Read Banggai KUAIKON 17 Bible Online

KUAIKON 17 - Banggai bible

KUAIKON 17

¹Inai mososubakene kosaapi kai domba moseselon doi TEMENENO mu Mian Bisa, sabab yana mosikitene.

²Kalukai komuyu lengele baikon daano doi meeng komu kota komian momokubai lalim doi TEMENENO mu Mian Bisa sabab lumbaiyomo koperjanjian

³ tukon naparentah maka nasosubah tukon mangangga doi temeneno-temeneno bailon kai doi oloyo, bituwon kai bituwon-bituwon pauno,

⁴maka sio poondosuuke tukon tutuu. Kalukai dokulokisanoo bisa-bisa tealimo doi Israel,

⁵komian mo salah sio nabinaba doi kota tonggulungo maka nasinokuli batu pomatekon.

⁶ Bai yana tongo moola inukum mate kalu daano kolua komian kosakisii kai lobian; kalu tongo meeng komian aki namoola inukum mate kalu tongo luwedoi meeng komian mobasakisii nakatalangan.

⁷ Sasaibino kosakisii komo sakule batu tumbe doi mianoo, doi bundu makanasodo tuundu sasaibino korayat namasakul. Tukon dokokubaidoo mo buno doiya komuyu moola atasio dokulokisanoo.

⁸Kalukai daano kopalakala mo akiyoon namoola hakim-hakim doi tampatoo putusiyo sabab sulito tuuno, umpamano palakala mangakatean mo sinangajai kai aki nasinangajai, ponggimakonan tentang paumeeng nabuat kai butongo mo pinokoloni, komuyu sio potaus doi lipu TEMENENO mu Mian Bisa mo lilikemo.

⁹Mangadukenemo domu palakaladoo doi imam-imam Lewi tukon doi hakim mo daano balimang maka sodiiyomo yanila naputusiyo.

¹⁰Yanilamokai komo beena kaputusan, tukon komuyu sio polakukene tukon tutuu oila komo yanila bantile doi komuyu.

¹¹Talimayomo konapo kaputusan tukon laksanakanggene oila konapo tinatapkanggon polong doi langge mo poipoisik.

¹²Indeemo komo barani tumbokiiyo kohakim kai imam mo daano balimang, sio nainukum mate; tukon buno doiya komuyu atasio dokulokisanoo doi Israel.

¹³Sasaibino komian naikon lengele tentang dokadadianoo tukon teali mataku, tobikon akiyo koidan komo barani kubaiyo buno doiya.”

¹⁴ “Kalukai kobuta TEMENENO mu Mian Bisa mo beekene doi komuyu tealimo komuyu, tukon komuyu dungolo idoo, banggokai komuyu yase mongoduduk meeng kotomundo buno bangsa-bangsa mo dungol potikunggon komuyu.

¹⁵Pokiteese mono-monondok tuuno sulano komian komuyu mo oduduke teali potomundo doiyakai mian TEMENENO mu Mian Bisa komo lilike. Yana sio meeng komian moluwedoi mubangsa susuumu inai mooduke komeeng komian lubat teali mutomundo.

¹⁶ Kotomundo aki namoola motooli badaang koadalan tuuk nasuludadu tukon aki namoola sumboliiyo nabangsa nia abali doi Mesir sulano namongoli adalan, sabab ko TEMENENO lapamo bantile baikon kona mian aki namoola abali doi lipudoo.

¹⁷ Kotomundo aki namoola badaang kona boloki, sulano yana naaki natotonggulunge ko TEMENENO. Yana koidan aki namoola pakeyoniiyo kobutongo tukon perak kai mosoni.

¹⁸Kalu meeng komian tinealikon tomundo, yana sio nabinee meeng kobuku mototulis ko TEMENENO Nahukum-hukum mosinalin luwedoi buku asli imam-imam Lewi moabese.

¹⁹Dobukudoo sio nasidutu daano doi yana, tukon polong pomatekon yana sio nabasayo sulano natoiyo moodotiiyo kona TEMENENO tukon setia motaatiyo sasaibino koparentah mo totulis doi lalomodoo.

²⁰Kalu yana basayomo tukon pangalatian motutuu, yana aki naikon naanggene kobutongo lobian monondok luwedoi mian badaang mopomeenggon bangsa tukon yana, tukon aki naikon naliisiyo ko TEMENENO naparentah tukon mau nabulaando kona kokubai. Maka yana tukon nakatulunan naikon parentayo konabangsa polong sidutu-posidutukon.”