Read Banggai KUAIKON 24 Bible Online

KUAIKON 24 - Banggai bible

KUAIKON 24

¹ “Umpamano meeng komalane osowaan tukon meeng koboine, tukon doi bundu akimo naiyase koidan sabab yana malaat meeng kolobo mookimaayo yana. Maka malanedoo salakanggene kosulat potinggalan doi yana tukon siikayo yana luwedoi nabonua.

²Doibundu boinedoo osowaan tukon meeng komalane bailon.

³Bai lapa bubula kotempo malanedoo akimo nakilayo doi yana koidan, maka yana salakanggene kosulat potinggalan doi yana tukon siikayo yana. Kai dona lakaidoo koluano mate.

⁴Doi langgedoo molua lalomo dona lakai tumbeno aki namoola kilayo boinedoo koidan; yana sio naanggene salaku boine mo kulokiso kosambuno. Kalu yana kilayo koidan, dokokubaidoo TEMENENO mu Mian Bisa mosikitene tuuno. Aki namoola pomokubai dosa mo buno doiya konakulokisan tuuno doi tano TEMENENO mo beekenemo doi komuyu.”

⁵“Meeng komalane mosodokai osowaan aki namoola sinumbolii usok suludadu tukon taus poolobosi kai lakukene kona limang-limang bailonggon. Yana sio nabinee todanan doi nalimang meeng kotaun konakalumbit tuuk ulusiyo kona bonua lalomo tukon tanaanggene konaboloki noano.

⁶Kalu komuyu binggotiyo meeng kolobo doi mian bailon, inai moalayo tukon tealikene pagade domianoo nabatu pogiling gandum. Sabab kalu komuyu alayomo dobatudoo, pokakanamo komuyu molambase dokaluargadoo napakakas pinake tuuk pataami tuboan.

⁷ Komian modambasene kotulano napolipuiyan, maka natealikene ata kai balukene, sio nainukum mate. Tukon kalu buno doiya komuyu atasiomo dokulokisanoo.

⁸ Kalukai daano komian mo seselon kokulito mo minatakuton, lakukene tukon teliti oila koimam-imam Lewi napinalentahkon doi komuyu; loingiyokai kootunggul-otunggul yaku mo bontiikene doi yanila.

⁹ Neneekekai oila ko TEMENENO mu Mian Bisa nailakukon doi Miryam doi muampakonan lalomo tobuat luwedoi Mesir.

¹⁰ Kalu komuyu binggotiyo meeng kolobo doi tulamu, inaikai mousok doi nabonua lalomo maka mualayo konakalambi sulano mutealikene pagadeno.

¹¹Totiiliyokai doi tonggulung tukon sodiiyomo yana susuungo nababayo doikoo.

¹²Kalu domianoo talalais dokalambidoo aki namoola ikoo taane doi popookoo lalomo,

¹³bai sio nainabalinggon doi yana samba kopopook sulano namoola pakeyo doi namooloan. Maka yana naikon batalimakaseh tukon ko TEMENENO mu Mian Bisa naikon pokokonoi doi komuyu.

¹⁴ Inai molailainggene komu mian tinambo motalalais tukon mo akiyo konalobo, mau mian mupolipuiyan, maukai mian molulubaton modungol doi meeng komu kota.

¹⁵Sasamba kooloyo doi naakiyonan nasopok kooloyo komuyu sio pobeale konatambo nabalimangan doi oloyodoo; yana moinikenemo do doydoo sabab yana palaluuwo. Kalu aki pobeale konatambo, yana naikon uang doi TEMENENO sulano nakalaakonggomuyu, tukon dolanggedoo tealikene komuyu baladosa.

¹⁶ Inai mohukume mate koorang tua sabab napau nakulokisan kinubai, tukon inai mohukume mate dopaudoo sabab tamano-tinano nakulokisan kinubai. Sasamba komian tongo moola inukum mate sabab yana lakukene susuungo dokulokisanoo.

¹⁷ Inai molambase komian molulubaton tukon pau tuboon nahaak, tukon inai mo alayo komeeng kobalu napakean sulano mutealikene pagade.

¹⁸Neneekekai baikon komuyu biasa teali ata doi Mesir tukon ko TEMENENO mu Mian Bisa oluputenemo komuyu; doiyamo kosababpo sampe yaku beekonggomuyu naaturan nia.

¹⁹ Kalukai komuyu pototongikene komu buta hasilo, inaikai moabali maka poalayo kopo gandum labino mo totinggal. Dogandumoo labino sio pobatadikenemo komian mo lulubaton, pau tuboon tukon sasaibino kobalu naalayo, sulano ko TEMENENO mu Mian Bisa nabalakaatio sasaibino komu limang.

²⁰Kalu komuyu lapamo bapupui idan zaitun saono tukon muanggur saono, inaikai moabali sulano mupototongikene kosao-saono koidan mo totinggal. Sio pobatadikene doiya tuuk doi mian molulubaton pau tuboon tukon sasaibino kobalu.

²²Poneneekekai baikon komuyu biasa teali ata doi Mesir, doiyamo komo mangaanikene tobikon kubeekonggomuyu naaturan nia.”