Read Banggai KUAIKON 28 Bible Online

KUAIKON 28 - Banggai bible

KUAIKON 28

¹ “Kalu komuyu taatio ko TEMENENO mu Mian Bisa tukon setia mo lakukene sasaibino kona parentah yaku mo beekene doi komuyu oloyo nia, maka yana naikon tealikene komuyu bangsa mo minotoonanggon tuuno doi dunia.

²Taatiyomokai ko TEMENENO mu Mian Bisa, maka sasaibino nabalakaatia naikon bineekono doi komuyu:

³Binalakaatimokai kokota-kota tukon muasi-asi.

⁴Binalakaatimokai komuyu, sampe badaang komupau, komu buta hasilo lobi-lobian tukon saapi tukon mbembe mu domba badaang tuuno.

⁵Binalakaatikai komu gandum pinadak tukon mukinaan komuyu mokubaiyo luwedoi gandumoo.

⁶Binalakaatikai sasaibino komu usaha.

⁷Kalu komuyu linobosi, TEMENENO naikon lungguiyo komu musuh. Yanila naikon jalanggenemo kona molobosian tukon taatur, bai yanila obulen tukon topobabandakon.

⁸Ko TEMENENO mu Mian Bisa naikon balakaatio komu limang sampe badaang kohasilo tukon komu longgo-longgo moono tukon gandum. Yana naikon balakaatio komuyu doi tano yana mo beekene doi komuyu.

⁹Kalu komuyu taatio ko TEMENENO mu Mian Bisa tukon lakukene sasaibino kona parentah, yana naikon tealikene komuyu namian susuungo, sabab doiya yana lapamo dandikene.

¹⁰Maka sasaibino kobangsa doi dunia naikon kitayo baikon komuyu TEMENENO nabangsa linilik, tukon yanila naikon maembanggene komuyu.

¹¹Komuyu naikon binee pau badaang. Komu iyayon piniala naikon badaang tukon badaang komu buta hasilo doi TEMENENO natano dinondiikon doi tumbumuyu sulano pobineekon.

¹²Ko TEMENENO naikon lubatene konaudan doi tempono, luwedoi natangabosan doi timbu, yana naikon balakaatio sasaibino komu limang, sampe komuyu moola pobinggotiiyo oioila doi badaang ko bangsa, bai komuyu susuumuyu maunaaki pomobinggat.

¹³Ko TEMENENO mu Mian Bisa naikon tealikene komuyu pakatuai bangsa-bangsa bailon, tukon bolikon pololaing. Kalu komuyu setia taatio sasaibino ko TEMENENO naparentah yaku mo beekene doi komuyu oloyo nia, komuyu naikon pololokon sanaang tukon aki pokakurangan.

¹⁴Bai aki namoola pobatalakene doparentah-parentahdoo tukon oilano kai kopo kokubai koidan. Inai koidan posomba tukon mangangga doi ilah-ilah bailon.”

¹⁵“Bai kalu komuyu aki potaat doi TEMENENO mu Mian Bisa, tukon aki posetia molakukene sasaibino kona parentah tukon nahukum yaku mo beekene doi komuyu oloyo nia, maka sasaibino nakutukia naikon tepokiiyo komuyu:

¹⁶Katulaonkai kokota-kota tukon muasi-asi.

¹⁷Katulaonkai komu bapupuiyan gandum tukon kinaan komuyu mo kubaiyo luwedoi gandumoo.

¹⁸Katulaonkai komuyu, tobikon tolongo soisik komupau, mubuta hasilo, saapi tukon mbembe mudomba.

¹⁹Katulaonkai sasaibino komu usaha.

²⁰Kalu komuyu mokubai lokis tukon tolayo ko TEMENENO, yana naikon lubatene kosilakaan, nggabutan tukon kasulitan doi sasaibino kopoo linakukanggon, tobikon doi tempo lalomo mosobitkai komuyu linopu kabus.

²¹Panakit paisoboli kopanakit naikon mo tepokiiyo komuyu, polong doi bundu akiyo komeeng komiankai luwedoi komuyu mo daano mo dungol doi lipu komuyu mo dungoliyomo.

²²TEMENENO naikon hukume komuyu tukon panakit-panakit mo badonggiti boboongan-boboongan tukon maligot. Yana naikon lubatene kokeas tukon mbombuul mo makansang tobikon komu langge pinupui manas. Dosilakaan-silakaanoo banggadudul lupayo komuyu polong komuyu kabus mate.

²³Koudan akimo naikon nalubat tukon komu buta tealimo matikas buno besi.

²⁴Ko TEMENENO aki naikon nalubatene ko paisu udan, bai udan ambata tukon bone polong komuyu kabus mate.

²⁵Kalu komuyu aki potaatiyo ko TEMENENO mu Mian Bisa, yana naikon kubaiyo komu musuh-musuh lungguiyo komuyu. Komuyu naikon kosobite kopo balobosian tukon taatur, bai obulen tukon nggalanggabut. Sasaibino kobangsa doi dunia naikon lasayo matakut mokitayo komususaan.

²⁶Kalu komuyu mate, komu bajan teali tomisi-tomisi tukon iyayon mobarani nakaanan, tukon akiyo komo siikayo doiyayon-iyayonoo.

²⁷Ko TEMENENO naikon hukume komuyu tukon bisul-bisul buno nakubaiyano ko Mesir miano. Posaapon kobutomu naikon moono tukon takatol mo makatol tukon kobutomu molisuk, bai akiyo kopakulino.

²⁸Ko TEMENENO naikon kubaiyo komuyu teali tindo, piit tukon pusing-pusing.

²⁹Doi suunan kooloyo komuyu bato-batotopi buno mian mo piit, bai aki pomoola posuunggene kololoon. Sasaibino komu usaha naikon aki nateali. Komuyu banggadudul linailainggon tukon linambok, tukon akiyo komo tomboniiyo komuyu.

³⁰Kalu aki potaatio ko TEMENENO mu Mian Bisa, nalangge-langge nia naikon lupayo kobutomu: Komuyu naikon pobianggon, bai mian bailon komo kilayo komu bibian. Komuyu naikon mokokondong bonua, bai aki podungoliyo. Komuyu naikon masakakon anggur doi asi, bai aki pomakaan sao-saono.

³¹Komu saapi naikon tinembel doi matamu salaano, bai aki pomakaan sailo. Komu keledai-keledai naikon siniika dampas komuyu daano mopateekene; tukon akimo naikon nainabalinggon. Mudomba-domba naikon bineekono doi musuh-musuh tukon akiyo komo tulungiyo.

³²Doi matamu salaano komu pau-pau naikon bineekon salaku ata doi mian molubat. Samba kooloyo poloon kodudusomu mo unggoliiyo komu pau-pau, bai komu usaha akiyo konatotuuk, sabab yanila akimo naikon naabali.

³³Kobangsa mo lulubaton naikon alayo sasaibino komubuta hasilo komuyu mo laate tukon balimang babuku, bai komuyu susuumuyu aki pomalaat oioila tolongo piniipiki banggadudul tukon kokubai mo lokis.

³⁴Sabab dopoo tinoupidoo, komuyu naikon teali tindo.

³⁵Ko TEMENENO naikon kubaiyo posaapon koaimu moono takatol mo malalas tukon akimo natangalin; tambuun doi aimu polong doi olumu bunggono moono tukon bisul-bisul.

³⁶Komuyu tukon potomundo naikon TEMENENO babayo doi lipu mo odoon tukon aki koidan tumbumuyu natingoniiyo. Idoo komuyu naikon mangangga doi temeneno-temeneno mo kinubai luwedoi kayung tukon batu.

³⁷Doi tano-tano lipu TEMENENO napoalaasanano komuyu, komian badaang naikon matakut mo kitayo komuyu; komuyu naikon sinosibolii tukon kinokumbit.

³⁸Badaang kolibuang komuyu mo tipase bai soisik kohasilo komuyu molaate, sabab komu lobo sinakakon kabus betek kaane.

³⁹Komuyu naikon masakai anggur asi-asino tukon pialayo, bai aki pomopupui anggur saono kai monginum anggur paisuno, sabab doangguroo batang-batango kabus besuk kaane.

⁴⁰Posaapon komu tano tubo kozaitun batango; bai kosao-saono naikon topudul, sampe aki pomalaat lisisono.

⁴¹Komuyu naikon malaat pau-pau malaneno tukon moluko, bai yanila inalamo doi poolobosian lalomo, sampe yanila akiyono doi komuyu.

⁴²Sasaibino kokayung tukon mulobo sinakakon naikon kabus tomisi kaane.

⁴³Komian mo lulubaton mo dungol doi mutano naikon pololokon balakuasa, baimokai mukuasa susuumu pololokon mbeeng.

⁴⁴Yanila daano konadoy tuuk mo binggotiikene doi komuyu, bai komuyu akiyo kopoo lobo sulano pobinggotiiyo doi yanila. Tukon doibundu yanila kuasaiyo komuyu.

⁴⁵Sasaibino kosilakaan naikon lupayo komuyu tukon banggadudul nggabute komuyu sampe komuyu silaka, sabab komuyu aki potaat doi TEMENENO mu Mian Bisa tukon aki polakukene kohukum-hukum yana mo beekene doi komuyu.

⁴⁶Dobala-balaadoo buno paloosan luwedoi TEMENENO nahukuman doi komuyu tukon mukatulunan tuuk sidutu-posidutukon.

⁴⁷Ko TEMENENO mu Mian Bisa lapamo balakaatio komuyu doi sasaibino kolangge lalomo, bai aki poiyase mangangga doi yana tukon noa sanaang tukon tedes.

⁴⁸Tobikon doiya komuyu sio pobaata-ata doi musuh-musuh TEMENENO mo sumboliiyo sulano nalawane komuyu. Komuyu naikon malaal, molou tukon talalau tukon akiyono kopoo oioila, ko TEMENENO naikon lai-lainggene komuyu tukon lokis sampe komuyu silaka.

⁴⁹Meeng kobangsa mo aki pomangalatikene konasilingan naikon TEMENENO lubatene luwedoi dunia bunduno tuuk molawane komuyu. Buno tomisi rajawali yanila naikon sokuwo komuyu.

⁵⁰Yanila lokis tukon akiyo kona maasi doi mian mo motu-motua maukai pau-pau.

⁵¹Yanila naikon akabusemo koiyayon piniala tukon mubuta hasilo, tukon aki namotinggal gandum doikoo, anggur paisuno, zaitun lisisono kai saapi kai mbembe mudomba sampe komuyu mate laal.

⁵²Yanila naikon lobosio sasamba kokota doi tano TEMENENO mu Mian Bisa mo beekene doi komuyu sampe kopagalo mo binetoon mo tatandak tukon kinoonggol komuyu mo balaanggenedoo molombo.

⁵³Daanokai komu musuh-musuh molobosiyo komu kota-kota, komuyu naikon susamo sabab malaal, sampe komuyu kaane kopoo pau-pau, pau-pau TEMENENO mu Mian Bisa mo beekene doi komuyu.

⁵⁴Maukai mian moturunan sambu momonondok tuuno konoano naikon susah doi molobosianoo lalomo, sampe yana kaane kona pau-pau susuungo sabab akiyono komo kinaan bailon. Mau natongo soisik akiyono kona bineekon doi utuso kai naboloki yana moseseange kai napau-pau mo daano mobuto.

⁵⁵

⁵⁶ Maukai boine mo tulunan sambu motodudul monondok konoano tukon mo kaasa tuuno sampe aki napomanaanggon mo ampakon aiai, naikon kubaiyo buno doiya koidan. Doi tempo komusuh nalobosiano kokota, doboiboinedoo naikon susah sabab malaal, tobikon yana baso-basookon mokaane konapau mosodo sinuung tukon sesembelengo. Mau natongo soisik aki nabeena doi nalakai yana moseseange, kai doi napau-pau.

⁵⁷

⁵⁸Kalu komuyu aki posetia motaatiyo sasaibino ko TEMENENO mu Mian Bisa nahukum mototulis doi buku nia lalomo tukon aki muodotiiyo ko TEMENENO mu Mian Bisa mo Babasal tukon mo minasaindinggon,

⁵⁹ko TEMENENO naikon lubatene doikoo tukon mukatulunan kopanakit-panakit moaki namoola inalin tukon panakit-panakit mo biyol-biyol mo aki namoola inatadei.

⁶⁰Kosesel-sesel mo minatakuton komuyu mosakisiiyo doi Mesir naikon lubotiiomo komuyu, tukon aki pomoola tangalin.

⁶¹Ko TEMENENO naikon lubatene koidan kosesel-sesel mo badaang kokaliangano tukon sesel mo aki nabinantil doi buku nia lalomo, TEMENENO nabuku hukum. Maka komuyu naikon silakamo.

⁶²Maukai koaitomu nabuno bituwon pauno doi timbu konakadaang, tongo soisikkai doi komuyu doo ko modanoon motubo, sabab aki potaat doi TEMENENO mu Mian Bisa.

⁶³Buno ko TEMENENO sanaang mobeena monondokan doi komuyu tukon suungiyo komu kadaang, yana naikon sanaang mosilakaiyo tukon moakabuse komuyu. Komuyu naikon biniyol luwedoi lipu moakimo namalumbit koidan komuyu dungoliyomo.

⁶⁴Ko TEMENENO naikon poalaasene komuyu doi antara bangsa-bangsa posaapon kodunia bunggono. Indaa komuyu naikon sosubaiyo kotemeneno-temeneno mokinubai luwedoi kayung tukon batu, temeneno-temeneno mo aki potingoniiyo tukon koidan tumbumuyu mo aki natingoniiyo.

⁶⁵Doi antara bangsa-bangsadoo komuyu aki naikon pomoposuunggon monondokan, tukon akiyo kolipu komuyu mo bantile mulangge; ko TEMENENO naikon kubaiyo komuyu matakut tuuno tukon susah tukon akiyo kopoo minoinikon.

⁶⁶Komutuboan naikon sidutu malaat bahaya. Samba kooloyo komuyu lasayo matakut tukon matakutene komatean.

⁶⁷Doi tempo pomokitaan oi-oila pakandang komu tibubung sabab pomatakutan. Dodowasoono komuyu moinikene kopopook, tukon doi tempo popook komuyu moinikene kododowa.

⁶⁸Ko TEMENENO naikon bintekene komuyu abali doi Mesir tukon kapal, maukai nalapamo bantile baikon komuyu aki naikon poabali koidan indaa. Komuyu naikon kakaate indaa mobalukene kobutomu salaku ata doi mumusu, bai akiyo komeeng komian kai moiyase oliyo komuyu.”