Read Banggai KUAIKON 2 Bible Online

KUAIKON 2 - Banggai bible

KUAIKON 2

¹ Doibundu kita abali doi padang lalomo loloiyo kololoon modombalaakon doi Akaba minangano, pokakana ko TEMENENO napinalentahkon. Malumbit konda balausalaan doi lipu Edom bunggulo.

²Maka ko TEMENENO bantile doiyaku

³baikon malumbito konda balausalaan doi lipudoo. Jadi sio nda taus doi lembet.

⁴ Doibundu ko TEMENENO sumboliiyo yaku mobeena naotunggul-otunggul nia doi komuyu, ‘Akimo namalumbit koidan komuyu naikon usokiyomo kolipu Edom, utus-utusomu nalipu, Esau nakatulunan. Yanila naikon matakutene komuyu,

⁵bai komuyu aki pomoola lobosiyo yanila, sabab luwedoi yanila natano mau nasoisik aki naikon kubeekene doi komuyu, sabab kolipu Edom yaku beekenemo doi Esau nakatulunan.

⁶Komuyu moola mongoli kinaan tukon moininum luwedoi yanila.’

⁷Neneekekai bulaando ko TEMENENO mu Mian Bisa molapamo balakaatio komuyu doi sasaibino kopoo lobo kinubai. Yana pialayo komuyu doi polausalaan nia doi padang lalomo nia mobebelan. Kona loolaingano komuyu sangkapolono kotaun konakalumbit tukon beekene sasaibino kolangge komuyu mo palaluuwo.

⁸Doibundu kita ampakono banggadudul, tinggale kololoon mololoiyo kokota-kota Elat tukon Ezion-Geber modombalaakon Tobun Mate, maka lias doi tolopot tobun badombalaakon Padang Moab lalomo.

⁹ TEMENENO bantile doi yaku, ‘Moab miano, Lot nakatulunan, aki namoola ponggabute. Inaikai polobosiyo yanila. Kolipu Ar lapamo kubeekene doiyanila tukon luwedoi yanila nabuta maunasoisikai aki naikon Kubeekene doi komuyu.’ ” (

¹⁰Loolukoo kolipu Ar Enim miano komo dungoliyo. Kobutongoila kondondoongo pokakana ko Enak miano, tukon koidan buno mian mo babasal tuuno.

¹¹Buno Enak miano, yanila koidan sinombuikon Refaim miano, bai naikon Moab miano sombuikene yanila Enim miano.

¹²Looluk Hori miano dungol doi Edom, bai siniika tukon Esau nakatulunan komo akateyo kabus, tukon doi bundu modungoliyo konapoo tano; bunomo koidan ko bangsa Israel oloyo doibundu siikayo konamusuh-musuh luwedoi tanodoo ko TEMENENO nabineekon doiyanila.)

¹³“Doibundu kita pintosiiyo ko Zered Paisunobatango bunomo TEMENENO napinalentahkon doi kita.

¹⁴ Doiya konatealian tolukolonomo alu kotaun salataa lapa kita otinggale ko Kades-Barnea. Sasaibino kosuludadu mo tubo doi tempodoo matemo buno TEMENENO nabantilan.

¹⁵TEMENENO bangadudul lawane yanila polong doibundu yanila sasaibino mate kabus.

¹⁶Salataa lapa yanila mate sasaibino,

¹⁷TEMENENO bantile doi kita,

¹⁸‘Oloyo nia komuyu loloiyo ko Moab, lipuno, liise ko Ar lipuno.

¹⁹ Maka komuyu polong koolaniyomo ko Amon miano tano, Lot nakatulunan. Inaikai ponggabute kai polobosiyo yanila, sabab luwedoi buta molapamo kubeekene doiyanila, mau natongokai soisik akiyo naikon Daku bineekon doikumuyu.’ ” (

²⁰Dolipudoo totoi koidan salaku Lefaim nalipu, bangsa sambuno mo loolukoo dungol idoo; luwe Amon miano yanila sinombuikon Zamsumim miano.

²¹Buno Enak miano, yanila bobosolii kobutongo. Yanila bukuan tuuno, tukon badaang tuuno koaito. Bai ko TEMENENO akateyo kabus yanila, tobikon doiya ko Amon miano nalambase butadoo, maka dungolo idoo.

²²Bunomo doiya koidan ko TEMENENO nakubaiyano ko Edom miano, Esau nakatulunan, mo dungoliyo ko Edom lipuno bunggulo. TEMENENO akateyo kabus ko Holi miano tobikon ko Edom miano lambase butadoo tukon dungoliyomo, maka manataapo idoo polong diabudodoo.

²³Popupuson kobuta doi Tobun Tanga bibilo mian daango mo luwedoi Kleta komo dungoliyo. Yanila lapamo akateyo kabus ko Awi miano, yanilamo kobuta tumbuno tuuno, maka dungoliyo dolipudoo polong doi lalom popupuson kokota Gaza.)

²⁴“Salataa lapa kita liisiyo ko Moab lipuno, TEMENENO bantile doi kita, ‘Budodoiya potauso mopintosiiyo ko Arnon Paisunobatango. Yaku naikon salakanggene ko Sihon doi komuyu, tomundo Amori mo maparentah doi Hesybon, polaing-laing tukon nalipu. Lobosiomo yana, maka dungoliyomo konabuta.

²⁵Tambuun doi oloyo nia Yaku tealikene sasaibino kobangsa-bangsa matakutene komuyu. Samba komian naikon mbombokon matakut kalu lengelemo komuyu.’ ”

²⁶“Doibundu yaku mosumbolii bubula kobito-bito luwedoi padang lalomo Kedemot doi Tomundo Sihon luwedoi Hesybon sulano napelenggene kousul podamean nia:

²⁷‘Pataikanggami mai lolo doi Kutuan nalipu. Kami naikon ampakon banggadudul tukon aki mai lias luwedoi loloon babasal.

²⁸Kami naikon beale kokinaan kami mo kaane tukon paisu kami mo inume. Kami tolongo palaluu mololoi nalipu nia,

²⁹polong kami pintosiiyo ko Yordan Paisunobatango sulano mai usok doi lipu ko TEMENENO mai Mian Bisa mo beekene doi kami. Esau nakatulunan mo dungol doi Edom tukon Moab miano modungol doi Ar koidan lapamo pataikene kami mololoiyo konapoo lipu.’

³⁰Bai Tomundo Sihon aki napataikene kita mololoiyo donalipudoo. Ko TEMENENO mu Mian Bisa kubaiyo yana matikas konoano tukon batetel sulano nda moola lungguiyo yana. Konalipu daano kita modungoliyo polong budodoiya.

³¹Doibundu TEMENENO bantile doi yaku, ‘Tomundo Sihon tukon nalipu yaku salakanggenemo doi komuyu; alayomo tukon podungoliyomo dotanodoo.’

³²Maka lubato Sihon tukon sasaibino konasuludadu tuuk molobosiyo kita loolani kokota Yahas.

³³Bai ko TEMENENO nda Mian Bisa salakanggene yana doi kita, maka kita lungguiyo yana tukon napau-pau tukon sasaibino konasuludadu.

³⁴Doi tempodoo koidan kita lambase tukon manase sasamba kokota, tukon akateo sasaibino kotumbuno, mala-malane, moluko, tukon napau-pau. Akiyo komo binatadikon tubo.

³⁵Yanila naiyayon piniala kita alayo tukon kona kota-kota kita lambase.

³⁶Tukon TEMENENO nda Mian Bisa napotombonii, kita moola lambase sasaibino dokotadoo, tambuun luwedoi Aloel doi Alnon peako bunduno tukon kota doi peakoo tangano, polong doi Gilead lipuno. Akiyo kokota pagalo momoonggol doi kita.

³⁷Bai kita aki nda koolaniyo ko Amori miano nalipu kai Yabok Paisunobatango bibilo kai kota-kota doi lipu bunggukon kai lipu bailon TEMENENO nda Mian Bisa mopatanggene kita.”