Read Banggai KUAIKON 29 Bible Online

KUAIKON 29 - Banggai bible

KUAIKON 29

¹Naiyamo ko TEMENENO nabantilan-bantilan pinalentahkon Musa nakubaiyo koperjanjian tukon bangsa Israel doi tempo napoo daanoan doi tano Moab. Doperjanjianoo buno meeng koposuungino luwedoi TEMENENO naperjanjian kinubai tukon yanila doi Sinai Bunggulo.

²Musa sumboliiyo sasaibino ko Israel miano mopototongi, maka nabantile doi yanila, “Komuyu lapamo kitayo susuumuyu oila ko TEMENENO nailakukon motuuk doi tomundo Mesir, sasaibino kona sambu posaapon konalipu.

³Komuyu koidan lapamo kitayo kosilakaan-silakaan mo babasal, tukon lobo-lobo mo minasaindinggon-minasaindinggon TEMENENO mo kubaiyo.

⁴Bai polong doi oloyo nia yana akiyoon moolakene komuyu mo mangalatikene sasaibino dopoo tinoupidoo.

⁵Sangkap kolono kotaun konakalumbit ko TEMENENO naloolaingano komuyu loloiyo ko padang lalomo, bai kopoo pakean tukon musandaal aki namoola manas.

⁶Komuyu akiyo kopoo roti tuuk mokinaan, anggur paisuno kai suka mo mosopot, bai ko TEMENENO beekene sasaibino kopoo pinalaluu sulano potoiyo baikon yanamo ko TEMENENO mu Mian Bisa.

⁷ Tukon salataa kita polong doi lipu nia, ko Tomundo Sihon luwedoi Hesybon tukon Tomundo Og luwedoi Basan lubat molobosiyo kita. Bai kita lungguiyo yanila.

⁸ Konapoo tano kita alayo tukon kita ebese doi Ruben nabenseno, Gad tukon sembeleng Manasye nabenseno.

⁹Maka siokai po setia motaatiyo sasaibino naperjanjian nia, sulano pomalaat hasil doi sasaibino komu usaha.

¹⁰Oloyo nia komuyu sasaibino kokondong doi TEMENENO mu Mian Bisa salaano, sasaibino kobenseno katuano, paubakalinga, suludadu kapalano, sasaibino komala-malane,

¹¹boine, pau-pau, tukon sasaibino komian mo lulubaton mo podungoli komuyu tukon tomboniiyo komuyu mo mapatol kayung tukon momatanggung paisu.

¹²Ko TEMENENO mu Mian Bisa mokubai perjanjian tukon komuyu, tukon komuyu sasaibino pototongi dimbaa tuuk mokubai perjanjianoo tukon matalima nakawajiban-kawajiban.

¹³Tukon doperjanjianoo ko TEMENENO oloyo nia koonggolio komuyu teali nabangsa, tukon yana teali mu Mian Bisa pokakana kona dinondiikon doi komuyu tukon doi tumbumuyu Abraham, Ishak tukon Yakub.

¹⁴Doperjanjianoo tukon sasaibino kona tuntutan TEMENENO mo kubaiyo bolikon tongo komuyukai,

¹⁵bai tukon samba komian mo doi oloyo nia kokondong dimbaa, doi nda TEMENENO Mian Bisa salaano, tukon koidan ndaturunan oloyo doibundu.”

¹⁶“Komuyu daano mo neneeke bulaando konda nasib doi Mesir tukon bulaando konda ampakonan loloiyo kobangsa-bangsa bailon natano.

¹⁷Komuyu lapamo kitayo konapoo pilogot timba-timbalango mominosikiton mo luwedoi kayung, batu, tambaga tukon mosoni.

¹⁸ Jadi dagaiyokai inai nadaano komeeng komiankai doi komuyu nokon, mala-malane kai moluko, kaluargaa kai benseno mo kokondong dimbaa, bangabalinggon luwedoi nda TEMENENO tuuk sosuba doi bangsa-bangsa bailon natemeneno-temeneno. Dokokubaidoo buno kayung alono mo tubo teali lobo mo sinakakon mosopot tukon daano kolasumo.

¹⁹Doi komuyu nokon mo ndongoliiyo dotuntutanoo inai nadaano komo bapikil baikon kona nasib tataap monondok, maukai nanekate tukon loingiyo kona loloon susuungo. Dolanggedoo naikon lopuwo kabus komuyu sasaibino, mian badaang molokis maukai mo monondok.

²⁰Ko TEMENENO aki naikon naompunio komian mo buno doiya. Kobalino, yana kanakon panganuukon molobi-lobian doi TEMENENO tukon sasaibino kosilakaan mo totulis doi buku nia lalomo naikon yana kanakon, tukon TEMENENO akateo yana.

²¹Ko TEMENENO naikon tealikene yana meeng kosontoh tuuk doi sasaibino ko Israel benseno, tukon hukume yana tolongo kutuk mo binantil doi perjanjianoo lalomo mototulis doi buku nia lalomo, TEMENENO Nabuku Hukum.

²²Oloyo doibundu, komu tulunan tukon mian molubat luwedoi lipu moodoon naikon kitayo kobala-balaa tukon sakisaawan TEMENENO molubatene doi mulipu.

²³ Komu asi-asi naikon teali buta mo kindodolon tosunggupi belerang tukon timuson. Kotanono aki namoola sinakai tukon kobulung aki nateali tubo idoo. Komu tano naikon bunomo kota-kota Sodom tukon Gomora, Adma tukon Zeboim TEMENENO mo akabuse salataa bukal-bukal konanggimalan.

²⁴Maka posaapon kodunia naikon masadai, ‘Bulaando ko TEMENENO mokubaiyo bunodoiya konapo lipu? Oila kosababpo yana motodudul nggimal bunodoiya?’

²⁵Tukon kopotimbilino doiyamo, ‘Sabab yanila upakenemo ko TEMENENO naperjanjian, napoo mbumbu na Mian Bisa; mo kubaiyo koperjanjian tukon yanila doi tempo yana babayo yanila tobuat luwedoi Mesir.

²⁶Yanila mangangga doi temeneno-temeneno bailon mo aki napoo tingoniiyo, baanggokai TEMENENO pantane yanila mososubaiyo dotemeneno-temenenodoo.

²⁷Doiyamo kosababpo ko TEMENENO nanggimoliiyano konamian tukon lubatene doi napoo tano sasaibino kosilakaan mo totulis doi buku nia lalomo.

²⁸Ko TEMENENO nanggimalan tokita tukon hebat tuuno, tukon doi nanggimalan lalomo mobabasal yana biyele ko bangsa Israel luwedoi napoo tano tukon sakukene yanila doi tano moodoon sampe yanila daano indaa.’

²⁹Daano kobubula kolangge TEMENENO nda Mian Bisa mo lahasiakanggene; bai konahukum lapamo nyatakanggene doi kita, tukon kita maka nda tulunan sio nda taatio tuuk sidutu-posidutukon.”