Read Banggai KUAIKON 3 Bible Online

KUAIKON 3 - Banggai bible

KUAIKON 3

¹“Doibundu kita ampakon doi lembet badombalaakon doi lipu Basan. Og, Tomundo Basan ampakon maju tukon sasaibino konasuludadu tuuk molobosiyo kita loolani kokota Edrei.

²Bai TEMENENO bantile doiyaku, ‘Inai matakut doi yana, Musa. Yaku naikon salakanggene yana, nasuludadu tukon sasaibino konalipu doi komuyu. Pokubaiyomokai yana buno konakubaiyano ko Sihon, tomundo Amori mo maparentah doi Hesybon.’

³Jadi ko TEMENENO nda Mian Bisa salakanggene koidan ko Tomundo Og tukon namian doi kita, tukon yanila sasaibino kita lungguiyo.

⁴Doi tempodoo kita lambase sasaibino konakota, akiyokai komeeng komo totinggal. Sasaibino daano noom kolono kokota kita mo lambase doi posaapon ko Argob lipuno, Tomundo Og mo parentayo luwedoi Basan.

⁵Sasaibino dokotadoo minokubaikon pagar betoon mo moonggol tukon mo tatandak, tukon tataapon-tataapono mo babasal tukon tataapon posupato tuuk potutupo dotataaponoo mo babasal. Sangalaasan doiya daano badaang kokota bailon mo akiyo kopagalo mo binetoon.

⁶Sasaibino dokotadoo kitamanase kabus, tukon sasaibino komalane, moluko tukon konapoo pau-pau kita akateo, bunomo konda kubaiyano Tomundo Sihon nakota-kota mo luwedoi Hesybon.

⁷Konapoo iyayon piniala kita alayo tukon kita lambase dokota-kotadoo.

⁸Doi tempodoo kita alayo luwedoi loluakon tomundo Amoli ko lipu taalikon doi tolopot ko Yordan Paisunobatango tukon Arnon Paisunobatango polong doi Hermon Bunggulo. (

⁹Hermon Bunggulo Sidon miano sombuikene Siryon, tukon Amori miano sombuikene Senir.)

¹⁰Kita alayo sasaibino ko Tomundo Og nalipu luwedoi Basan: kokota-kotano doi pepelakon motatandak, Gilead tukon Basan lipuno, banggadudul doi tolopot popupuson kokota Salka tukon Edrei.” (

¹¹Tomundo Og daanokai Refaim miano modoibundukon. Kodialano kinubai luwedoi batu, konakobulus sangkap kometer tukon konakebelan kabi lua kometer mololoi ukulan motinatapkanggono. Polong diabudodoo daano moola kinita doi Laba, Amon miano nakota.)

¹²“Salataa dotanodoo tealimo koonggita, kolipu taalikon doi lembet kokota Aroel loolani ko Arnon Paisunobatango, yaku beekenemo doi Ruben tukon Gad nabenseno tukon soobos kolipu mobunggukon doi Gilead, tongusokon kokota-kotano.

¹³Doi Manasye nabenseno sembeleng, yaku beekenemo Gilead lipuno labino, tukon koidan Basan lipuno Og nalipu kinuasai looluk, doiyamo posaapon ko Argob lipuno.” (Ko Basan totoimo salaku Refaim miano natano.

¹⁴Yair luwedoi Manasye nabenseno alayo posaapon ko Argob nalipu, doiya luwedoi Basan polong doi napokalalatanan ko Gesul tukon Maakha. Yana sombuikene dokampung-kampungoo pokakana kosambuno susuungo, tukon polong diabudodoo daano mototoi salaku Yair nakampung.)

¹⁵“Gilead lipuno yaku beekene doi Makhil pulino luwedoi Manasye nabenseno.

¹⁶Tukon doi Ruben bense-benseno tukon Gad yaku beekene kolipu napokalalatanan ko Gilead tukon Arnon Paisunobatango. Dopaisudoo batango tangano doiyamo kona pokalalatanan taalikon doi lalom, sabeakai doi lembet yanila napokalalatanan doiyamo tukon Yabok paisuno batango, kosongobos doiyamo kalalatan Amon miano nalipu.

¹⁷Taalikon doi talise, donapoolipudoo tobuka bebelan polong doi Yordan Paisunobatango luwedoi Galilea paisuno doi lembet polong doi Tobun Mate taalikon doi lalom, banggadudul polong doi Pisga bunggulo uuno taalikon doi tolopot.

¹⁸ Doi tempodoo yaku beekene doi yanila naparentah nia: TEMENENO mu Mian Bisa beekene doikoo lipu taalikon tolopot ko Yordan Paisunobatango, sulano nateali mulipu dungolan. Bai komu suludadu-suludadu sio namapake sinapan tukon pintosiiyo ko Yordan Paisunobatango loolukiyo ko Israel bense-benseno bailonggon.

¹⁹Tongo mupau tukon muboloki maka muiyayon mo badaang moola mutinggale doi kota-kota mo lapamo yaku beekene doi komuyu.

²⁰Tomboniiyo komian-mian mopokakana komu bangsa polong yanila dungoliyo kobuta naikon ko TEMENENO mu Mian Bisa mobeekene yanila taalikon doi talise ko Yordan Paisunobatango tukon ko TEMENENO moolakene yanila tubo tukon aman indaa, pokakana kona kubaiyano ikoo dimbaa. Kalu lapamo doiya komuyu moolamo abali doi potano mo lapamo yaku beekene doi komuyu.

²¹Maka yaku bantile doi Yosua: Ikoo kitayomo sasaibino ko TEMENENO mu Mian Bisa nakinubai motuuk doi Sihon tukon Og, dotomundodoo moluaila. Bunomo doiya koidan kona kubaiyano sasamba kotomundo ikoo mo lambase konatano.

²²Inai matakut doi yanila, sabab ko TEMENENO mu Mian Bisa naikon kakaate tuuk doi komuyu.”

²³ “Doi tempodoo yaku kabiyo doi TEMENENO:

²⁴Oh TEMENENO Moinakatandak Tuuno, yaku toiyo baikon komu tinudoikon doiyaku nia sodo buno pokakana natambuunan luwedoi mukokubai-kokubai mo babasal tukon mo minasaindinggon. Akiyo kotemeneno bailon doi timbu maukai doi dunia mo buno Ikoo momoola lakukene kolangge-langge mo minasaindinggon.

²⁵Pataikanakumokai mopintosiiyo ko Yordan Paisunobatango, oh TEMENENO, sulano kumokita tano mo molumbang doi lipu mo bunggukon tukon mo tambongan doi Libanon bunggul-bunggulo sembeleng.

²⁶Bai komuyu mangaanikenemo ko TEMENENO nggimoliiyaku tobikon yana aki naiyase talimayo daku kakabi. Bai ko TEMENENO tongo bantile, ‘Sukupokai Musa, inaimokai mobantile dosoaloo koidan!

²⁷Tausokai doi Pisga bunggulo sulleano tukon mbalengekai taalikon doi lembet tukon lalom, doi tolopot tukon doi talise. Kiteesekai namono-monondok oila domu kinitadoo, sabab ikoo aki naikon mupintosiiyo ko Yordan Paisunobatango.

²⁸Beenakai otunggul-otunggul doi Yosua. Keenggele konoano, sabab yanamo naikon komo andane dobangsadoo moampakon sulano nadungoliyo dotanodoo ikoo mokitayo.’

²⁹Maka kita dungolo doi kota Bet-Peol Pepelako sembeleng.”