Read Banggai KUAIKON 15 Bible Online

KUAIKON 15 - Banggai bible

KUAIKON 15

¹“Doi sasamba kotaun kopituno napupusan, komuyu sio podaanekene nainapusan kosamea.

²Buno naiya kokubaiyano. Sasamba ko Israel miano mo binggotiyo kotulano doy, sio naakiyenggene dosameadoo, sabab mololoi TEMENENO nakaputusan susuungo dosameadoo lapamo inakiyonggon, jadi akimo namoola sininga koidan.

³Komuyu moola singayo kodoy komuyu mo binggotiikene doi mian molulubaton, bai aki namoola komuyu singayo koidan dodoydoo komuyu mobinggotiikene doi mian mopomeenggon bangsa ikoo.

⁴Ko TEMENENO mu Mian Bisa naikon balakaatio doi tanodoo yana mo beekene doi komuyu. Maka domianoo mupolipuiyan akiyo komeeng komian naikon komo talalais,

⁵asal potaat doi TEMENENO mu Mian Bisa, tukon monondok kopoo lakukanano sasaibino koparentah yaku mo beekonggonmuyu doi oloyo nia.

⁶Ko TEMENENO mu Mian Bisa naikon balakaatio komuyu sabab doiya pokokonoi tukon kona dandi. Komuyu binggotiyo doy doi badaang kobangsa, bai komuyukai aki pobabinggat, komuyu naikon kuasaiyo badaang kobangsa, bai yanila aki nakuasaiyo komuyu.

⁷ Kalukai komuyu dungolo doi tanodoo TEMENENO mu Mian Bisa mo lapamo beekene komuyu, maka kalu daano komeeng kokota mo talaat komian mupolipuiyan mo talalais, inaikai motongo ikoo ulusiyo kobutomu susuumu tukon aki mutulungiyo yana.

⁸Bai kona tutuuwan, sio potomboniiyo yanila tukon pobeenamokai oilamo tolong konapo pinalaluu.

⁹Inai mokabalatan mobinggotiiyo langge doi yana tukon alasan baikon kotaun bangakiyonggonan samea loolanimo. Inai napataikene dopikilanoo molokis nausok doi noamu lalomo. Kalu aki poiyase binggotiyo, domianoo naikon masadai doi TEMENENO sulano nakalaakene komuyu, maka komuyu naikon totong mosalah.

¹⁰Beenamo doi yana tukon noa sanaang tukon moloyos, tukon buno doiya ko TEMENENO mu Mian Bisa naikon balakaatio sasaibino komu limang.

¹¹ Doi Israel miano lalomo sidutu daano kobubula komian mo talalais tukon akiyo kona lobo. Tobikon doiya yaku pailukonggomuyu sulano namonondok konoamuyu doi yanila.”

¹² “Kalukai meeng komian mala-malane kai moluko moluwedoi mubangsa balukene kobutongo teali muata, yana sio nabalimang doikoo noom kotaun konakalumbit. Doi taun kopituno lalomo yana sio nasinodiikono.

¹³Doatadoo mo pinataikono mule aki namoola tongo taus tukon aki nda beena langge.

¹⁴Beenamo doi yana mbembe, domba, gandum tukon noa sanaang sabab doiyamo ko TEMENENO nabineekon doi komuyu.

¹⁵Poneneekekai komuyu baikon looluk ata doi Mesir maka ko TEMENENO mu Mian Bisa tobuatenggene komuyu, doiyamo kosababpo tobikon kubeekonggonmuyu naparentah nia.

¹⁶Bai kalu doatadoo aki naiyase taus sabab seseange komuyu tukon mukaluargaa tukon sanaang mopodungoli komuyu,

¹⁷babayomo yana doi mubonua tataapono tukon tadukekai kotolingaino, maka yana naikon tealimo muata pomatekon. Bunomo doiya koidan komu kubaiyano komuata boine.

¹⁸Kalu komuyu pataikenemo mule komeeng koata, inai momanasal, sabab nomo kotaun kona balimangan doi komuyu tukon kalu tinambo pokakanamo komeeng kopeleleani natambo doi nabalimanganoo lalomo. Lakukenemokai doparentahdoo, maka ko TEMENENO mu Mian Bisa naikon balakaatio sasaibino komu limang.”

¹⁹ “Saapi napau tukon mbembe domba langgilo mo sinuung tumbe sio nasinosubakon doi TEMENENO mu Mian Bisa. Dosaapidoo aki namoola kinubai patandan roda tukon dodombadoo aki namoola dinalus kobullono.

²⁰Samba kotaun komuyu meeng kokalualgaa sio pokaane kosailo doi salaano TEMENENO mu Mian Bisa, doi tampat TEMENENO nalipu pinili.

²¹Bai kalu doiyayonoo seselon buno pelong kai piit kai babalat konasesel bailon, aki namoola pososubakene doi TEMENENO mu Mian Bisa.

²²Sasamba komian mau mo bilisii maukai mo manggilit, moola pomakaan doi bonua, buno pokaanano ko kijang kai donga sailo.

²³ Kosauno aki namoola kinaan, bai sio nakinundang doi buta buno paisu.”