Read Banggai KUAIKON 21 Bible Online

KUAIKON 21 - Banggai bible

KUAIKON 21

¹“Kalukai doi tano TEMENENO mu Mian Bisa mobeekene doi komuyu daano komian mo mate inakate doi naasi tukoon aki natotoi indee komo akateo,

²maka kopoo katua tukon pohakim sio nataus ukule kona kodoon luwedoi tampat dobajanoo napinososuunggonan doi memeeng kokota mo pokoolani.

³Maka sasaibino kokatua luwedoi kota mopokolani tuuno sio namolilik meeng kosaapi mongula mo akiyoon nabiasa pinake doi balimangan.

⁴Dosapidoo sio napoo babayo doi meeng kolipu mo loolani kopaisu batango mo aki namomooti tukon kotanono mo akiyoon nabiasa pinacol kai sinakai. Idoo yanila sio napoo lotoyo dosapidoo bulungo.

⁵Sasaibino koimam Lewi koidan sio nataus idoo, sabab sio napoo putusiyo sasamba kopalakala. Ko TEMENENO mu Mian Bisa lilikemo yanila sulano napo mangangga doi yana tukon nabantile kobalakaat mo luwedoi sambuno.

⁶Maka sasaibino kokatua luwedoi kota mo loolani tuuno sio nakumosiyo kolimanoila doi sapidoo bungguno

⁷tukon bantile, ‘Bolikon kami komo akateo domianoo, tukon kami aki mai toiyo indee komo lakukene.

⁸TEMENENO ampunio ko Israel mumian ikoo mo oluputene luwedoi Mesir. Ompunio kami tukon inai moanggene kami toiyo konainakatean komian mo akiyo konasalah.’

⁹Maka tukon lakukene oila ko TEMENENO nakinabi, aki poinaanggon toiyo domangakateanoo.”

¹⁰“Kalukai komuyu polobosi tukon ko TEMENENO mu Mian Bisa beena komuyu manaangan, maka pomataan boine doi polobosiyan,

¹¹kalu andeno doi yaniladoo daano komeeng koboine mo tambongan ikoo moiyase tukon ikoo yase tealikene boloki.

¹²Babayomo boinedoo doi mubonua. Idoo sio naguntinge konabuuk, poposiyo kolungguno,

¹³tukon basoboli pakean. Yana sio nadungol doi mubonua tukon mapake toik paloosan susaan luwedoi tamano-tinano namatean meeng kobituwon kona kalumbit. Kalu lapamo dosusaanoo ikoo moolamo osowaan tukon yana.

¹⁴Kalu oloyo doi bundu ikoo akimo muiyase yana koidan, ikoo moola musumboliiyo yana nataus tukon bebas. Aki namoola ikoo lakukene yana salaku ata kai ikoo balukene, sabab ikoo pakisaayo yana moponikai tukon ikoo.”

¹⁵“Umpamano meeng komian lua konaboloki, tukon looluakon dona bolokidoo suwe-suwele mosuung pau malaneno, bai pau mo sinuung tumbeno bolikon pau moluwedoi naboloki sineang.

¹⁶Kalu domianoo yase tantukene bulaando naikon kona obosano konabuat doi napau-pau, yana aki namoola ala doi nabolokidoo sineang pauno tukon beena doi paudoo obos mo teali pau langgongo naobos.

¹⁷Yana sio nabeena obos lualuunggon kolipato luwedoi nabuat doi napau malaneno langgongo, maukai dopaudoo bolikon pau mo luwedoi naboloki sineang. Paulanggongo nahaak sio tamano naakuiyo tukon doi paudoo sio nabinee buat mo teali nahaak mo pokokonoi kohukum.”

¹⁸“Umpamano daano kopau malaneno mo palalentel, tukon ngginggimolon tukon aki naiyse tulutiyo kotamano-tinano maukai napo hukumemo.

¹⁹Maka kotamano-tinano sio nababayo yana doi sasaibino kokatua-katua doi kotadoo, doi napoo lipu dungolan tukon sio napoo kabiyo sulano nainadili dopaudoo.

²⁰Yanila sio nabantile doi sasaibino dokotadoo, katua-katuano, ‘Komai pau nia palalentel, ngginggimolon tukon aki naiyase taat doi kami; yana tongo dadaate kodoy tukon banggisukakene.’

²¹Maka komalane mo badaang doi kotadoo sio nasakule batu dopaudoo sampe mate. Tukon kalu buno doiya komuyu atasio dokulokisanoo. Sasaibino ko Israel miano naikon lengele dokadadianoo kaliangano tukon teali matakut.”

²²“Kalukai meeng komian yana hinukum mate sabab meeng kokulo kisan, tukon kobajano tinude doi sudong,

²³ dobajanoo aki namoola binatadikon banggamodoa idoo, bai sio natinadino doi oloyonodoo. Dobajanoo mo tinude doi sudongoo lubatene ko TEMENENO nabalaa doi lipudoo. Jadi, potadinemo dobajanoo sulano naaki pokulokisanggene do tanodoo TEMENENO mu Mian Bisa mobeekene doi komuyu.