Read Banggai KUAIKON 20 Bible Online

KUAIKON 20 - Banggai bible

KUAIKON 20

¹“Kalukai komuyu taus mopolobosi tukon mumusu-musu, inai momatakutene kalu komuyu kitayo kona poroda polobosiyan tukon konapo adalan mobadaang tukon konapo suludadu lobioniiyo kopo kadaang. Ko TEMENENO mu Mian Bisa mo olupute komuyu luwedoi Mesir, koidan naikon tulungiyo komuyu.

²Akiyoon poatambuune kopoopolobosian, komeeng komian sio naampakon doi salaamuyu maka nabantile buno naia,

³‘Utus-utus ndongoliiyo! Oloyo nia komuyu ampakono mo polobosi. Inai momatakut kai poipoisik konoamuyu kai nggabut kopoo pikilan.

⁴Ko TEMENENO naikon malaing tukon tulungiyo komuyu, tukon yana naikon beena manaangan doi komuyu.’

⁵Doi bundu sasaibino kosuludadu polobosi sio napelenggene nabantilan-bantilan nia doi komuyu, ‘Kai daano doi komuyu nokon komian mosodolakon nakekendenge konabonua, bai akiyoon nakubaiyo kona baselaan bonua boolu? Kalu daano, yana moola mule. Sabab kalu yana tangakate doi polobosiyan lalomo, komian bailon naikon dungoliyo konabonua.

⁶Kai daano doi komuyu nokon komo sodo nasakaiyo kona anggur asino tukon akiyoon natodan mopupuiyo kona anggur sao-saono? Kalu daano, yana moola mule. Sabab kalu yana tangakate doi polobosiyan lalomo, komian bailon naikon sanaanggene kona anggur paisuno.

⁷Kai daano doi komuyu nokon komian mo pobianggon tukon yase osowaan? Kalu daano yana moola namule. Sabab kalu yana tangakate doi polobosiyan lalomo, komian bailon naikon alayo dona bibianoo.’

⁸Sasaibino kosuludadu kapalano koidan sio nabantile naiya doi komuyu, ‘Kai daano doi komuyu nokon komo mbombokon tukon matakut? Kalu daano, yana moola mule, sulano naaki namangaanikene komian bailon nambeeng kona baranian.’

⁹Salataa lapa sasaibino kosuludadu kapalano basilingan doi suludadu, sio natinudo kopakatuai samba-samba kopasukan.

¹⁰Kalukai komuyu taus molobosiyo komeeng kokota, sadaiyo looluk dokotadoo tumbuno kalu yanila yase dame kai aki.

¹¹Kalu yanila bukayo kotataapon-tataapon babasal tukon sombamo doi komuyu, maka yanila saibino sio nateali muata tukon lakukene sasaibino kolimang mo tapakisaa tuuk doi komuyu.

¹²Bai kalu dokotadoo aki naiyase somba tukon tongo yase mopoolobosi, polubotiiyomo tukon polobosiyomo dokotadoo tumbuno.

¹³Doibundu, kalukai ko TEMENENO mu Mian Bisa moolakene polambase dokotadoo; sio poakateyo sasaibino kotumbuno mala-malaneno.

¹⁴Bai moola poalayo koboiboine, pau-pau, iyayon piniala tukon oilamo tolong komo daano doi kotadoo. Sasaibino kopoo musuh-musuh nabuat moola poalayo. Ko TEMENENO mu Mian Bisa salakanggene doiya doi komuyu.

¹⁵Bunomokai doiya kopoo lakukanano kokota-kota mo odoon luwedoi polipu dungolan.

¹⁶Bai kalu dokotadoo daano doi mulipu lalomo, TEMENENO mu Mian Bisa mo beekene doi komuyu, sasaibino kotumbuno sio nainakate.

¹⁷Buno ko TEMENENO mu Mian Bisa napinalentahkon, komuyu sio polopuwo kabus ko Het miano, Amori, Kanaan, Feris, Hewi, tukon Yebus.

¹⁸Akateomo yanila, sulano yanila aki nakubaiyo komuyu baladosa tukon otunggule komuyu mo sosubaiyo konapoo temeneno-temeneno sabab ko TEMENENO mu Mian Bisa mosikitene kokokubai-kokubai mo buno doiya.

¹⁹Kalukai komuyu lobosio komeeng kokota tukon lubotiio tuuk tempo mo malumbit, inaikai motapeo kokayung mosao-sao idoo. Pokaane kai kosao-saono, bai inai momanase kobatango, sabab kayung-kayungdoo batango bolikon mumusu.

²⁰Kokayung bata-batango bailon mo aki nasao moola potapeo sulano potealikene pagar bataanggonan polobosiyan sampe komuyu kuasaiyomo dokotadoo.”