Read Banggai KUAIKON 30 Bible Online

KUAIKON 30 - Banggai bible

KUAIKON 30

¹“Doibundu komuyu lilike antara balakaat tukon katula pokakana daku tinalangkanggon doi komuyu. Kalu komuyu toupiyomo sasaibino dosakisaawanoo tukon komuyu podunguli kobangsa-bangsa molulubaton doi lipu TEMENENO mu Mian Bisa napoalaasanano komuyu, komuyu naikon neneeke doku linilikoo yaku mo beekene doi komuyu.

²Kalu komuyu tukon muturunan yase abali doi TEMENENO mu Mian Bisa, tukon sasaibino konoamu taatio koparentah-parentah yaku mo beekene doi komuyu oloyo nia,

³maka ko TEMENENO mu Mian Bisa naikon seseange komuyu. Komuyu naikon binaba abali koidan luwedoi bangsa-bangsa doi inaando kopoo pinoalaasonan, tukon tinealikon monondok koidan.

⁴Maukai potopobandakon doiyayaa doi posaapon kodunia, ko TEMENENO mu Mian Bisa naikon pototongikene komuyu tukon babayo komuyu abali.

⁵Maka komuyu alayo koidan kobuta loolukoo tumbumuyu nadungolan. Tukon komuyu tinealikon lobian sanaang, tukon koaitomuyu mododoon kona posasalaan luwedoi tumbumuyu aito.

⁶Komuyu tukon potununan naikon binee noa molole, sampe komuyu kilakene ko TEMENENO mu Mian Bisa tukon sasaibino konoamu tukon moola dungol banggadudul doilipudoo.

⁷Sasaibino dokatuladoo naikon yana otuenge doi mumusu-musu bunggono mo mosikitene tukon mo dadaate komuyu.

⁸Komuyu naikon abali taatio ko TEMENENO tukon ampakonggene sasaibino konaparentah yaku mo beekene doi komuyu oloyo nia.

⁹Ko TEMENENO mu Mian Bisa naikon kubaiyo sasaibino komuusaha nadaano kohasilo; komuyu naikon motooli badaang kopau tukon badaang ko iyayon mopiniala; komu asi-asi naikon badaang tuuno kohasilo. TEMENENO tukon sanaang konoano tealikene komuyu sanaang, buno yana koidan sanaang mobeekene kona monondokan doi tumbumuyu.

¹⁰Bai sio potaat doi TEMENENO mu Mian Bisa tukon loingiyo sasaibino konahukum mo totulis doi buku nia lalomo, buku TEMENENO Nahukum. Komuyu sio poabali doi yana tukon sasaibino konoamuyu.

¹¹Koparentah yaku mo beekene doi komuyu aki natodudul sulit doikoo tukon koidan aki natodudul modoon.

¹² Konatangabosan bolikon doi timbu, sampe komuyu masadai, ‘Indee naikon komo tolibo indaa sulano namangalakene kita, sulano nda moola molongol tukon nda taatio?’

¹³Konatangabosan bolikon koidan doi tobun sembeleng, sampe komuyu masadai, ‘Indee naikon komo badombalaakon tobunoo sembeleng sulano namondokikene kita, sulano ndamondongolii tukon taatio?’

¹⁴Inai momasadai buno doiya, sabab doparentahdoo loolani tuuno doi komuyu. Komuyu lapamo toiyo tukon moolamo pobantile maunaaki poapale, jadi bainokai polakukanano tolong.

¹⁵Oloyo nia komuyu moola lilike antara mo monondok tukon molokis, antara tubo tukon mate.

¹⁶Oloyo nia yaku palentayo komuyu sulano pokilakene ko TEMENENO mu Mian Bisa tukon taat doi yana maka lakukene sasaibino konahukum tukon naparentah sulano posanaang tukon teali bangsa mo babasal. Ko TEMENENO mu Mian Bisa naikon balakaatio komuyu doi tano mo akimo namalumbit koidan komuyu dungoliyomo.

¹⁷Bai kalu aki potaat tukon aki poiyase mondongoliiyo, tukon batadikene kobutomu nainatapa sulano nasosubaiyo kotemeneno-temeneno bailon,

¹⁸tutuumo komuyu sinilakaimo, tukon aki pomonunut doi tano moakimo namalumbit koidan komuyu dungoliyomo. Nenekekai! Dolanggedoo lapamo yaku botiikene doi komuyu oloyo nia.

¹⁹Doibundu moola polilike antara tubo tukon mate, antara TEMENENO nabalakaat tukon nakatula. Kotimbu tukon buta yaku uange teali sakisii doi mukaputusan. Lilikemo kotuboan.

²⁰ Kilakene ko TEMENENO mu Mian Bisa, taatio yana, tukon setia doi yana. Maka komuyu tukon muturunan naikon tubo tukon moloas kopoo umur doilipu TEMENENO mo dondiikenemo doi tumbumuyu, Abraham, Ishak tukon Yakub.”