Read Banggai KUAIKON 18 Bible Online

KUAIKON 18 - Banggai bible

KUAIKON 18

¹“Sasaibino ko Lewi miano nabenseno tinealikon imam, tobikon doiya aki namoola matalima buta obos doi Israel. Konapo tuboan tongo moini luwedoi sosubakon tukon sosubakon-sosubakon bailonggon mo bineekon doi TEMENENO.

² Yanila akiyo konapo buta buno bense-benseno bailon, sabab konapo obos pusaka tongo luwedoi TEMENENO naobos, pokakana komo lapamo TEMENENO dondiikene doi yanila.

³Kalukai memeeng komian mososubakon sosubakon saapi kai domba, maka doiyayonoo banano bangal, adeno tukon kombongo sio nabineekon doi imam-imam teali napo obos.

⁴Kogandum saono tumbe, anggur paisuno, zaitun lisisono tukon domba buluno, doiya koidan tuuk naobos.

⁵Luwedoi sasaibino ko Israel nabenseno, ko TEMENENO mu Mian Bisa lapamo lilike ko Lewi benseno teali imam tuuk sidutu-posidutukon.

⁶Kalukai meeng ko Lewi miano mo luwedoi yaandomo ko Israel kota-kotano, kalu yana lubat doi lipu TEMENENO mo lilikemo tukon yase modungol idoo,

⁷yana moola leleaniyo ko TEMENENO na Mian Bisa salaku imam pokakana ko Lewi miano bailon mo balimang doi lipudoo.

⁸Kona Kinaan tinalima sio napokakana kona kadaang koimam-imam bailon naobos; oilamo kona linaat luwedoi nakaluargaa, koidan tuuk doi yana.”

⁹“Kalukai komuyu usoko doi tano TEMENENO mu Mian Bisa mobeekenemo doi komuyu, inaikai mo loingiyo kobangsa-bangsa mo daano idoo nakulokisan.

¹⁰ Doi komuyu nokon inaikai daano komo sosubakene kona pau-pau teali sosubakon mosinua. Tukon inaikai nadaano komeeng komian mo teali tolotanggal, mo moumbolii palosan-palosan, mo pakeyo kobasupaan kai

¹¹ motoiyan, kai mokubai potaamian tukon mian mo mate malaikato.

¹²Doi mian mo lakukene dokokubai-kokubaidoo mo lokis ko TEMENENO mu Mian Bisa mosikitene doiya, tukon doiyamo komo mangaanikene dobangsa-bangsadoo siniika luwedoi salaamu.

¹³ Jadi siokai poanggayo ko TEMENENO mu Mian Bisa tukon totubo konoamuyu.”

¹⁴Doibundu Musa bantile, “Kobangsa-bangsa doi tano naikon komuyu mo dungoliyodoo yanila loingiyo kotolotanggal naotunggul tukon moumbolii palosan-palosan. Bai ko TEMENENO mu Mian Bisa aki napataikonggomuyu mokubaiyo dolanggedoo.

¹⁵ Baikai luwedoi ndabangsa susuunggita yana naikon mosumbolii bito-bito doi komuyu meeng konabi buno yaku nia tukon komuyu sio potaat doi yana.

¹⁶Doi oloyo popototongian doi Sinai Bunggulo, komuyu kabiyo sulano naakimo koidan pomolongol TEMENENO mu Mian Bisa mobasilingan tukon naakimo koidan pokitayo konadaanoan doi aung lalomo mokait-kait, sabab komuyu matakutene komatean.

¹⁷Tobikon doiya ko TEMENENO bantile doi yaku, ‘Yanila nakakabidoo pantas.

¹⁸Luwedoi napo bangsadoo susuungo yaku naikon mosumbolii bito-bito doi yanila doiyamo meeng konabi buno ikoo. Yaku naikon popitoikene doi yanila oila komo sio napo bantile; maka yana naikon pelenggene doi bangsadoo sasaibino daku pinalentahkon.

¹⁹ Yana naikon basilingan luwedoi Kosambunggu, tukon Yaku naikon hukume indeemo komiano mo aki naiyase mondongoliiyo yana.

²⁰Bai kalu meeng konabi barani pelenggene komeeng koteteba mo luwedoi Kosambunggu baikai aki Kusumboliiyo yana mokubai buno doiya, yana sio namate; bunomo lakon doiya samba konabi mo basilingan mo luwedoi ilah-ilah bailon sambuno sio namate.’

²¹Ugaate komuyu masadai doi noamuyu lalomo, ‘Bulaando komai toiyano oilakai komeeng donabi natetebadoo luwedoi TEMENENO kai aki?’

²²Kalu meeng konabi basilingan luwedoi TEMENENO sambuno, bai oila dona binantiloo aki nateali, maka dopatanggaloo aki naluwedoi TEMENENO. Donabidoo basilingan luwedoi sambuno susuungo tukon inai pomatakutene yana.”