Read Banggai KUAIKON 25 Bible Online

KUAIKON 25 - Banggai bible

KUAIKON 25

¹Umpamano lua ko Israel miano mo taus doi pangadilan mo mangadukene komeeng kopalakala, maka komeeng nyatakanggon aki nasalah, tukon domo meengo daano konasalah.

²Kalu komo salah kinonoi hukuman binobokii, kohakim sio nasumboliiyo yana ngganggalaup. Dopongumbasoo nakadaang pokokonoi kona kokubaidoo mo lokisoo,

³ bai aki namoola lobian doi nasangkap kolonoan luunggon. Kalu lobian, koalatino domianoo inakamaa doi mian badaang salaano.

⁴ Inai poboboiyo kosaapi suungo mo daano mo makakat gandum.

⁵ “Kalu daano komian mo motolutus mopodungoli, maka kalu daano komeeng komian doi yaniladoo mate tukon akiyo konapau malaneno tininggal, maka kobaluno aki namoola osowaan tukon mian bailon mo bolikon namonianan pulino. Domo matedoo utusoo moola nakilayo dobaludoo.

⁶Konapopau malaneno langgongo sio nainaanggon doutusodoo momate napau, sulano yana daano kona katulunan doi bangsa Israel.

⁷ Kalu domianoo aki naiyase osowaan tukon doutusodoo mo mate naboloki, boinedoo sio nataus mangadap doi sasaibino kokota katuano tukon bantile, ‘Dakudaok aki naiyase lakukene kona kawajiban doi utusodoo mo mate sulano nadaano kona katulunan doi bangsa Israel.’

⁸Maka sasaibino dokotadoo katua-katuano sio nauange domianoo tukon posilingonii yana. Kalu yana tataap tolayo,

⁹dobolokidoo mo mate kona lakai utuso sio nakoolaniyo yana doi sasaibino dokotadoo katua-katuano salaano, maka naliate domianoo nasandaal, tukon tupeiyo koduduso maka nabantile, ‘Sio nabuno naiya kona kinubaiyan komian mo aki naiyase beena katulunan doi utuso.’

¹⁰Dokaluargaadoo naikon tiningonii doi Israel salaku ‘Kaluargaa mian mo liniat kona sandaal.’ ”

¹¹“Kalu daano kolua komala-malane mo poakate, tukon komeeng konaboloki kakaate motomboniiyo konalakai tukon pidele konalakai nalawan namaa,

¹²patelekai boinedoo limano tukon inai moseseange yana.

¹³ Inai mobakokolii tukon mopakeo kotimbangan tukon batakalan mo aki nabisa.

¹⁵Popakeo kotimbangan tukon batakalan mo bisa sulano potubo monunut doi lipu TEMENENO mu Mian Bisa mobeekene doi komuyu.

¹⁶Ko TEMENENO mu Mian Bisa mosikitene komian moiyase bakokolii.”

¹⁷ “Neneekekai bulaando ko Amalek miano nakubaiyano komuyu doi tempo poampakonan lalomo potobuatan luwedoi Mesir.

¹⁸Yanila aki namatakutene ko Mian Bisa tukon lobosio komuyu luwedoi tonggulung sambuno komuyu pakadak tukon akimo pobukuan, maka akateo sasaibino komumian-mian mo tuundu doi bundu.

¹⁹Tobikon doiya, kalu ko TEMENENO mu Mian Bisa beekenemo dotanodoo doi komuyu tukon aman luwedoi sasaibino komusuh mo dungol potikunggon komuyu, sasaibino ko Amalek mianodoo sio poakateyo sulano naakimo yanila naninonook. Inai potoliminggene!”