Read Banggai LUKAS 8 Bible Online

LUKAS 8 - Banggai bible

LUKAS 8

¹Aki namalumbit doibundu, Yesus ampakon doi kota-kota tukon kampung-kampung, sulano nababotilanggene ko Bilita Monondok baikon ko Mian Bisa tambuuno momaparenta buno Tomundo. Songulo lua Kona pololaing-pololaing lainge polaing Yana.

² Bunomo koidan bubula koboine mo lapamo inalin doi ibiliis tukon nasesel. Yanila doiyamo Maria mo binantil Magdalena (pitu koibiliis mo lapamo liniat doi yana);

³koidan Yohana, Khuza naboloki, pagawe doi Herodes nakamali; Susana, tukon badaang koidan koboine bailon. Tukon napai ongkos susuungo, yanila tomboniiyo Yesus tukon napololaing-pololaing.

⁴Komian banggadudul lubat doi Yesus luwedoi bubula kokota. Tukon salataa lapamo badaang komian pototongi, Yesus basalitakene doi yanila naiya andean nia:

⁵“Meeng kopolimang asi ampakon tipase kona kalibuang. Salataa yana daano mobatipason, daano kalibuang mo otuwong doi loloon. Kosoobos mian tudongiiyo tukon kobailon tomisi kaane.

⁶Daano koidan komo tuwong doi lipu mobatu-batuwon. Salataa kosopi-sopiino sumbot do tanamanoo molooyumo sabab kobutano motuul.

⁷Daano koidan kokalibuang mo otuwong doi sonit tangano. Do sonitoo tubo polaing do kalibuangoo tukon podipoti tobikon namate.

⁸Bai daano koidan kokalibuang mo otuwong doi buta mo subur, maka tubo tukon sao sakat luunggon nasakat.” Sala lapa basalitakene do andeanoo, Yesus bantile, “Kalu daano kotolingaimuyu pondongoliiyo!”

⁹Yesus napololaing-pololaing mansadaikene doi Yana do andeanoo alatino.

¹⁰ Yesus timbiliyo, “Komuyu lapamo binee pangalatian sulano potoiyo kolahasiano bulaando ko Mian Bisa namaparentaan buno Tomundo. Bai komian bailon inotunggul tukon andean, sulano yanila napalaatikanggene, bai aki natoiyo oilamo komo teali; tukon yanila mondongolii, bai aki namangalati.”

¹¹“Naiyamo koalatino do andeanoo: Do kalibuangoo doiyamo Mian Bisa nabantilan.

¹²Kalibuang mo otuwong doi loloon inandekon doi mian mo mondongolii dobantilanoo. Bai ko Ibiliis lubat maka lambase do bilitadoo doi yanila noano, sulano yanila inai namangangga tukon nasinalamaton.

¹³Kalibuang mo otuwong doi lipu mo batuwon inandekon doi mian doiya singgat mo molongol do bilitadoo, yana talimayo tukon monondok konoano. Bai do bilitadoo aki namoonggol doi yanila noano lalomo. Yanila tolongo soisikeen kona manganggaan, tukon doi tempo palasobaan nalubat, yanila akimo namangangga.

¹⁴Kalibuang mo otuwong doi sonit tangano inandekon doi mian mo molongol do bilitadoo, bai molilikene tentang yanila natuboan tukon yase tubo molobian tukon sanaang doi dunia nia lalomo. Sasaibinodoo podipoti yanila tobikon aki saokene kosaono mo monondok.

¹⁵Kalibuang mo otuwong doi buta mo subur inandekon doi mian mo molongol do bilitadoo, maka abese doi noano lalomo monondok tukon jujur. Yanila bataanggon polong saokene kosaono.”

¹⁶ “Akiyo komian mo suayo kona posi maka nasonggupiyo tukon gumbang, kai abese doi namooloan adeno. Yana naikon abese kona posidoo doi posidoo aino, sulano komian mo usok kitayo kona madialanan.

¹⁷ Akiyo komo tosookon komo aki naikon natokita; tukon akiyo komo linasiakon komo aki naikon natobuka tukon tinoi.

¹⁸ Tobikon doiya popalatikanggene mono-monondok oila komuyu nalinongol. Sabab komian mo daanomo naikon binee lobian badaang koidan; bai komian mo aki nadaano, soisik komo daano doi yana naikon inala koidan.”

¹⁹Tinano tukon Yesus utus-utuso lubat doi Yana, bai yanila aki napolong doi Yana sabab komian todudul badaang.

²⁰Maka daano komeeng komian mo bantile doi Yesus, “Tama, tinamu tukon Tama utus-utuso daano doi tonggulung. Yanila yase pososuung tukon Tama.”

²¹Bai Yesus bantile doi yanila, “Mian-mian mo molongol Mian Bisa nabantilan tukon lakukanggene, yanila kotinanggu tukon utus-utusonggu.”

²²Daano kooloyo meeng Yesus tukon napololaing-pololaing lakit doi duangan. “Mai kita nda ampakon imbali paisu sembeleng,” Yesus bantile doi yanila. Maka yaniladoo lengget.

²³Singgatoo yanila daano motalabut, Yesus moolo. Sosinggot puul kombombuul makansang doi paisudoo. Paisu tambuuno usok doi duanganoo lalomo, tobikon yanila sasaibino kabi nasilaka.

²⁴Yesus napololaing-pololaing ampakon doi Yana maka bangune Yana. Yanila bantile, “Tama Guru, Tama Guru, kita silakamo!” Yesus bangun maka gilaiyo do mbombuuloo tukon do bokoloo mo daano babokolan. Mbombuul tukon do bokoloo tade maka dopaisudoo teali molino tuuno.

²⁵Maka Yesus bantile doi napololaing-pololaing, “Bulaando komuyu moaki poanggayo Yaku?” Yanila teali masainding tukon matakut. Tukon yanila pobantikono meeng tukon bailon, “Indee kona bisaan namian nia moparentayo kombombuul tukon bokol, tukon Yana inangga!”

²⁶Yesus tukon napololaing-pololaing banggadudul talabut polong doi kabupaten Gerasa, doi Danau Galilea sembeleng.

²⁷Salataa Yesus loboson doi buta tina, Yana linubotii meeng komala-malane mo inusoki ibiliis. Do mianoo luwedoi kota. Malumbito Yana akimo nabapakean tukon aki nayase dungol doi bonua. Yana tongo yase dungol doi leng-leng lipu bakibulan.

²⁸Salataa kitayo Yesus, yana nggeleamon maka sosuba doi Yesus salaano tukon nggeleamon, “Yesus, Mian Bisa Napau Mo Tatandak Tuuno! Naikon Ikoo bulaandekene yaku nia? Yaku kabiyo inai mosakisaayo yaku!”

²⁹Do mianoo bantile buno doiya sabab Yesus parentayo do ibiliisoo batobuat doi yana. Lapamo idan doibiliisoo nakuasaiyo yana tobikon mau kolimano tukon aino nalapamo binoboi tukon rante tukon yana dinagai tuuno, yana daano mobetele do rantedoo maka doibiliisoo babayo doi padang bone.

³⁰Yesus mansadai doi mianoo, “Indee kosambumu?” “Kosambunggu ‘Legiun’,” do mianoo timbiliyo — sabab daano mobadaang koibiliis mo lapamo usok doi butongo lalomo.

³¹Do ibiliisoo kabiyo tukon tutuu sulano inai Yesus nasiikayo yanila doi Motombing Matean lalomo.

³²Loolani doi lipudoo daano badaang tuuno kobabung mo daano moumbolii kinaan doi bunggul peako. Do ibiliisoo kabiyo tukon tutuu doi Yesus sulano naminoolakon mousok doi babung-babungoo lalomo. Tukon Yesus loingiyo.

³³Maka do ibiliisoo tobuato doi mianoo tukon usok doi babung-babungoo lalomo. Maka do babung-babungoo obulen tukon bakatuwong doi motombingoo bibilo doi paisudoo lalomo, doibundu tombulo.

³⁴Do pototooli babungoo kitayo oila komo lapamo teali. Maka yanila obulen tukon pelenggene do bilitadoo doi kota tukon potikunggon kokampung.

³⁵Maka komian ampakon sulano namokita oila komo teali. Yanila lubat doi Yesus, tukon idoo yanila laate do mianoo mo lapamo tosodii doi ibiliisoo daano moosulang kolaniyo Yesus aino. Yana lapamo bapakean tukon kona pikilan monondoko. Yanila teali matakut.

³⁶Yanila mo mokita do kajadianoo, basalitakene doi mian bulaando do mianoo nainalinan.

³⁷Maka sasaibino kobanggapi doi kabupaten Gerasadoo kabiyo tukon tutuu sulano Yesus naotinggale do lipudoo, sabab yanila sasaibino matakut tuuno. Jadi Yesus lakit doi duangan maka mule.

³⁸Mian mo lapamo tosodii doi ibiliisoo kabiyo doi Yesus sulano yana namoola malaing. Bai Yesus sumboliiyo yana naampakon,

³⁹Yana bantile, “Mulemo tukon babotilanggene oila komo lapamo Mian Bisa lakukanggene doikoo.” Maka do mianoo ampakono popitoikene doi potikunggon kota, oila komo lapamo Yesus lakukanggene doi yana.

⁴⁰Salataa Yesus abali doi paisu sembeleng, Yana sinambut tukon monondok doi mian-mian sabab yanila daano mototiiliyo Yana.

⁴¹Maka lubat komeeng komian pototooli bonua kaleda doi lipudoo. Kosambuno Yairus. Yana sosuba doi Yesus salaano tukon kabiyo tukon tutuu sulano Yesus nalubat doi nabonua,

⁴²sabab kona pau boine tongo meeng kona umur songulomo lua kotaun kabimo mate. Daano Yesus moampakon doi Yairus nabonua komian dipe-dipete Yana doi sasaibino kololoon.

⁴³Doi antarano daano koidan koboine meeng mo lapamo songulo lua kotaun kona seselonan ndendek kosauno mo posuungimo tukon nabolokonan. Yana akabusemo sasaibino kona buat sulano nabapakuli doi dokter, bai akiyo komo moola aline.

⁴⁴Do boinedoo kolaniyo Yesus doi tonggulung, maka singgile kona jubah bunduno. Doiya kosinggatoo do boinedoo sauno mondendek tademo.

⁴⁵Yesus mansadai, “Indee komo singgile Yaku?” Sasaibino komian bangakikon. Maka Petrus bantile, “Tama, daano badaang tuuno komian doi potikunggon Tama; yanila dipe-dipete Tama!”

⁴⁶Yesus bantile, “Bai daano komian mo singgile Yaku. Yaku toiyo doiya, sabab daano kobukuanan mo sumbut doi Yaku.”

⁴⁷Do boinedoo sadar sabab kona kokubai totoimo. Jadi lubat tukon mbombokon maka sosuba doi Yesus salaano. Maka yana basalitakene doi mianoo sasaibino salaano, bulaando yana mosinggile Yesus, tukon doiya kosinggatoo kona sesel tangalino.

⁴⁸Yesus bantile doi yana, “Kupau, sabab ikoo anggayo Yaku, ikoo tangalin. Ampakono tukon salamat.”

⁴⁹Daano Yesus mobasilingan, meeng kososumbolii lubat doi Yairus nabonua. Yana bantile doi Yairus, “Tuan naboine matemo. Inaimo Tuan mokubaiyo susa Tama Guru koidan.”

⁵⁰Salataa Yesus lengele doiya, Yana bantile doi Yairus, “Inai momatakut. Anggayomo tolong tukon komu pau naikon tangalin.”

⁵¹Salataa polong doi Yairus nabonua, Yesus aki napataikene meeng komian mousok tukon Yana tolongo Petrus, Yohanes, Yakobus tukon tolongo do paudoo tamano tinano.

⁵²Sasaibino komian daano mokokiil tukon mandaung sabab do paudoo namatean. Bai Yesus bantile, “Inai mokokiil. Do paudoo aki namate, yana tolongo moolo!”

⁵³Yanila kokumbite Yesus, sabab yanila toiyo do paudoo boine matemo.

⁵⁴Doibundu Yesus taaniyo do paudoo limano maka bantile, “Banguno, Pau!”

⁵⁵Do paudoo naansaang abalimo koidan, tukon sosinggot yana bangun. Lapa doiya Yesus sumboliiyo yanila mobeena kaan do paudoo.

⁵⁶Paudoo naorangtua masainding tuuno. Bai Yesus pantane yanila mobabotilanggene do langgedoo doi inde-indee komiano.