Read Banggai KUAIKON 23 Bible Online

KUAIKON 23 - Banggai bible

KUAIKON 23

¹“Komian mo lapamo tinokui kai mopinatol konamaa aki namoola teali TEMENENO Namian.

²Kopau lolowa tukon sasaibino kona katulunan sampe doi kosongulono, aki namoola teali TEMENENO Namian.

³ Ko Amon tukon Moab miano maka yanila napoo katulunan polong kosongulono, aki namoola teali TEMENENO Namian,

⁴ sabab yanila aki naiyase mobeena komuyu kinaan tukon paisu salataa doi poampakonan lalomo tobuat luwedoi Mesir. Tukon koidan yanila tongo tambeo Bileam; Beor napau moluwedoi kota Petol doi Mesopotamia, sulano nakutuke komuyu.

⁵ Bai ko TEMENENO mu Mian Bisa aki naiyase mondongoliiyo Bileam. Bai yana tongo boliyo dokutukoo teali balakaat, sabab yana seseange komuyu.

⁶Kalu komuyu daano motubo tukon polong sidutu-posidutukon, inaikai potulungiyo dobangsa-bangsadoo kai tealikene tosuungi konakadaang.

⁷Inai molai-lainggene ko Edom miano sabab yaniladoo utusomuyu. Inai koidan molai-lainggene ko Mesir miano, sabab komuyu biasa dungol doi napootano.

⁸Konapo pau-pau mo sinuung kotoluno luunggon inggat tukon koidan nakatulunan moola nateali TEMENENO Namian.”

⁹“Doi tempo popolobosian lalomo sio podedeenggene sasaibino moteali sipot doi komuyu.

¹⁰Kalu meeng komian teali lokis sabab osumbete konamani doi tempo namooloan, yana sio natinggale kobasandungan tukon dungol doi tonggulung.

¹¹Loolani kona kinobianan yana sio namasau tukon doi nasopokan kooloyo maka namoola abali doi basandungan.

¹²Sio pomasadia meeng kolipu doi basandungan tonggulungo doiya potealikene temean kai sosiitan.

¹³Kalu potaus dombalaa, inai motoliminggene koidan momakanggi meeng kokayung patolo teali pakali bitu lipu mutemean tukon teali mupotombuni dobuangoo.

¹⁴Ko TEMENENO mu Mian Bisa loolainge komuyu tukon beena komuyu manaangan doi pomusu-musu. Maka podagaiyo sulano kopoo basandungan natataap bilisii. Inai nasampe talaat komeeng kolobo mo aki napantas doi komuyu nokon sulano ko TEMENENO aki naotinggale komuyu.”

¹⁵“Kalu daano komeeng koata mo dampasene kobutongo luwedoi natuan maka nalubat doi komuyu manggabi soopan, inaikai mosumboliiyo namule.

¹⁶Yana moola dungol doi meeng komu kota oilamo kona inias, tukon aki namoola poparentayo tukon makansang.

¹⁷ Meeng ko Israel miano, mau mala-malane maukai moluko, aki namoola balolowa doi bonua-bonua bapilogotan.

¹⁸Tukon koidan konadoy linaat luwedoi nabalolowaan aki namoola binaba doi TEMENENO mu Mian Bisa na Bonua sulano nakubaiyo pebeal naniat, sabab ko TEMENENO mu Mian Bisa mosikitene kobalolowaan doi bonua bapilogotan tukon balolowaan tambono.

¹⁹ Kalu komuyu binggotiyo doy doi mian mo lulubaton, komuyu moola pokabio kobungano. Bai kalu komuyu binggotiyo doy kai kinaan kai langge bailon doi mian mupolipuiyan, dona binggatoo maunaaki napake bunga. Taatio doparentahdoo, maka ko TEMENENO mu Mian Bisa balakaatio sasaibino kolobo komuyu mo lakukene doi tanodoo komuyu mo dungoliyo.

²¹ Kalu komuyu paladandikene komeeng kolobo doi TEMENENO mu Mian Bisa, inaikai motataane domu dandidoo, sabab ko TEMENENO mu Mian Bisa tataap tuntute, tukon komuyu baladosa kalu aki podaanekene.

²²Komuyu aki pobaladosa kalu aki pomokubai perjanjian doi TEMENENO.

²³Bai kalu komuyu sanaang mo mokubai perjanjian doi TEMENENO mu Mian Bisa, komuyu sio potapaatiyo.

²⁴Kalukai komuyu daano mo ampakon loloiyo komian bailon naanggur asino, moola pomakaan anggur saono komuyu mo palaluuwo, bai aki namoola pomakanggi doi bois lalomo.

²⁵Kalu komuyu daano mo ampakon loloiyo komian bailon nagandum asino, moola pomakaan gandum komuyu mo pupuwo tukon limamuyu, bai aki namoola popatele tukon sabit.”