Read Banggai LUKAS 7 Bible Online

LUKAS 7 - Banggai bible

LUKAS 7

¹Salataa lapa momabantil do langge-langgedoo doi mianoo badaang, Yesus ampakon doi Kapernaum.

²Idoo daano kosuludadu Roma kapalano mo daano kona ata yana mo seseange tuuno. Do atadoo seselon tukon adukono mate.

³Salataa do suludadudoo kapalano longoliyo tentang Yesus, yana mosumbolii moimoiya kokatua Yahudi miano moampakon doi Yana sulano nakabiyo Yana nalubat tukon naaline kona ata.

⁴Singgatoo polong doi Yesus, do mianoo kabiyo tukon tutuu sulano Yana natulungiyo do suludadudoo kapalano. “Nasuludadu nia kapalano Tama moola natulunge,” yanila nabantilano doi Yesus,

⁵“sabab yana seseange konda bangsa tukon lapamo kekendenge kobonua kaleda tuuk doi kami.”

⁶Maka Yesus ampakon polaing-laing tukon yanila. Salataa Yesus kabimo polong doi bonuadoo, do suludadudoo kapalano utusemo kotula-tulano doi yana sulano nabantile, “Mau naakimo Tama nasusa-susa doi kubonua. Yaku aki namoola talimayo Tama doi kubonua.

⁷Doiya kosababpo yaku susuunggu aki kubarani mangadap doi Tama. Jadi beenamo parenta tolong sulano daku peleleani natangalin.

⁸Sabab mau doi yakudoo loingiyo daku atasan naparenta tukon modoi bilit doi yaku daano koidan kosuludadu-suludadu mo sio naloingiyo daku parenta. Kalu yaku sumboliiyo komeeng kosuludadu, ‘Ampakon!’ yana koidan ampakon; tukon kalu yaku bantile doi bailon, ‘Mai dimbaa!’ yana kai lubat. Tukon kalu yaku parentayo daku ata, ‘Kubaiyo naiya!’ yana kai kubaiyo.”

⁹Yesus masainding molengele doiya. Yana mbaleng tukon bantil doi mianoo badaang mo daano lolainge, “Bolikon lobo namian nia. Doi Israel miano akiyoon Kumoposuunggon komanganggaan babasal mobuno naiya!”

¹⁰Salataa do mianoo mo sinumbolii abali doi suludadudoo kapalano nabonua, do atadoo tangalino.

¹¹Aki namalumbit doibundu, Yesus ampakon doi kota Nain. Kona pololaing-pololaing tukon mian badaang ampakon polaing Yana.

¹²Salataa Yesus koolaniyomo do kotadoo tataapono, ko mian-mian sodo mangantokon bajan doi kota tonggulungo. Komo mate doiyamo pau malaneno, pau motongo meeng doi meeng kobalu. Badaang komian doi kotadoo molainge do bolokidoo.

¹³Salataa Yesus kitayo do boinedoo, Yana seseange doi yana maka bantile, “Inai mokokiil, Tina!”

¹⁴Doibundu Yesus kolaniyo dobajanoo tanggungano maka taape. Maka komo tanggunge tade. Yesus bantile, “He pau malane, yaku sumboliikon mubangun!”

¹⁵Pau malane mo lapamo matedoo, bangun osulang tukon basilingano. Maka Yesus salakanggene doi tinano.

¹⁶Sasaibino komian matakut tukon tambuuno nggaale ko Mian Bisa. Yanila bantile, “Meeng konabi mo babasal lapamo sumbot doi kita. Ko Mian Bisa lapamo lubat mosalamatene kona mian!”

¹⁷Bilita tentang Yesus nia tololongol potikunggon ko Yudea tukon doi lipu napokolanikonan.

¹⁸Yohanes napololaing-pololaing pailukene doi Yohanes sasaibino do kajadianoo. Maka Yohanes uange kolua komian kona pololaing

¹⁹maka nasumboliiyo yanila ampakon doi Yesus tukon mansadai, “Tamamo kai komian naikon mo lubat monurut Mian Bisa Naperjanjian, kai sio mai montotiili komian bailon?”

²⁰Doi Yohanes napololaing molua ampakono doi Yesus tukon bantile, “Yohanes Pasau Mian sumboliiyo kami mansadai doi Tama, banggon kai Tamamo do mianoo naikon mo lubat monurut Mian Bisa Naperjanjian, kai sio mai montotiili komian bailon?”

²¹Doiya kosinggatoo, Yesus aline komian badaang, tukon siikayo badaang ko ibiliis tukon kubaiyo badaang komian mopiit moola mongkita.

²² Jadi Yesus timbiliyo, “Abalimo doi Yohanes tukon bontiikene oila komo komuyu mo lengele tukon kitayo: mian piit mongkita, mian lemat ampakon, mian motakatolon mo minosikiton tangalin, mian bongol molongol, mian momate tubo koidan, tukon Bilita Monondok moluwedoi Mian Bisa binabotilanggon doi mian-mian motalalais.

²³Kinatauwan doi mian mo akiyo kona alasan motolayo Yaku.”

²⁴Sambuno lapa doi Yohanes nabito-bito ampakon, Yesus tambuuno basilingan doi mian badaang tentang Yohanes, nabantilano, “Komuyu ampakon doi padang lalomo indee kopo kinita? Kai meeng kobulung mbombuul mo puule?

²⁵Komuyu ampakon indee kopo kinita? Meeng komian mo bapakean monondok? Komian mo mapake pakean mobuno doiya tukon tubo sanaang mo dungol doi batomundoan!

²⁶Jadi, komuyu tobuat oila kopo kinita? Sulano kai po mongkita meeng konabi? Bisa, mala lobian doi meeng konabi.

²⁷ Sabab Yohanes doiyamo komo minakisuuti doi ayat Kitab Moliyous nia lalomo, ‘Naiyamo Daku bito-bito,’ Mian Bisa bantile, ‘Yaku naikon bintekene yana mantailukon loluk doi-Koo, sulano yana nabukayo kololoon tuuk doi-Koo!’ ”

²⁸“Neneeke,” Yesus bantile koidan, “doi dunia nia akiyoon daano komian mo lobian kona babasalan doi Yohanes Pasau Mian. Bai komian mo popoisik doi antara Mian Bisa namian, lobian kona babasalan doi Yohanes Pasau Mian.”

²⁹ Sasaibino komian — tousokon kopakabi-pakabi lulu — molengele Yesus mobantile do langgedoo; yanilamo komian mo lapamo tulutiyo ko Mian Bisa nakakabi tukon yase Yohanes nasauwo paisu salani.

³⁰Bai ko Parisi mian-miano tukon guru-guru agama aki nayase talimayo ko Mian Bisa natetel motuuk doi yanila butongo. Yanila aki nayase Yohanes nasauwo.

³¹Maka Yesus basilingan koidan, bantile, “Tukon bulaando Daku pikikanano, komian nia budodoo? Buno oilakai yanila?

³²Yanila buno labuk-labuk mo osulang doi labotan; kotambuno meeng nggele-nggeleamon doi mo bailon, ‘Kami maenggene kolagu momonondok tuuk doi komuyu, bai komuyu aki poyase salendeng! Kami mananikene koragu matean, tukon komuyu aki pokokiil!’

³³Yohanes Pasau Mian lubat — yana bangapatai tukon aki namonginum anggur — tukon komuyu bantile, ‘Yana inusoki setan!’

³⁴Manusia na Pau lubat — Yana kaan tukon monginum — maka komuyu bantile, ‘Kitayo ndaiya mianoo! Modoko, nggolonguon, pakabi lulu tulano tukon mian baladosa tulano.’

³⁵Mau kai nabuno doiya, ko Mian Bisa napandoiyan tokita doi sasaibino komian mo talimayo.”

³⁶Meeng ko Parisi miano, kosambuno Simon, undange Yesus nakaan. Yesus ampakon doi nabonua tukon osulang kaan.

³⁷ Doi kotadoo daano koidan komeeng koboine mo tubo doi lalim lalomo. Salataa yana lengele Yesus daano mokaan doi Parisi mianoo nabonua, yana lubat tukon makanggi meeng kobotol pualam koantoko lisison mobabangi.

³⁸Yana kokondong doi Yesus tonggulungo koolaniyo koaino tukon kokiil maka mbetokiiyo Yesus aino tukon matano paisuno. Doibundu kotuuliyo Yesus aino yana itase tukon nabuuk maka umayo tukon kundongiiyo lisison mobabangi.

³⁹Salataa do Parisi miano mo uange Yesus kitayo do langgedoo, yana bantile doi noano lalomo, “Kalu kai naiya mian nia nabi, tantu Yana toiyo indee miano do boinedoo mo singgile Yana, tukon baikon do boinedoo tubo doi lalim lalomo!”

⁴⁰Maka Yesus bantile doi Simon, “Simon, daano kolobo meeng Yaku moyase bontiikene doikoo.” “Oode, Tama Guru,” Simon timbiliyo, “bantilemo kai.”

⁴¹Yesus bantile, “Daano kolua komian mo basamea doi mian mo binggotiiyo doy. Komeeng komian basamea lima kosakato doy perak, tukon komeeng koidan lima kolono kodoy perak.

⁴²Domo luailadoo aki namoola tebeal do sameadoo, maka doi yaniladoo nasamea inakiyonggono. Nah indee komiano doi mianoo molua naikon komo lobian kona seangano do miano mo bingkotiiyo doy?”

⁴³“Yaku aanggene do miano mo badaang tuuno kona samea inakiyonggon!” Simon timbiliyo. “Komu palaat bisa,” Yesus timbiliyo.

⁴⁴Maka Yesus kitayo do boinedoo tukon bantile doi Simon, “Ikoo kitayo naboine nia? Yaku lubat doi mubonua, tukon ikoo aki musadiayo kopaisu sulano kukumosiyo koai-Nggu; bai naboine nia lapamo kumosiyo koainggu tukon matano paisuno, tukon kotuuliyo tukon nabuuk.

⁴⁵Ikoo aki mulolobotiyo Yaku tukon pouma, bai naboine nia aki natade moumayo koai-Nggu salataamo Daku lubatan naimbaa.

⁴⁶Ikoo aki mukundongiiyo lisison doi olu-Nggu, bai naboine nia lapamo kundongiiyo lisison mobabangi doi ainggu.

⁴⁷Bisa, kona soyang mo babasalo okitakene baikon kona lalim mo badaang lapamo inompuni! Kalu komian moinompuni soisik, Yana naikon meseang soisik koidan.”

⁴⁸Maka Yesus bantile doi boinedoo, “Komu lalim-lalim lapamo inompuni.”

⁴⁹Komian bailon mo osulang kaan polaing Yesus tambuuno pobantikon meeng maka bailon, “Indee namian nia kolalim momoola naompuniyo?”

⁵⁰Bai Yesus bantile doi boinedoo, “Sabab ikoo mangangga doi Yaku, ikoo sinalamaton. Ampakono tukon monondok!”