Read Banggai KUAIKON 12 Bible Online

KUAIKON 12 - Banggai bible

KUAIKON 12

¹“Naiyamo kohukum-hukum mo sio potaatiyo sampe pomatekon doi tano TEMENENO mo beekene doi komuyu, tumbumuyu na Mian Bisa.

²Salataa lapa usok doi lipudoo komuyu sio pomanase kolipu-lipu sosubaan doi bunggul-bunggul mo tatandak bunggono, doi bunggul-bunggul, tukon doi kayung-kayung momasalimbumbung suukano, bangsa mo dungol idoo nalipu sosubaiyano konapo temeneno-temeneno.

³ Lubangemo konapo balabaan-balabaan tukon manasemo kona sudong-sudong batu yanila mo anggene kalamaton. Suayokai ko Asyela lambang-lambango tukon pomanasemo konapo pilogot timba-timbalango, sampe temeneno-temenenodoo akimo naikon nasinosubai koidan doi lipu-lipudoo.

⁴Doi tempo pososubaiyano ko TEMENENO mu Mian Bisa inai molo-loingi domianoo nakokubai nasosubaiyano konapo temeneno-temeneno.

⁵Luwedoi posaapon ko Israel miano benseno nalipu kinuasai, ko TEMENENO mu Mian Bisa naikon molilik meeng kolipu sulano konda bangsa moola lubat doi salaano tukon sosubaiyo Yana.

⁶Doi lipudookai sio pobabayo kopo sosubakon-sosubakon mosinua tukon sosubakon-sosubakon bailon. Sosubakon-sosubakon pebeal muniat, sosubakon mumongiasan tukon saapi napau tukon mbembe mu domba mo sinuung tumbe.

⁷Idoo koidan, doi TEMENENO mu Mian Bisa salaano, komuyu polaing-laing tukon mukaluargaa sio pokaan tukon laba-laba luwedoi polimang-limang moanomo kohasilo sabab TEMENENO mu Mian Bisa balakaatiomo.

⁸Kalu laatemo kotempono, komuyu inaimo koidan pomokubai lenggang buno diabudodoo. Polong budodoiya komuyu daanoon mobakaleda loingiyo kopo mongiasan,

⁹sabab akiyoon pousok doi lipu TEMENENO mu Mian Bisa mo beekene doi komuyu, lipu pomoolaan manataap tukon aman.

¹⁰Salataa lapa komuyu pintosiiyo ko Yordan Paisunobatango, ko TEMENENO mu Mian Bisa naikon tulunge komuyu mo osulongiiyo tukon dungoliyo dotanodoo doi paisu batangodoo sembeleng. Yana naikon dagaiyo komuyu luwedoi pomusu, tukon komuyu naikon tubo monondok tukon sanaang.

¹¹Doi bundu ko TEMENENO mu Mian Bisa naikon molilik meeng kolipu sulano idoo pososubaiyo yana. Idoomokai kopoo tausan momababa sasaibino komo lapamo yaku maparentahkene, doiyamo sosubakon mosinua tukon sosubakon-sosubakon bailon, meeng kososubakon moinobos songulo tukon sosubakon motangalaas komuyu mo dondiikene doi TEMENENO.

¹²Polaba-labakai doi TEMENENO mu Mian Bisa salaano, polaing-laing tukon sasaibino komu pau-pau, muata-ata tukon Lewi mia-miano modungol doi mukota-kota, sabab ko Lewi miano aki namalaat tano obos doi mulipu.

¹³Aki namoola pososubakene kopoo sosubakon doi sabalangan kolipu komuyu mo lilike susuumu,

¹⁴bai tongo doi lipu TEMENENO mo piliyomo. Idoomo tolong kopoo mososubakonan sosubakon mosinua tukon lakukene kolangge bailon yaku mo parentahkene doi komuyu.

¹⁵Bai komuyu bebas sulano mokolot poiyayon piniala tukon kaane kosailo doiyaandomo tolong kopoo dungolan. Komuyu moola kaane oila sasaibino ko TEMENENO nabineekon doi komuyu. Sasamba komian, mau mo bilisii maukai mo lokis, moola pokaane dosailoo, buno pokakana ko kijang kai donga sailo.

¹⁶ Tongo sauno aki namoola kinaan, bai sio nakinundang dosaunodoo buno paisu.

¹⁷Doi lipu podungolan aki namoola pomakaan meeng kososubakon moinobos songulo luwedoi mugandum, muanggur, muzaitun lisisono, saapi kai mbembe mudomba mosinuung tumbeno, sosubakon pebeal muniat sosubakon mumongiasan kai sosubakon bailon.

¹⁸Komuyu tukon mupau-pau, polaing-laing tukon muata tukon Lewi mianoila mo dungol doi mukota, sio namakaan dososubakonoo doi TEMENENO mu Mian Bisa salaano, doi lipu TEMENENO mu Mian Bisa mo lilikemo. Sio polaba-laba doi tampatoo sabab domu limangoo.

¹⁹Sio podagaiyo ko Lewi miano namondopulian naaki nabaino yanila tamballais doi tano podinungolidoo.

²⁰Salataa lapa ko TEMENENO mu Mian Bisa kubaiyo bebelan dopoo tanodoo bunomo Naperjanjianoo, komuyu moola makaan sail pokokonoi konoamu nainiyas.

²¹Kalu ko TEMENENO mu Mian Bisa nalipu linilik todudul odoon doi lipudoo, komuyu moola mokolot meeng kosaapi, domba kai mbembe TEMENENO mo beekene doi komuyu, tukon kaane kosailo doi mulipu tukon pokokonoi konoamu nainiyas, pokakanamo komo lapamo yaku bantile doi komuyu.

²²Sasamba komian, mau mobilisii, maukai mo manggilit, moola namakaan dosailoo, buno komuyu moola makaan donga sailo kai kijang sailo.

²³ Bai kosail mo daano kosauno aki namoola kinaan, sabab koansaang daano doi sau lalomo, tukon komuyu aki namoola kaane konyawa polaing tukon sailo.

²⁴Kosauno aki namoola kinaan, bai sio nakinundang doi tano buno paisu.

²⁵Kalu komuyu taatio doparentahdoo, ko TEMENENO naikon sanaang, komuyu tukon pokaturunan naikon monondok.

²⁶Sasaibino kososuba tukon sosubakon mo lapamo komuyu paladandikene doi TEMENENO, sio pobabayo doi lipu TEMENENO molilike.

²⁷Sosubakon mosinua tukon sosubakon mokinaan kosailo sio nasinosubakon doi balabaanoo bunggono.

²⁸Pokiteese tukon monondok sasaibino komo lapamo yaku maparentahkene doi komuyu, maka sio polakukene komo monondok tukon mopokokonoi doi TEMENENO mu Mian Bisa, sampe komuyu tukon pokaturunan salamat tukon monondok polong sidutu-posidutukon.”

²⁹“Ko TEMENENO mu Mian Bisa naikon lopuwo kabus kobangsa-bangsa mo dungol doi tanodoo, sampe komuyu moola dudukiyo tukon dungoliyo.

³⁰Salataa lapa dobangsa-bangsadoo yana lopuwo kabus pobada-badagaikai naaki poloingiyo yanila mo sosubaiyo ko temeneno-temeneno bailon, sabab dokokubaidoo lubatene kobalaa.

³¹Dobangsa-bangsadoo nasosubaiyano konapo temeneno-temeneno, inaimo poloingikene doi pososubaiyano ko TEMENENO mu Mian Bisa, sabab konapo sosubaan tongo yanila lakukene kokokubai-kokubai mo manggilit TEMENENO mo mosikitene. Sabeakai konapo pau-pau susuungo yanila suayo doi balabaan bunggono teali sosubakon mo tuuk doi napo temeneno-temeneno.

³² Lakukenemo sasaibino daku pinalentahkon doi komuyu; aki namoola binolii.”