Read Banggai KUAIKON 19 Bible Online

KUAIKON 19 - Banggai bible

KUAIKON 19

¹ “Salataa lapa ko TEMENENO mu Mian Bisa lopuwo kabus dobangsa-bangsadoo tukon kotanono bineekono doi komuyu, tukon kalu lapamo komuyu lambase konapo kota-kota tukon nabonua-bonua tukon dungolo idoo,

²dolipudoo siopo ebese teali tolu koobos, suwe-suwele tukon meeng kokota soopan mo mosobit linaat sulano sasamba komian mo mangakate moola nadampasene kobutongo indaa.

⁴Kalu daano komeeng komian mo aki nasangadaiyo yana akateomo komian bailon mo bolikon namusuh, yana moola obulenggene kobutongo doi meeng dokotadoo tukon moola natubo idoo.

⁵Andeno daano kolua komian mopolaing-laing usok doi bonggulung sulano napo matape kayung. Domo meengo daanoon momatape kayung, maka natongidus kona olowang matano doi tanggeno tukon kana kotulano sampe mate. Maka domo mangakatedoo tukon aki nasangadaiyo aki nasalah tukon moola obulen doi meeng kokota luwedoi kota soopanoo mo tolu sulano nasalamat. Kalu andeno tongo meeng kokota soopan uga-ugaate todudul mododoon kona tangabosan, tukon kalu domo matedoo pulino yase balese domangakateanoo pasti yana linaat.

⁷Tobikon doiya yaku sumboliiyo komuyu pomasadia tolu kokota.

⁸Kalukai ko TEMENENO mu Mian Bisa lapamo kabasale komulipu pokakana kona dinondiikono doi tumbumuyu, tukon posaapon dotanodoo bineekono doi komuyu,

⁹komuyu sio pomolilik tolu kokota soopan koidan. (Dolipudoo naikon bineekon doi komuyu kalu komuyu lakukene sasaibino kolobo yaku mo parentahkene doi komuyu oloyo nia, tukon kalu komuyu seseange ko TEMENENO mu Mian Bisa tukon tubo loloiyo konaotunggul.)

¹⁰Polakukenemo doiya sulano naaki pobaladosa sabab batadikene komian moakiyo konasalah nainakate doi tanodoo TEMENENO mu Mian Bisa mo beekenemo doi komuyu.”

¹¹Bai posasala kokaliangano kalu daano komeeng komian mo lobosio kona musuh tukon sangajaiyo tukon mosikitene maka naakateyo yana, maka nadampasene kobutongo doi meeng kokota soopan sulano namoola basoopon.

¹²Doi langgedoo lalomo sasaibino komo katuaiyo dokotadoo sio nauange domianoo maka nasalakanggene yana doi pulino sulano nabalese domangakateanoo, sulano yana moola inakate.

¹³Inai moseange doi yana. Oluputemo ko Israel miano luwedoi mangakateanoo sulano poaman.

¹⁴ “Kalukai komuyu polongo doi lipu TEMENENO mu Mian Bisa nabineekon doi komuyu, inaikai poaseke kotulamu natano kalalatano molapamo tinantukon doi loolukoo.”

¹⁵ “Kalu tongo meeng kosakisii akiyoon nainakui motalakanggene komeeng komian mo tinudu daano konasalah; doi nakidikan sio nadaanoon lua kosakisii komo pinalaluukon tuuk doi langgedoo.

¹⁶Kalu meeng komian yase otuwenge komian bailon tukon tujuiyo mo aki nabisa doi pangadilan, maka

¹⁷domo luailadoo sio napo ampakon doi lipudoo kaledaan mo lapamo TEMENENO tantukanggene sulano sasaibino koimam tukon hakim modaano balimang naadiliyo yanila.

¹⁸Sasaibino kohakim sio nasolidikiyo dopalakaladoo tukon mono-monondok, tukon kalu totoi domianoo bisa mobaloobukene kotula-tulano Israel miano,

¹⁹yana sio natanggunge kohukuman motinantukono. Tukon kalu buno doiya komuyu akiyenggenemo dokulokisanoo.

²⁰Saibino komian naikon lengele tentang dolanggedoo tukon teali matakut, sampe akiyono koidan komo mokubai kulokisan mo buno doiya.

²¹ Doi palakala-palakala mo buno doiya inai nadaano kopo seang. Kohukumano doiyamo: Ansaang sinoboli ansaang, mata sinoboli mata, ngolingo sinoboli ngolingo, limano sinoboli limano tukon aino sinoboli aino.”