Read Banggai KUAIKON 11 Bible Online

KUAIKON 11 - Banggai bible

KUAIKON 11

¹“Seseangekai ko TEMENENO Mian Bisa tukon loingiyokai sasaibino Konaparentah.

²Neneekekai diabudodoo oila kopoo tinoi tentang TEMENENO luwedoi mupangalaman. Komupau-pau kiyoon daano kona pangalaman doiya. Komuyumokai komo lapamo sakisiiyo ko TEMENENO mu Mian Bisa nababasalan, nabukuanan, nakakuasaan

³ tukon nalakukanano komo minasaindinggon-minasaindinggon. Komuyu susuumuyu lapamo kitayo oila kona kinubai motuuk doi tomundo Mesir tukon sasaibino kona tano.

⁴ Komuyu kitayo bulaando ko TEMENENO nalopuwano kabus ko Mesir suludaduno tukon sasaibino kona adalan tukon naroda polobosian. Yanila sasaibino molomos doi Tobun Gelagah doi tempo napo lolongganano komuyu.

⁵Komuyu toiyo oila ko TEMENENO nalinakukanggon doi komuyu doi padang lalomo moakiyoon popoloon naimbaa.

⁶ Komuyu koidan neneeke oila ko TEMENENO nakinubai motuuk doi Datan tukon Abiram, Eliab napau-pau luwedoi Ruben nabenseno. Doi salaamuyu sasaibino tabata kobuta maka nalemese yanila posinggat kona kaluargaa, sandung, sasaibino koata tukon napo iyayon piniala.

⁷Oode komuyukai tukon matamuyu susuumu lapamo kitayo sasaibino ko langge mominasaindinggon TEMENENO mo lakukene.”

⁸“Taatiyomo sasaibino kohukum yaku mo pelenggene doi komuyu oloyo nia, maka komuyu moola pintosiiyo kopaisu batango tukon usok doi lipu mo akimo namalumbit koidan komuyu dungoliyomo.

⁹Tukon komuyu naikon tubo malumbit doi lipu mo kaasa tukon mo molumbang, TEMENENO mo dondiikene doi tumbumuyu tukon doi yanila nakatulunan.

¹⁰Kolipu komuyu modungoliyo baikon aki nabuno Mesir butano, doi lipu podungolanoo looluk. Imbali komuyu sio pobukuan balimang tukon sio pomolombakon paisu doi tempo pobasakakonan kolibuang.

¹¹Bai kolipu naikon komuyu mousokiyo tongobos luwedoi bunggul tukon pepelakon; kotanono udan komo mbetokiiyo.

¹²Ko TEMENENO mu Mian Bisa pialayo dolipudoo tukon yana dagaiyo popupuson kotaun.

¹³ Jadi taatiyomo koparentah-parentah yaku mopelenggene doi komuyu oloyo nia; seseange ko TEMENENO mu Mian Bisa tukon bakaledakai doi yana tukon totubo konoamu.

¹⁴Kalu komuyu kubaiyo buno doiya, maka ko TEMENENO naikon lubatene koudan doi mutano bunggono doi tempono, nalapa komuyu bapupui, tukon doi tempo potambuunan mobasakakon. Maka komuyu naikon malaat badaang kogandum, anggur, tukon zaitun lisisono,

¹⁵tukon bulung motubo doi mubuta. Sasaibino kokinaan komuyu mopalaluuwo naikon tasadiamo tuuk doi komuyu.

¹⁶Inai poiyase dinodoonggon luwedoi TEMENENO tuuk sosubaiyo tukon mangangga doi ilah-ilah bailon.

¹⁷Kalu komuyu lumbaiyo do parentadoo, ko TEMENENO naikon nggimoliiyo doi komuyu, yana aki naikon nalubatene koudan; komu tano teali motuul tuuno sampe kopoo kolibuang sinakakon akiyo kohasilo. Maka doi tempo mo mosobit komuyu mate doi buta momolumbang TEMENENO mo beekene doi komuyu.

¹⁸ Neneekekai tukon palahatikanggene do parenta-parentadoo. Boboikene doi limamu tukon konoikene doi paasomu sulano naninonook.

¹⁹Otunggulikenekai doi mupau-pau. Bisalakenemo doi bonua lalomo tukon doi tonggulung, doi tempo tadean tukon doi tempo balimangan.

²⁰Tulisemokai doi mubonua tataapono posokolo tukon doi mutataapon mo babasal.

²¹Maka komuyu tukon mupau-pau naikon tubo malumbit doi tano TEMENENO mu Mian Bisa mo dondiikenemo doi tumbumuyu. Kalu akiyoon nakiamat, maka komuyu daanoon modungol doi tanodoo.

²²Taatiyokai tukon setia sasaibino kohukum yaku mo pelenggene doi komuyu: Seseange ko TEMENENO mu Mian Bisa, lakukenekai sasaibino komo pinalentahkon doi komuyu, tukon siokai potataap setia doi yana.

²³Maka ko TEMENENO naikon siikayo sasaibino dobangsadoo luwedoi salaamu, komuyu naikon dungoliyo kobangsa-bangsa mo lobian babasal tukon bukuan doi komuyu natano.

²⁴ Sasamba kowilayah komuyu mo dadange naikon teali komuyu kotumbuno. Kona wilayah tokita totibalat moloas luwedoi padang lalomo doi lalom polong doi Libanon Bunggul-bunggulo taikon doi lembet; tukon luwedoi Efrat Paisunobatango taikon doi tolopot polong doi Tobun Tanga doi talise.

²⁵Posaapon doi lipudoo ko TEMENENO mu Mian Bisa naikon tealikene mian-mian mo matakutene doi komuyu buno najinanjikon, tobikon doiya akiyo komeeng komiankai mo moola semba-sembange komuyu.

²⁶Komuyu moola lilike, doi oloyo nia antara balakaat tukon katula.

²⁷Komuyu naikon binalakaati kalu taat doi TEMENENO mu Mian Bisa naparentah-parentah mo oloyo nia yaku pelenggene doi komuyu.

²⁸Bai komuyu naikon katulaon kalu aki potaat do TEMENENO mu Mian Bisa naparentah-parentah, baikai tongo komuyu abali sosubaiyo ko ilah-ilah bailon mo aki pobiasa sosubaiyo.

²⁹ Salataa lapa ko TEMENENO mu Mian Bisa babayo komuyu usok doi lipu naikon komuyu mo dungoliyo, dobalakaatoo sio pobantile luwedoi Gerizim Bunggulo tukon dokatuladoo luwedoi Ebal Bunggulo. (

³⁰Loluakon dobunggulo tangabos taikon doi talise ko Yordan Paisunobatango doi Kanaan miano nalipu kinuasai mo dungol doi Yordan Pepelako, sasalaane ko talise aki namododoon luwedoi kayung-kayung tampat sambeangan doi Mole loolani kokota Gilgal.)

³¹Aki namalumbit koidan komuyu pintosiiyomo ko Yordan Paisunobatango tukon dungoliyomo ko TEMENENO mu Mian Bisa nabuta bineekon doi komuyu. Salataa lapa komuyu lambase butadoo tukon dungol idoo,

³²komuyu sio potaatiyo sasaibino ko hukum yaku mo pelenggene doi komuyu oloyo nia.”