’ bai doi matamu lalomo susuumudoo daano kobalok mo aki mukitayo? He munafik! Buate loolukon kobalok mo daano doi matamu susuumu. Maka nasodo ikoo namoola kitayo tukon tontong tukon namoola mubuate kayung bisilodoo doi utusomu matano.”

⁴³“Kayung mo molumbang aki namasaokon saono mo lokis. Bunomo lakon kokayung mo aki namolumbang, aki nasaokene kosaono mo monondok.

⁴⁴ Meeng kokayung tiningonii doi saono. Mosolot mosoniton aki nasaokene koara saono, tukon laing mosoniton aki nasaokene koanggur saono.

⁴⁵ Komian monondok okitakene kolangge-langge monondok sabab konoano lobian kona monondokan. Komian mo lokis okitakene kolangge-langge mo lokis sabab konoano moono tukon kulokisan. Sabab oila kobabanggita nabinantil doiyamo komo tokumbe doi noanggita.”

⁴⁶“Bulaando komuyu mouange Yaku, ‘Temeneno, Temeneno,’ bai aki pokubaiyo oila Daku binantil doikoo?

⁴⁷Tukon indee kai komiano komo moola kita pokakanakene komian mo lubat doi Yaku, tukon molengele Dakubantilan, tukon lakukanggene? — Tadukai kutudoikene doikoo — .

⁴⁸Yana pokakana komian salataa mo kokondong bonua kaliyo ate-atean, maka nakubaiyo kona pandasi doi batu. Salataa daano kolomba tukon do paisudoo batango lupayo do bonuadoo, do bonuadoo aki namoola tolubang, sabab lapamo kinokondong doi pandasidoo bungkukono mo monondok.

⁴⁹Bai komian mo molongol Dakubantilan tukon aki nakubaiyo, doiya buno meeng komian mo kekendenge kona bonua akiyo kona pandasi. Kalu dolombadoo lupayo, do bonuadoo polaing tolubang; tukon kona manasan todudulo tuuno!”