Read Banggai KUAIKON 14 Bible Online

KUAIKON 14 - Banggai bible

KUAIKON 14

¹ “Komuyu daanokai TEMENENO mu Mian Bisa namian. Jadi doi tempo posusakanano komian mo mate, inaimo popokolonio kobutomuyu kai daluse komubuuk taalikon doi paasomu buno bangsa-bangsa bailon nalinakukon.

² Komuyu daanokai TEMENENO mu Mian Bisa koona, luwedoi sasaibino ko bangsa doi butania bunggono, komuyukai ko TEMENENO naililik sulano nateali Namian.”

³“Inaimokai pokaane koiyayon TEMENENO mo pantanggene.

⁴Komuyu moola kaane naiyayon-iyayon nia: saapi, domba, mbembe,

⁵donga, domba mosolot, mbembe mosolot, kijang

⁶tukon sasaibino koiyayon mo tabata kolungguno tukon mo basaiyo kona kinaan lua luunggon.

⁷Aki namoola pokaane koiyayon moaki natabata kolungguno tukon mo aki nabasaiyo kona kinaan lua luunggon. Inai pokaane kounta, kelinci, kai marmot. Doiyayonoo pinatanggon sabab maukai nabasaiyo kona kinaan lua luunggon bai aki tabata kolungguno.

⁸Inai mokaane kobabung. Doiyayonoo pinatanggon, sabab maukai natabata kolungguno, yana aki nabasaiyo kona kinaan lua luunggon. Kosailo aki namoola kinaan, kobunuto aki namoola sininggil.

⁹Komuyu moola pokaane sasaibino koikan kaliangano mo daano kobolibito tukon daano koanano.

¹⁰Iyayon mo tubo doi paisu lalomo bai mo akiyo kobolibito tukon akiyo koanano doiya aki nakinaan, jadi aki namoola pokaane.

¹¹Komuyu moola kaane sasaibino kotomisi kaliangano mo aki napinatanggon.

¹²Bai daano kobubula kotomisi kaliangano mo aki namoola kinaan, doiyamo: tomisi rajawali, tomisi kolu, sasaibino koalai kaliangano, nazar, gagak, tomisi unta, camar, blekok tukon sasaibino kokolong kaliangano, undan, tomisi kasa, tukon oniki.

¹⁹Sasaibino koiyayon labuko mo daano kokapilo pinatanggon, jadi aki namoola kinaan.

²⁰Koiyayon mo daano kokapilo moaki napinatanggon moola nakinaan.

²¹ Koiyayon mo mate susuungo aki namoola pokaane, bai komian molubat mopodungoli komuyu moola nakaane, kai binalukon doi bangsa bailon. Komuyu daanokai mian mo inalaas tuuk doi TEMENENO mu Mian Bisa. Kodomba pauno kai mbembe pauno sailo aki namoola sinaang tukon tinano susuno paisuno bukolo.”

²² “Sasamba kotaun sio podaanekene komeeng koobos moinobos songulo luwedoi sasaibino komubuta hasilo.

²³Doi TEMENENO mu Mian Bisa salaano, doi lipu yana mo piliyomo teali lipu pobakaledaan komuyu sio pokaane dososubakonoo moinoboso songulo luwedoi gandum, anggur paisuno, zaitun lisisono tukon saapi napau tukon mbembe mudomba mosinuung tumbe. Polakukenemokai dolanggedoo sulano polong sidutu posidutukon potoiyo moodotiiyo ko TEMENENO mu Mian Bisa.

²⁴Kalu kolipu TEMENENO mu Mian Bisa mo piliyomo doiya todudul odoon luwedoi mubonua, sampe komutano hasilo moinoboso songulo aki nateali pokanggiyo idoo,

²⁵maka balukenemo kai domu tanodoo oboso, tukon kanggiyomokai kodoyno doi lipu TEMENENO mu Mian Bisa mo piliyomo.

²⁶Balukenemokai dodoydoo tuuk doi oilamo tolong komu iniyas — saapi kai mbembe domba, anggur paisuno kai suka mosopot — maka doi lipudoo, doi TEMENENO mu Mian Bisa salaano, komuyu tukon mukaluargaa sio nakaan posinggat tukon basana-sanaang.

²⁷Inai motongo batadikene tamballais ko Lewi miano mo dungol doi mukota-kota; neneekekai doi yaniladoo baikon moakiyo konapo buta susuungo.

²⁸Doi sasamba kotaun kotoluno napupusan, komuyu sio pobabayo komeeng koobos moinoboso songulo luwedoi mutano hasilo tukon pototongikene doi mukota-kota.

²⁹Dokinaanoo tuuk Lewi miano sabab yanila akiyo konapo buta, tukon doi mian molulubaton, pau tuboon tukon balu-balu mo tubo doi mukota-kota. Yanila moola lubat tukon moola namangala oilamo konapo pinalaluu. Kalu komuyu kubaiyo buno doiya, maka ko TEMENENO mu Mian Bisa naikon balakaatio sasaibino komu limang.”