Read Banggai LUKAS 9 Bible Online

LUKAS 9 - Banggai bible

LUKAS 9

¹Yesus monguang songulo lua Kona pololaing, maka beena kuasa doi yanila sulano nasiikayo koibiliis tukon aline kosesel.

²Doibundu Yana sumboliiyo yanila ampakon aline komian moseselon tukon pelenggene kobilita tentang bulaando ko Mian Bisa nabapamarentaan buno Tomundo.

³ “Inai makanggi oioila tuuk doi muampakonan,” Yesus bantile doi yanila, “Inai makanggi tongkat, kai pundi bangabosan doy, kai kinaan, kai doy, kai lua kopatolo kopakean.

⁴Doi yaando kai kopo tinalimaan podungolo idoo sampe komuyu otinggale do kotadoo.

⁵ Tukon inaando komo aki natalimayo komuyu, salataa komuyu otinggale do kotadoo, potipasene koambata doi aimuyu salaano, buno meeng poingotii doi yanila.”

⁶Yesus napololaing-pololaing luwemo, maka ampakon doi kampung-kampung sulano napo babilitakene do Bilitadoo Monondok tukon aline komian moseselon doi yayaa.

⁷ Salataa Herodes, maparenta doi Galilea, molengele tentang sasaibino kokajadianoo, yana bingung. Sabab daano komo bantile baikon Yohanes Pasau Mian tubomo koidan.

⁸Daano koidan mo bantile baikon Elia sumboto koidan. Komian bailon koidan bantile baikon meeng konabi doi nabi-nabi doi loolukoo tubomo koidan.

⁹Herodes bantile, “Yaku lapamo sumboliiyo komian mopatele Yohanes oluno. Bai namian nia, indee kona tutuuwan Yana? Daano badaang komo lapamo yaku lengele tentang Yana.” Maka Herodes kakaate sulano nakitayo Yesus.

¹⁰Yesus narasul-rasul abalimo tukon salitaikene doi Yesus sasaibino yanila mo lapamo kubaiyo. Yesus tobiyo yanila, maka ampakon polaing-laing yanila basusuunganggon doi kota Betsaida.

¹¹Bai salataa komian toiyo tentang do langgedoo, yanila lolaingemo Yesus. Yana talimayo yanila, maka basilingan doi yanila tentang bulaando ko Mian Bisa nabapamarentaan buno Tomundo. Tukon Yana koidan aline komian moseselon doi antara yanila.

¹²Salataa kooloyo mangatambuuno sopok, domo songulodoo lua Yesus napololaing lubat doi Yana tukon bantile, “Tama, natampatia tambasiil. Tadukai Tama nasumboliiyo namian nia naampakon sulano yanila namoola moumbolii kinaan tukon tampat sambukonan doi kampung tukon doi desa-desa napololanikonan nia.”

¹³Bai Yesus timbiliyo, “Komuyu komo beena kaan.” Yesus napololaing-pololaing bantile, “Kami tongo daano lima koroti tukon lua koikan. Oilakai kami sio mai ampakon mongoli kinaan tuuk sasaibino komian nia?” (

¹⁴Daano uga-ugaate lima koloon komian mamalane idoo.) Yesus bantile doi Napololaing-pololaing, “Posumboliiyo na mian-mian nia naosulang meeng-meeng kotambuno, uga-ugaat lima kolono komian meeng kotambuno.”

¹⁵Yesus napololaing-pololaingoo kubaiyo oilamo Yesus nabinantil doi yanila.

¹⁶Maka Yesus alayo do rotidoo molima tukon do ikanoo molua, doibundu maka lelengea doi timbu tukon batalima kase doi Mian Bisa. Lapa doiya Yana bisi-bisiliyo do rotidoo tukon do ikanoo tukon limano maka beekene doi napololaing-pololaing sulano naobo-obosikene doi mianoo badaang.

¹⁷Yanila sasaibino kaan polong bobosul. Maka Yesus napololaing-pololaing pototongikene do kinaanoo labino kona kadaang songulo lua kobois.

¹⁸Daano kooloyo meeng, salataa Yesus daano mosambeang susuungo, kona pololaing-pololaing lubat doi Yana. Yesus sadaiyo doi yanila, “Manurut mian nabantilano, yaku nia indee?”

¹⁹ Yanila timbiliyo, “Daano komo bantile Yohanes Pasau Mian. Daano koidan komo bantile Elia, kobailon koidan bantile meeng konabi doi loolukoo mo tubomo koidan.”

²⁰ “Bai monurut komuyu susuumuyu, Yaku nia indee?” Yesus sadaiyo. Petrus timbiliyo, “Tama doiyamo ko Tomundo Pasalamat Mian Bisa mo janjikene.”

²¹Maka Yesus bantile doi napololaing-pololaing, “Inai pobantil-bantile do langgedoo doi indee komiano.”

²²Yesus bantile koidan, “Ko Manusia na Pau takainomo sio nabadaang kona penderitaan tukon linawan doi tua-tua tukon imam-imam kapalano, tukon guru-guru agama. Yana naikon inakate, bai doi oloyo kotoluno naikon tubo koidan.”

²³ Doibundu Yesus bantile doi sasaibino komian mo daano idoo, “Mian mo yase lolainge Yaku, sio natoliminggene kona kopontingan susuungo, tanggunge kona sempang samba-samba kooloyo; tukon banggadudul lainge Yaku.

²⁴ Sabab komian mo yase palataanggene kona tuboan, naikon kona tuboan lapus. Bai komian mo kurbaanggene kona tuboan tuuk Daku kopontingan, naikon salamat.

²⁵Oila kountungo doi memeeng komian kalu sasaibino nadunia nia teali nalangge, bai yana rusak tukon lapus kona tuboan?

²⁶Kalu komian mamaa akuiyo Yaku tukon Daku otunggul, Manusia na Pau koidan naikon mamaa momangakukene do mianoo salataa Yana nalubatan naikon tukon nakuasa, tukon Tama nakuasa maka malaekat-malaekat nakuasa mo moliyous!

²⁷Potoiyo: doi antara komuyu dimbaa daano komo aki naikon namate kalu akiyo naikon namokita ko Mian Bisa nabapamarentaan.”

²⁸ Uga-ugaat meeng kominggu kona lapaan Yesus naotunggulkanano do langge-langgedoo, Yana babayo Petrus, Yohanes tukon Yakobus doi meeng kobunggul bungkukono sulano nasambeang.

²⁹Daano Yesus mosambeang idoo, koduduso boliimo tukon kona pakean tealimo moute montootilang.

³⁰Sosinggoton lua komian, doiyamo Musa tukon Elia okitakene kobutongo tukon madialan laango doi surgaa. Yanila pobasilingonii tukon Yesus tentang namatean mo akimo namalumbit koidan naikon ampakenggenemo doi Yerusalem.

³¹

³²Doiya singgatoo Petrus tukon tula-tulano moolomo, bai sosinggoton bangun, tukon kitayo Yesus momontootilangan tukon do mianoo molua kokondong tukon Yana.

³³Salataa do mianoo molua otinggalemo Yesus, Petrus bantile doi Yesus, “Tama Guru, maamis tuuno kita naimbaa. Tadukai kami mokokondong tolu kosandung; komeeng tuuk Tuan, komeeng tuuk Musa, tukon komeeng koidan tuuk Elia.” (Petrus bantile buno doiya yana aki namangalatikene oila kona binantiloo.)

³⁴Daano Petrus mobasilingan, lubat komeeng kobunom tukon songgupiyo yanila, tobikon yanila matakut.

³⁵ Doibundu luwedoi bunomo tololongol kolalo mo bantile, “Naiyamo Daku Pau pinilih. Polengele Yana!”

³⁶Salataa tade do lalodoo, yanila kitayo Yesus baino susuungo idoo. Yesus napololaing-pololaing tongo aki nabiyok tentang sasaibinodoo, tukon aki napo bontiikene mau doi indee komiano oila komo lapamo yanila kitayo.

³⁷Modoakon kooloyo Yesus tukon tolu kona pololaing obulus doi bunggulo, tukon mian badaang lubat doi Yesus.

³⁸Meeng komala-malane doi mian badaangoo tangano nggeleamon, “Tama Guru, tulunge yaku kitayo daku pau — yana tolongo doiya daku pau!

³⁹Kalu doibiliisoo usokiyomo yana, yana nggeleamon tukon kobutongo tidol-tidolo polong kobabano babiyoi. Ibiliisoo banggadudul sakisaayo yana tukon aki nayase kokoliat doi yana.

⁴⁰Lapamo yaku kabiyo doi Tama napololaing-pololaing mosiikayo ibiliisoo, bai yanila aki nanggoolayo.”

⁴¹Yesus timbiliyo, “Bukan maen komuyu nia! Komuyu bisa-bisa mian mo aki namololoi tukon akimo namangangga! Sampe malumbito kondapodungolian tukon sabar doi komuyu? Babayo do paudoo doisumai!”

⁴²Daano do paudoo moampakon doi Yesus, do ibiliisoo tikakene yana tukon kubaiyo kobutongo tidol-tidol. Bai Yesus parentayo do ibiliisoo nabaliat tukon do paudoo tangalino. Maka do paudoo sinalakanggon doi tinano.

⁴³Sasaibino komian masainding mokitayo ko Mian Bisa nakuasa mo buno doiya kona babasalan. Singgatoo komian daano momasa-masainding mokitayo sasaibino Kona kinubai, Yesus bantile doi napololaing-pololaing,

⁴⁴“Popalatikanggene mono-monondok tukon inai potoliminggene Daku bantilan-bantilan nia: Manusia na Pau naikon sinalakanggon doi banggapi nakuasa.”

⁴⁵Bai doi Yesus napololaing-pololaingoo aki namangalatikene konabantilanoo. Do langgedoo linasiakanggon doi yanila sulano yanila naaki namangalatikene. Bai yanila matakut momansadaikene do langgedoo doi Yana.

⁴⁶ Doi antara Yesus napololaing-pololaing sumbot kopogagaiyan tentang indee komiano doi yanila komo babasal.

⁴⁷Yesus toiyo yanila napikilan, tobikon doiya Yana mangala meeng kopau mopoipoisik tukon sumboliiyo do paudoo nakokondong doi bibilo.

⁴⁸ Maka Yana bantile doi Napololaing-pololaing, “Mian mo talimayo napau nia sabab Yaku, koalatino talimayo Yaku. Tukon mian mo talimayo Yaku, talimayo Yana mo utuse Yaku. Sabab mian mo poipoisik doi antara komuyu, yanamo komo babasal!”

⁴⁹Yohanes bantile, “Tuan, kami kitayo komian mosiikayo kosetan mangatas Tuan sambuno, tukon kami pantane yana, sabab yana bolikon luwedoi kita.”

⁵⁰“Inai mopantane yana,” Yesus bantile doi Yohanes tukon napololaing-pololaing bailonggon, “sabab komian mo aki nalawane komuyu, koalatino ala doi komuyu.”

⁵¹Sambuno loolanimo kotempono Yesus nabiningkatan doi surgaa, Yana mangala kaputusan sulano naampakon doi Yerusalem.

⁵²Maka Yana mosumbolii mian moampakon loolukoniyo Yana. Do mian-mianoo mo sinumbolii ampakon, maka usok doi meeng kokampung doi Samaria sulano nasadiakene sasaibino kolangge doi Yesus.

⁵³Bai do mianoo doi kampungoo aki nayase talimayo Yesus, sabab tokita tuuno Yana daano moampakon doi Yerusalem.

⁵⁴ Maka doiya kosinggatoo Yesus napololaing-pololaing, doiyamo Yakobus tukon Yohanes toiyo tentang do langgedoo, yanila bantile, “Temeneno, oilakai Temeneno yase, kami mangkabi aung naobulus luwedoi sumai timbu sulano nasilakayo na mian-mian nia?”

⁵⁵Yesus mbaleng, maka nggimoliiyo yanila.

⁵⁶Salataa lapa doiya yanila ampakon doi kampung bailon.

⁵⁷Daano Yesus tukon Napololaing-pololaing banggadudulkene kona ampakonan, daano komian bantile doi Yesus, “Tama, yaku yase lolainge Tama doi yayaando!”

⁵⁸Yesus timbiliyo, “Asu lobo daano kona buang, tukon kotomisi daano kona telea, bai Manusia na Pau akiyo kona tampat mooloan.”

⁵⁹Maka Yesus bantile doi mian bailon, “Laingemo Yaku.” Bai do mianoo bantile, “Tama, pataikene yaku kumule looluk sulano kukibule kotamanggu.”

⁶⁰Yesus timbiliyo, “Sodiikenemo komian mate nakibule komian mate susuungo. Bai ikoo, ampakono tukon popitoikene kobilita baikon ko Mian Bisa lapamo atambuune kona maparentaan.”

⁶¹ Daano koidan komeeng komian bailon mo bantile, “Tama, yaku yase loolainge Tama, bai pataikene yaku kumule looluk sulano kupalamisi.”

⁶²Yesus bantile doi mianoo, “Komian mo lapamo tambuune kona bapajekoan, bai mbalenge kotonggulungo, aki namoola teali Mian Bisa namian.”