Read Banggai KUAIKON 22 Bible Online

KUAIKON 22 - Banggai bible

KUAIKON 22

¹ Kalukai daano komian mupolipuiyan nasapi kai domba mo tapa tukon komuyu kitayo doiyayonoo, inaikai mokadu-kadukon aki mutoiyo, bai mulekenemo doiyayonoo doi tumbuno.

²Kalu kotumbuno mododoon kona bonua, kai aki potoiyo indee kotumbuno, babayomokai looluk doiyayonoo doi mubonua. Kalukai lubat kotumbuno moumboliiyo, maka nasodo mubeekene doi yana.

³Kubaiyokai bunodoiya koidan kalu komuyu pososuunggene komeeng kokeledai, meeng kopatolo kopakean, kai oilano tolong komian mupolipuiyan nalangge.

⁴Kalukai daano komeeng komian mupolipuiyan nakeledai kai nasapi mo tolubang doi loloon, inaikai mokakaadukon aki mutoiyo; bai tulungiyo yana moekekendenge doiyayonoo koidan.

⁵Komoluko aki namoola bapake buno mala-malane tukon komalane aki namoola bapake buno moluko, sabab komian mo kubaiyo buno doiya TEMENENO mosikitene.

⁶Kalu komuyu malaat meeng kotomisi natelea doi kayung batango kai doi buta tukon dotomisidoo tinano daano mosoloupiyo konanggalau kai polaing-laing tukon napau-pau, inaikai molakoyo dotomisidoo tinano.

⁷Komuyu moola alayo dotomisidoo napau-pau, bai sodiikene kotinano nabenga, sulano potubo malumbit tukon tubo monondok.

⁸Kalukai komuyu mokokondong bonua, sio popagare potikunggon doi atono bibilo. Maka komuyu aki poinasalakon kalu daano komian mootuwong luwedoi atodoo maka namate.

⁹ Inaimo momasakakon lobo bailon doi anggur asino kasuali anggur batango. Kalu komuyu masakakon koidan, aki namoola pomangala doasidoo hasilo, mau naluwedoi anggur, maukai mo luwedoi mo sinakakon bailon.

¹⁰Inai mopopakeikene kosapi tukon keledai doi meeng koloda.

¹¹Inai mopakeo kopakean mokinubai luwedoi wol tukon lenan doi meeng kotonunan.

¹² Kubaiyokai komu pakean lenda-lendano doi sangkap kobunduno.”

¹³“Umpamano meeng komalane osowaan tukon meeng koboine, tukon doi bundu akimo naiyase koidan.

¹⁴Yana mokubai sosunoi mo kala sabab konaboloki baikon molusamo konamaa doi tempo nasodoan yanila osowaan.

¹⁵Doiya langgedoo boinedoo tamano-tinano sio namangala toik pangantin modaano kotanda sau mo okitakene baikon donapo paudoo akiyoon narusak konamaa doi tempo napoosowaananoo. Dotoikoo sio napo tudoikene doi sasaibino kokatua doi kotadoo doi pangadilan.

¹⁶Boinedoo tamano sio nabantile doi yanila, ‘Yaku lapamo salakanggene daku pau doi mian nia teali naboloki, bai dia budodoo yana akimo naiyase koidan.

¹⁷Yana kubaiyo kososunoi mo kala tukon bantile baikon konaboloki molusamo konamaa doi tempo napo osowaanan. Bai naiyamo kobuktiino baikon dakupau tempodoo salataa nakooloiyano akiyoon narusak konamaa. Pokitayokai doi natoik basowaanan nia daano kosau tandano!’

¹⁸Maka sasaibino kokota katuano sio nauange malanedoo tukon umbase yana.

¹⁹Yanila koidan sio nadendayo yana sakat kodoy perak tukon salakanggene dodoydoo doi namonianan, sabab yana mokubaikenemo maa komeeng koboine doi Israel. Konatutuuwan boinedoo sio natataap teali naboloki, tukon aki namoola potinggal sampe pomatekon.

²⁰Bai kalukai dososunoidoo bisa tukon akiyo kobuktiino baikon konabolokidoo akiyoon namolusa konamaa doi tempo napokoloiyan, maka boinedoo sio nainantokon doi tamano-tinano nabonua tataapono.

²¹Doi lipudoo komala-malane doi kotadoo sio nasakule batu polong pomatekon. Boinedoo lapamo lakukene kolobo mo akamaayo konda bangsa sabab daanoon mopodungoli kotamano-tinano bai balolowamo. Tukon kalu komuyu hukume yana koalatino komuyu atasiomo dokulokisanoo.

²²Kalu meeng komala-malane molinaat daanoon mopokooloi tukon mian bailon naboloki, doi moluailadoo sio nainukum mate. Tukon kalu buno doiya komuyu atasiomo dokulokisanoo.

²³Umapamano doi kota lalomo daano komeeng komala-malane mo linaat mopokooloi tukon meeng kopau boine mo lapamo pobianggon tukon mian bailon.

²⁴Doiya langgedoo sio napobinaba tobuat doi kota tonggulungo tukon sinakul batu sampe mate. Boinedoo sio nainakate, sabab yana aki nanggelemon makabi tulung, padahal langgedoo teali doi kota lalomo tukon kalu yana nggeleamon moola linongol. Tukon malanedoo sio nainakate sabab yana pokooloi tukon boine mo babibiano doi mian bailon. Tukon napoo inukuman luaila, komuyu atasio dokulokisanoo.

²⁵Bai posasala kokaliangano kalu doi asi daano komeeng komalane mo pakisaayo kooloyo komeeng koboine mobabibiano doi mian bailon. Kalu buno doiya tongo malanedoo komo inukum mate.

²⁶Boinedoo aki namoola binulaandokon sabab yana aki nalakukene kolobo mo pantas nainukum mate. Dopalakaladoo buno palakala meeng komian mo lobosio komian bailon tukon akateo.

²⁷Dopokooloiyanoo pinakisaa teali doi asi, tukon mau nabulaamo boinedoo nanggeleamonan manggabi tulung, bai akiyo komo lengele tukon lubat tulungiyo yana.

²⁸ Umpamano meeng komalane linaat daano mopokooloi komeeng koboine moakiyoon nababibian.

²⁹Doiya langgedoo yana sio nabeale doi boinedoo tamano boinedoo saino tukon koanggano tongo lima kolono kodoy perak. Boinedoo sio nateali naboloki sabab yana pinakisaa pokooloi tukon yana aki namoola binauntal sampe pomatekon.

³⁰ Akiyo komeeng komiankai momoola lailainggene kotamano tukon kooloyo kotamano naboloki.”