Read Banggai KUAIKON 26 Bible Online

KUAIKON 26 - Banggai bible

KUAIKON 26

¹“Kalukai komuyu usoko doi tano TEMENENO mu Mian Bisa mo beekene doi komuyu tukon dungolo idoo,

² maka dopo hasilo tumbeno mo luwedoi sasaibino kopo pinototongikon luwedoi mubuta sio pousekene doi meeng kobois lalomo, tukon pobabayomo doi lipu TEMENENO mu Mian Bisa molilikemo.

³Potausokai doi imam mo balimang doi tempodoo tukon bantile doi yana, ‘Yaku nyatakanggene doi TEMENENO mu Mian Bisa baikon yaku lapamo usok doi tano mo dinondiikono doi tumbunggita tuuk bineekon doi kita.’

⁴Koimam naikon talimayo doboisoo luwedoi limamu tukon abese doi TEMENENO mu Mian Bisa nabalabaan salaano.

⁵Doibundu koikoidan doi TEMENENO mu Mian Bisa salaano, ikoo sio mubantile nabantilan-bantilan nia: ‘Oh TEMENENO, daku mbumbu meeng ko Aram miano mo balausala. Yana babayo kona kaluarga doi Mesir sulano nadungol indaa salaku mian modambas. Salataa taus indaa yanila nakadaang tolongo soisik, bai yanila tealimo bangsa mo babasal tukon bukuan.

⁶Ko Mesir miano kubaikami lokis tukon pakisaayo kami balimang salaku ata.

⁷Maka mai uang makabi tulung doikoo TEMENENO, tumbunggami na Mian Bisa. Ikoo ndongoliiyo komai uangan tukon kitayo komai sakisaawan, kosusaan tukon komai sakisaawan.

⁸Maka mukuasa tukon bukuanan mo babasal ikoo oluputamimo luwedoi Mesir. Ikoo lakukene komo minasaindinggon-minasaindinggon tukon mo hinelanggon-hinelanggon tukon moolubatene kokadadian-kadadian mo ponggalanggabutene komusuh.

⁹Doibundu ikoo babayo kami dimbaa tukon beena buta mo molumbang tukon kaasa nia doi kami.

¹⁰Tobikon doiya, oh TEMENENO, yaku sosubakene dimbaa kohasil tumbeno luwedoi tano ikoo mo beekene doi yaku.’ Maka abesemo doboisoo doi TEMENENO mu Mian Bisa salaano, tukon sombakai doi yana.

¹¹Basukulkai doi sasaibino kolangge mo lapamo TEMENENO beekene doi komuyu tukon mukaluargaa. Sumboliiyo ko Lewi miano tukon mian lubat mo dungol doi komuyu sulano napo malaing doi lameanoo lalomo.

¹² Sasamba kotaun kotoluno sio pomebee sosubakon meeng koobos mo inobos songulo doiyamo, meeng koobos moinobos songulo luwedoi mubuta hasilo doi imam Lewi, mian lubat, pau tuboon tukon balu, sulano doi sasamba komu kota lalomo yanila malaat kinaan yanila palaluuwo. Kalau lapamo,

¹³bantilekai doi TEMENENO mu Mian Bisa, ‘Luwedoi meeng koobos moinobos songulo doi kubuta hasilo mosio kusosubakene doi Ikoo, TEMENENO, maunatongo soisik akiyonokai komo totinggal doi kubonua; sasaibino lapamo kubeekene doi Lewi miano, mian lubat, pau tuboon tukon balu, pokakana ko TEMENENO mu Mian Bisa napinalentahkon doi yaku. Luwedoi TEMENENO naparentah tentang dososubakonoo mo meeng inobos songulo kooboso akiyo daku linumbai.

¹⁴Luwedoi sosubakonoo mau natongo soisik akiyokai daku kinaan doi tempo kususaan sabab matean, kai yaku babayo tobuat doi bonua doi tempo kumadikitan, kai yaku beekene salaku obos kinaan doi mian mo mate. Yaku lapamo taat doi koo, oh TEMENENO; sasaibino komu pinalentahkon lapamo yaku lakukene.

¹⁵Luwedoi mulipu mo moliyous doi surgaa siokai musanaang mombalenge tukon balakaatio ko Israel mumian; balakaatiokai koidan kotano mo kaasa tukon mo molumbang mo lapamo ikoo beekene doi kami pokakana tukon muperjanjian doi tumbunggami.’ ”

¹⁶“Oloyo nia ko TEMENENO mu Mian Bisa palentayo komuyu sulano polakukene sasaibino dopalentadoo; lakukenemo sasaibino tukon setia tukon tootubo konoamu.

¹⁷Oloyo nia komuyu akuiyo ko TEMENENO salaku mu Mian Bisa. Komuyu paladandi tuuk taat doi yana tukon lakukene sasaibino kohukum tukon naparentah.

¹⁸ Oloyo nia TEMENENO talimayo komuyu salaku namian susuungo, pokakana kona dinondiikon doi komuyu, tukon yana palentayo komuyu sulano polakukene sasaibino Konaparentah.

¹⁹Ko TEMENENO naikon kubaiyo komuyu lobian babasal luwedoi sasaibino kobangsa bailon mo lapamo yana pasitakayo tukon komuyu naikon ngginaal tukon inodotii. Komuyu teali TEMENENO mu Mian Bisa namian pokakana komo lapamo dandikene.”