Read Banggai KUAIKON 1 Bible Online

KUAIKON 1 - Banggai bible

KUAIKON 1

¹Naiya kitabpia koantoko bantil-bantilan Musa mopelenggene doi Israel miano salataa yanila daano doi padang lalomo doi Yordan Peako. Doiya peakoo tangabos taalikon doi tolopot ko Yordan Paisunobatango, loolani kokota Suf, napotangaiyan kokota Paran tukon Tofel kota-kotano, Laban, Haserot tukon Doi-Sahab. (

²Luwedoi sinai Bunggulo polong Kades-Barnea liise kolipu Edom bunggulo, koombokoniiyano songulo meeng kooloyo.)

³Doi tanggal komeengo bituwon kosongulono meeng doi taun sangkapolono salataa lapa yanila otinggale ko Mesir, Musa pelenggene doi bangsadoo sasaibino ko TEMENENO napinalentakon sulano napinolonggon doi yanila.

⁴ Doiya kona tealian salataa Musa akalayo ko Sihon; Amori miano natomundo, momaparentah doi kota Hesybon, tukon Og, Tomundo Basan, mo maparentah doi kota-kota Asytarot tukon Edrei.

⁵Jadi, taalikon doi tolopot ko Yordan doi lipu Moab, doiyamo Musa kotumbe-tumbe natalangkangganano ko TEMENENO nahukum-hukum tukon naparentah. Musa bantilan,

⁶“Doi tempo ndadaanoan doi Sinai Bunggulo, konda Mian Bisa bantile, ‘Komuyu malumbito tuuno kopo dungolan doi bunggul nia.

⁷Budodoiya polomboyo kopobasandungan tukon potauso doi Amori miano nalipu mobunggukon, tukon sasaibino kolipu mopokolanikon, doiyamo Yordan Pepelakono, lipu mo bunggul-bunggul tukon lipu seanono, lipu taalikon doi lalom tukon Tobun Tanga bibilo. Potauso modungoliyo kotano Kanaan tukon Libanon Bunggulo polong doi Efrat Paisunobatango mobabasal.

⁸Yaku, TEMENENO, lapamo dondiikene sasaibino dotanodoo doi mumbumbu Abraham, Ishak tukon Yakub tukon napokaturunan. Jadi potauso dungoliyo dotanodoo.’ ”

⁹Musa bantile doi bangsadoo, “Doi tempo ndadaanoan doi Sinai Bunggulo, yaku bantile doi komuyu: Daku katuayomo komuyu babalat tuuno. Aki namoola kulakukene susuunggu, sabab

¹⁰ko TEMENENO mu Mian Bisa kubaiyomo komuyu tosuungi konakadaang buno bituwon-bituwon pauno doi timbu.

¹¹Boliisi ko TEMENENO tumbumuyu na Mian Bisa nabanggadudul suungiyo kopo kadaang polong sololoon luunggon paku; tukon tealikene komuyu bangsa momonondok kona tuboan pokakana komo lapamo Yana dondiikene!

¹²Bai bulaando kona tealian kalu tongo susuunggu komo ulusiyo sasaibino kopo ulusan?

¹³Lilikemo luwedoi memeeng kobenseno, bubula komala-malane mo pandoi, mopangalamano tukon mo daano kona pangalatian, sulano kuoduduke yanila nakatuaiyo komuyu.

¹⁴Potalimayomo dousullo tukon sanaang.

¹⁵Sabab yaniladoo lapamo komuyu piliyo teali katua, bubula komian mo pandoi tukon mopangalamano yaku alayo tukon yaku oduduke sulano nakapalaiyo komuyu. Bubula komian tinealikon pakatuai doi nasololoonan komian, kobailon doi nasakatan komian, komo doi nalimakolonoan komian tukon doi nasonguloan komian. Yaku mongoduduk koidan katua-katua bailon tuuk mouluse kobense-bensenomuyu.

¹⁶Doi tempodoo yaku sumboliiyo yanila buno naiya: Pokiteese kopoliitonan-poliitonan mosumbot doi antara mubangsa. Beenamo kaputusan mo adil, mau doi palakala lalomo komian mopomeenggon bangsa tukon ikoo kai daunggene komian molulubaton mopodungoli komuyu.

¹⁷Komukaputusan inaikai nababalat kosembeleng; memeeng komian sio muadiliyo tukon kakabai mopokakana, aki naposasalakene indee miano. Inai momatakut doi indee komiano, sabab kokaputusan komuyu moalayo lubat luwedoi Mian Bisa. Kalu memeeng kopalakala todudul maaling kopopikikananano, pobabayo doiyaku, sulano kuputusiyo.

¹⁸Doi tempodoo koidan yaku beena otunggul-otunggul doi komuyu sasaibino kolangge kaliangano bailon mo sio polakukene.”

¹⁹“Maka pokokonoi tukon TEMENENO nda Mian Bisa naparentah, kita tinggalemo ko Sinai Bunggulo tukon ampakon loloiyo ko padang lalomo mo bebelak tukon minatakuton bosikene ko Amori miano nalipu mobunggukon. Doi tempo ndapolongan doi Kades-Barnea;

²⁰yaku bantile: Diabudodoo komuyu polongo doi Amori miano nalipu mobunggukon, TEMENENO nda Mian Bisa natano bineekon kita tukon tumbunggita na Mian Bisa. Pokitayo, doi salaamuyu butadoo bebelan tuuno. Tauso podungoliyo dolipudoo buno TEMENENO napinalentahkon. Inaikai posasaaki kai matakut.

²¹

²²Bai polubat doiyaku tukon bantile, ‘Tadukai nda mosumbolii bubula komian momatailukiyo kita sulano napo ondosuuke dolipudoo sulano napomoola bontiikene doi kita yaando kololoon mosio nda loloiyo tukon bulaando kokota-kota ndondoongo naikon kita molubotiiyo.’

²³Dokakabidoo yaku loingiyo, tobikon doiya yaku molilik songulolua komian, meeng komian luwedoi meeng kobenseno.

²⁴Yanila usukiyo dolipudoo mobunggukon popupuson ko Eskol Pepelakono, maka napo dadange.

²⁵Doibundu yanila abali doi kita mababa kayung saono yanila mo laate imbali tukon pelenggene baikon dolipudoo naikon TEMENENO mobeekene doi kita molumbang tuuno.

²⁶ Bai komuyu lawane ko TEMENENO mu Mian Bisa naparentah tukon aki poiyase usokiyo dotanodoo.

²⁷Komuyu bebe buno naiya, ‘TEMENENO misikitene kita. Maka yana babayo kita tobuat luwedoi Mesir sulano nasalakanggene kita doi Amoli miano limano sulano napoo akateyo kita.

²⁸Jadi oila konatotuuk kita mo ampakon dombalaa? Konda mian-mian sinumbolii dombalaa kabaiyo kita matakut tukon yanila pelenggene baikon dobangsadoo bukuan tuuno tukon lobian kona tambonganan luwedoi kita, tukon baikon yanila dungol doi kota-kota mobinetoon kopagalo dumbak doi timbu. Yanila kitayo kobangkapi mo babasal tuuno imbali!’

²⁹Bai yaku bantile: Inai matakutene doi mian-mianoila.

³⁰Ko TEMENENO mu Mian Bisa naikon loolainge komuyu tukon kakaate tuuk doi komuyu buno molapamo komuyu kitayo susuumuyu doi Mesir,

³¹ tukon doi padang lalomo. Komuyu kitayo bulaando ko TEMENENO mu Mian Bisa nababaano komuyu tukon salamat popupuson doi pololonoo polong doi tampat nia, pokakana komeeng kotama molapine konapau.

³² Bai maukai kulapamo bantile bunodoiya, komuyu akiyoon poiyase mangangga doi TEMENENO mu Mian Bisa,

³³moampakon doi salaamuyu sulano namounggoliikonggomuyu lipu basandungan. Yana tudoikene kololoon doi komuyu kalu popook tukon aung sudongo, kalu oloyo tukon bunom sudongo.”

³⁴ “TEMENENO lengele komu bebean maka teali nggimal. Yana batotopi,

³⁵‘Akiyokai komeeng komian motubo doi lounu molokis nia naikon momongusoki lipu mo molumbang yaku mo dondiikenemo doi tumbumuyu.

³⁶Tongo Kaleb, Yefune napau, naikon yana komo usokiyo, sabab yana tataap setia doiya-Ku. Doi Kaleb tukon natulunan naikon Yaku beekene kotano mo lapamo yana dadangemo.’

³⁷Komuyu mangaanikene nggimal koidan ko TEMENENO doiyaku tukon bantile, ‘Musa, ikoo aki naikon mumongusoki dotanodoo.

³⁸Bai ekeenggele komu potombonii noano, Yosua Nun napau. Yanamo naikon komo katuaiyo ko Israel molambase butadoo.’

³⁹Maka bantilo ko TEMENENO doi kita sasaibino, ‘Mupau-pau modaano mopoipoisik tuuno tuuk moposasalakene komo monondok luwedoi mokulokis, pau-pau moloingiyo komubantilan naikon mumusu-musu lambase, doiyanilamokai naikon daku bineekon butadoo, tukon yanila naikon komo dungoliyo.

⁴⁰Bai komuyu, poabalimo doi padang lalomo liise kololoon mobadombalaakon Akaba minangano.’

⁴¹Komuyu timbiliyo, ‘Musa kami baladosamo doi TEMENENO. Bai diabudodoo kami yase dombalaakon polobosi pokakana ko TEMENENO nda Mian Bisa naparentah.’ Maka suwe-suwele doi antara komuyu basa-basadia tuuk polobosi, tukon anggene baikon kolobosiano dolipudoo mobunggukon tongo soal mo mumuda.

⁴²Bai ko TEMENENO bantile doiyaku, ‘Inai mosodiikene yanila mopolobosi, sabab aki naikon Kuloolainge yanila, sulano konapoo musuh nalungguiyo yanila.’

⁴³Yaku pelenggene doi komuyu oila ko TEMENENO nabinatil, bai komuyu aki popaduliyo. Komuyu tumbokiiyo ko TEMENENO naparentah, tukon kopoo bangga-banggaalan maka potaus doi lipudoo mobunggukon.

⁴⁴Maka ko Amori miano modungoliyo dolipudoo mobunggukon yanila tobuat molawane komuyu. Yanila badaang tuuno koaito, pokakana koani tumbuno. Yanila lelenggene komuyu popupuson ko Horma, maka lungguiyo komuyu doi Edom lipuno mobunggukon.

⁴⁵Doibundu komuyu abali tukon uang doi TEMENENO manggabi tulung, bai yana aki naiyase momondongolii kai aki naiyase palatikanggene komuyu.”

⁴⁶“Lapa doiya kita dungol malumbit tuuno doi Kades.