Read Banggai KUAIKON 13 Bible Online

KUAIKON 13 - Banggai bible

KUAIKON 13

¹Kalukai daano komeeng konabi kai meeng komian mo toiyo komonii alatino maka naperjanjikene komeeng kolobo mo hinelanggon kai mo minasaindinggon

²tukon maksud sulano pososubaiyo tukon anggayo doi temeneno-temeneno moaki napo tingoniiyo, maukai oila dona dinondiikono tutuu teali,

³inai mopopusinggon yana. Ko TEMENENO mu Mian Bisa pakeyo domianoo sulano nasobaiyo komuyu sulano nakitayo oilakai komuyu tutuu moseseange ko TEMENENO tukon tutuu kai aki.

⁴Komian mo buno doiya sio nahinukum mate, sabab yase babayo salah komuyu luwedoi loloon TEMENENO mu Mian Bisa napinarentahkon doi komuyu. Yana daanokai mian lokis sampe sumboliiyo komuyu motumbo-tumbokiiyo ko TEMENENO mu Mian Bisa mooluputene komuyu luwedoi Mesir, doi lipu poinataiyan. Jadi yana sio nainakate, sulano nainakiyonggon dokulokisanoo. Bai komuyu sio poloingiyo ko TEMENENO mu Mian Bisa tukon poodotiiyo; potaatiyo Yana tukon polakukene sasaibino Konaparentah. Posetiakai tukon pomangangga doi Yana.

⁶Kalukai daano koutusomu kai mupau mamalane kai boine, kai muboloki ikoo museange kai tulamu mupomanaanggonan tukon aki natinoi yana oluulio ikoo sulano musosubaiyo ko temeneno-temeneno bailon mo aki potingoniiyo tukon mo aki tumbumuyu natingoniiyo, temeneno-temeneno mo luwedoi bangsa-bangsa mo dungol loolani tukon mo odoon,

⁸inai polengele yana tukon inai mopataikene kobutomu napo oluuliyo. Inai koidan poseange kai pootuboiyo domianoo.

⁹Yana sio nasinakul batu pomatekon. Ikoomo komo sakule tumbe yana, maka natuundu sasaibino korayat. Mian mo salahdoo sio nainakate, sabab yana dedeenggene komuyu luwedoi po TEMENENO moosodiiyo kita luwedoi ndakinubaiyan ata doi Mesir.

¹¹Maka sasaibino kobangsa Israel naikon lengele tentang nainakatean domianoo tukon teali matakut, sampe akiyo komeeng komian mo mokubai dokulokisanoo koidan.

¹²Kalukai komuyu naikon dungol doi kota-kota TEMENENO mu Mian Bisa mo beekene doi komuyu, tantu tasabukon kobilita

¹³baikon bubula komian lokis luwedoi komuyu pobangsa lapamo babayo salah kokota tumbuno sulano nasosubaiyo ko temeneno-temeneno mo aki potingoniiyo.

¹⁴Kalukai tololongol kosalita-salita mo bunodoiya, ondosuukekai tukon mono-monondok. Kalu dokulokisanoo bisa-bisa mo tealimo,

¹⁵maka sasaibino dokotadoo tumbuno tukon naiyayon piniala sio nainakate. Dokotadoo sio naminanas kabus sasaibino.

¹⁶Sasaibino dokotadoo tumbuno nabuat sio napinototongikon tukon inatambun doi tana lapang, maka kokota tukon sasaibino konabuat sio nasinua teali sosubakon tuuk doi TEMENENO mu Mian Bisa. Salataa mosua kabus sasaibinodoo sio potinggale nateali kota lapono tukon aki namoola kinokondong koidan.

¹⁷Dolangge-langgedoo mo kinutuk aki namoola inabos tuuk komuyu susuumu, bai sio naminanas kabus. Maka ko TEMENENO nanggimalan naikon bolii tukon yana naikon tudoikene kona seang doi komuyu. Yana naikon monondok konoano doi komuyu tukon tealikene komuyu bangsa mo babasal buno komo lapamo yana dondiikene doi tumbumuyu,

¹⁸asal potaatiyo sasaibino kona parentah-parentah yaku mo pelenggene doi komuyu oloyo nia, tukon lakukene sasaibino kona mongiasan.