Read Banggai KUAIKON 16 Bible Online

KUAIKON 16 - Banggai bible

KUAIKON 16

¹ “Polamekenemo ko Paskah doi bituwon Abib lalomo tuuk odotiiyano ko TEMENENO mu Mian Bisa, sabab doi bituwonoo lalomo, doi tempo popook, yana tobuatene komuyu luwedoi Mesir.

²Tausokai doi tampat TEMENENO mo lilikemo sulano pomokolot meeng kombembe domba kai musaapi teali sosubakon Paskah tuuk odotiiyano ko TEMENENO mu Mian Bisa.

³Sosubakon Paskahdoo sio nakinaan tukon roti mo akiyo koragino. Pitu kooloyo kona kalumbit komuyu sio pomakaan roti mo akiyo koragino, buno doi tempo potinggalano kotano Mesir tukon tongosinggaang. Kaanemo dorotidoo, roti mo sinombuikon roti sakisaawan, sulano napolong mupomatekon komuyu neneeke naikon kooloyo potinggalano ko Mesir, lipu posakisaawan.

⁴Pitu kooloyo kona kalumbit doi posaapon komulipu akiyo komeeng komiankai momoola mangabos ragi doi nabonua. Koiyayon sailo mo kinolot doi popookoo tumbe sio nakinaan kabus doi popookoo koidan.

⁵Koiyayon piniala tuuk Paskah nalinamekonan sio nakinolot doi tampat TEMENENO mu Mian Bisa molilikemo, tukon aki namoola doi lipu bailon doi posaapon kolipu mo bineekono doi komuyu. Dolanggedoo sio polakukene doi tempo nasosoopan kooloyo, buno doi tempo potinggalano kotano Mesir.

⁷Koluayomo dosailoo tukon kaanemokai doi tampat TEMENENO mu Mian Bisa molilikemo, maka mulemo doi mubonua dodoa soono.

⁸Noom kooloyo koidan kona kalumbit doibundu komuyu sio pomakaan roti mo akiyo koragino. Doi oloyo kopituno komuyu sio popototongi tukon sosubaiyo ko TEMENENO. Inaimo balimang doi oloyodoo.”

⁹ “Aitemo pitu kominggu tambuun luwedoi oloyo tumbeno pomapadakan gandum

¹⁰maka polamekenemokai Kolamean Bapadakan tuuk odotiiyano ko TEMENENO mu Mian Bisa. Babayomokai doi oloyodoo komu sosubakon mo biasa doi yana pokokonoi kona badaangan korejekii molapamo yana beekene doi komuyu.

¹¹Doi TEMENENO mu Mian Bisa salaano, doi lipu yana mo lilikemo, komuyu sio polaba-laba polaing-laing tukon mupau-pau, muata-ata tukon Lewi miano, mian lulubaton, pau tuboon tukon sasaibino kobalu mo dungol doi mukota-kota.

¹²Taatio sasaibino kona parentah tukon setia, tukon inai motoliminggene baikon loolukoo mau komuyu ata doi Mesir.”

¹³ “Salataa lapa sasaibino komu gandum sinabit tukon sasaibino komu anggur saono lapa piniis, komuyu sio polamekene ko Lamean doi Sandung moinalatoi Loon pitu kooloyo kona kalumbit.

¹⁴Pobalasanaango polaing komu pau-pau, muata-ata, Lewi miano, mian lulubaton, pau tuboon tukon sasaibino kobalu modungol doi mukota-kota.

¹⁵Pitu kooloyo kona kalumbit sio polamekene dolameanoo tuuk moodotiiyo ko TEMENENO mu Mian Bisa doi tampat TEMENENO mo lilikemo. Polabakai, sabab ko TEMENENO mu Mian Bisa lapamo balakaatio komu tano hasilo tukon mubalimangan.

¹⁶Sasaibino ko Israel miano mala-malaneno sio nalubat sosubaiyo ko TEMENENO mu Mian Bisa doi tampat yana molilike toluluunggon meeng kotaun, doiyamo Oloyo Babasal Paskah, doi Lamean Bapadakan, tukon Lamean doi Sandung moinalatoi Loon. Sasamba komian sio namakanggi sosubakon

¹⁷mololoi kona ngginoolakon, pokokonoi tukon kona badaangan konarejeki TEMENENO mu Mian Bisa mo beekene doi yana.”

¹⁸“Doi sasamba kokota TEMENENO mu Mian Bisa mo beekene doi komuyu, sio pomongoduduk hakim-hakim tukon sambu-sambu bailon sulano napoulusiyo korayat tukon adil.

¹⁹ Doi mangalaan kaputusan lalomo, yanila aki namoola mokubai kaputusan mo tongo napo mongiasan ala doi sembeleng. Yanila aki namoola koidan matalima sogokan, sabab doposogokoo tealikene piit komian, tukon koidan komian mo pandoi tukon momoloyos konoano, teali namangala kaputusan mo aki naadil.

²⁰Komuyu sio posidutu adil, sulano pomoola tataap tukon tubo monondok doi tano TEMENENO mu Mian Bisa molapamo beekonggonmuyu.

²¹ Kalu komuyu mokubai balabaan tuuk doi TEMENENO mu Mian Bisa, inai moabese kopilogot Asyera kayungo timbalango doi sembelengo,

²² tukon inai momobusanggon kayung teali uuno tuuk pososubaiyano kopilogot, sabab ko TEMENENO mu Mian Bisa mosikitene dokokubaidoo.