Read Banggai KUAIKON 27 Bible Online

KUAIKON 27 - Banggai bible

KUAIKON 27

¹Doibundu polaing sasaibino ko Israel katu-katuano, Musa pelenggene nateteba nia doi bangsadoo, “Taatiyokai sasaibino koparentah yaku mo beekene doi komuyu oloyo nia.

² Doi oloyo popintosiiyano ko Yordan Paisunobatango sulano pousok doi tano TEMENENO mu Mian Bisa mo beekene doi komuyu, sio pomongokokondong bubula kobatu mo babasal maka poseete.

³Potulisekai doi batudoo sasamba kobantilan moluwedoi hukum-hukum nia. Kalukai komuyu usoko doi tano mokaasa tukon mo molumbang TEMENENO, mumbumbu na Mian Bisa mo dandikenemo doi komuyu,

⁴tukon kalu komuyu daanomo doi Yordan Paisunobatango sembeleng, sio potaus doi Ebal bunggulo. Idoo sio pokekendenge tukon poseete dobatu-batudoo buno kupinarentakon doi komuyu oloyo nia.

⁵ Doi lipudoo sio koidan pomokokondong doi TEMENENO mu Mian Bisa meeng kobalabaan mo luwedoi batu-batu mo akiyoon nabiasa linimang tukon pakakas besi,

⁶sabab sasamba kobalabaan mo kinokondong tuuk doi TEMENENO mu Mian Bisa sio nakinubai luwedoi batu mo akiyoon natinulisi. Doi balabaanoo bunggono sio pomososubakon sosubakon-sosubakon mo sinua.

⁷Pomososubakon koidan sosubakon podamean tukon pokaanokai idoo tukon polaba-labakai doi TEMENENO mu Mian Bisa salaano.

⁸Doi batu-batu mo sineetoo bunggono sio potulise tukon tontong sasamba kobantilan moluwedoi Mian Bisa nahukum-hukum.”

⁹Doibundu polaing sasaibino koimam Lewi, Musa bantil doi sasaibino ko bangsa Israel, “Utus-utus, popalaatikanggene tukon pondongoliiyo! Oloyo nia komuyu teali TEMENENO mu Mian Bisa namian.

¹⁰Tobikon doiya potaatiyo ko TEMENENO mu Mian Bisa tukon lakukene sasaibino Konaparentah yaku mo beekene doi komuyu oloyo nia.”

¹¹Maka Musa bantil doi bangsa Israel,

¹² “Kalu lapamo komuyu pintosiiyo ko Yordan Paisunobatango, Simeon benseno, Lewi, Yehuda, Isakhar, Yusuf tukon Benyamin sio nakokondong doi Gerizim bunggulo doi tempo nabinantilan kobalakaat tuuk doi bangsa nia.

¹³Doi tempo nabinantilan kokatula Ruben benseno, Gad, Asyel, Zebulon, Dan maka Naftali sio nakokondong doi Ebal bunggulo bungguno.

¹⁴Ko Lewi miano sio napo mabantil koidan nabantilan-bantilan nia tukon alaloila mo babasal tukon ko Israel miano sio natimbiliyo, ‘Amin.’

¹⁵ Ko Lewi miano: ‘Katulaonkai komian mo mokubai timbalang mo luwedoi batu, kayung kai tambaga, maka nasosubaiyo tukon aki nabiyok-biyok; ko TEMENENO mosikitene kososubaiyano kopilogot!’ Sasaibino korayat: ‘Amin!’

¹⁶ ‘Katulaonkai komian mo aki naodotiiyo kotamano-tinano tukon sodiikene yanila nasusah.’ ‘Amin!’

¹⁷ ‘Katulaonkai komian mo aseke kotulano napokoolanian nabuta kalalatano.’ ‘Amin!’

¹⁸ ‘Katulaonkai komian mo babayo salah komian piit.’ ‘Amin!’

¹⁹ ‘Katulaonkai komian mo lambase komian lubat nahaak, pau tuboon tukon balu.’ ‘Amin!’

²⁰ ‘Katulaonkai komian mo totulaiyo kotamano sabab pokoloi tukon tamano naboloki.’ ‘Amin!’

²¹ ‘Katulaonkai komian mo pokoloi tukon iyayon.’ ‘Amin!’

²² ‘Katulaonkai komian mo pokoloi tukon utuso boine momeeng kotama meeng kotina kai utuso doi meeng kotama kai meeng kotina.’ ‘Amin!’

²³ ‘Katulaonkai komian mo pokoloi tukon namonianan moluko.’ ‘Amin!’

²⁴‘Katulaonkai komian mo lakukene tukon seseekene kona mangakatean.’ ‘Amin!’

²⁵‘Katulaonkai komian mo matalima sogokan sulano naakateyo komian mo akiyo konasalah.’ ‘Amin!’

²⁶ ‘Katulaonkai komian mo aki natapaatiyo ko Mian Bisa nahukum tukon naotunggul tukon nakokubai.’ ‘Amin!’ ”