Read Banggai KUAIKON 31 Bible Online

KUAIKON 31 - Banggai bible

KUAIKON 31

¹ Musa basilingan koidan doi bangsa Israel, bantile, “Diabudodoo dakuumur sakato luakolono kotaun molapa tukon akimo kutendenge koidan mokatuaiyo komuyu. Sangalaasan doiya koidan ko TEMENENO lapamo bantile baikon yaku akimo namoola pintosiiyo ko Yordan Paisunobatango.

³Ko TEMENENO mu Mian Bisa susuungo naikon ampakon doi salaamu tukon lopuwo kobangsa-bangsa mo dungol idoo, sampe komuyu moola dungoliyo konapoo buta. Yosua naikon teali mokotuaiyo komuyu, buno TEMENENO nabinantil.

⁴ Ko TEMENENO naikon lopuwo dobangsa-bangsadoo, buno nalungguiyano ko Sihon tukon Og, Amori miano natomundo, maka namanase konapoo lipu.

⁵TEMENENO naikon beena komuyu kamanangan doi yanila, maka komuyu sio polakukene yanila tapaat buno daku binantil doi komuyu.

⁶Siokai namoonggol konoamuyu tukon barani! Inai momatakutene doi yanila, sabab ko TEMENENO mu Mian Bisa susuumu naikon komo tomboniiyo komuyu. Yana aki naikon natealikene komuyu manasal kai otinggale.”

⁷Maka Musa uange Yosua, tukon doi sasaibino ko bangsa Israel salaano yana bantile doi yana, “Siokai namoonggol konoamu tukon barani, Yosua! Ikoomokai naikon komo katuaiyo nabangsa nia sulano nadungoliyo kotano TEMENENO mo dandikenemo doi pombumbu.

⁸ Ko TEMENENO susuungo lolainge tukon tulungiyo ikoo. Yana aki naikon nabatadikene mumanasal kai otinggale ikoo. Tobikon doiya inaimo momatakut kai mbombokon.”

⁹Maka Musa tulise ko TEMENENO Mian Bisa nahukum tukon beekene doi imam-imam Lewi mo balimang tuuk ulusiyo ko Peti Perjanjian, tukon doi sasaibino ko Israel katuano.

¹⁰ Yana maparentahkene doi yanila, “Doi pangabisan samba kotaun kopituno, taun lalomo nainopusan kosamea doi lamean Basabuaan,

¹¹komuyu sio pobasakene nahukum-hukum nia tukon alal mo babasal doi Israel miano mo badaang mo lubat sosuba doi TEMENENO mu Mian Bisa doi lipu yana mo lilikemo.

¹²Sumboliiyo sasaibino komala-malane, moluko tukon pau-pau maka mian lulubaton mo dungol doi mukota-kota napototongi sulano namolongoli domo binasadoo, sulano napomonggiotunggukon doi odotiiyano ko TEMENENO mu Mian Bisa tukon setia motaatiyo kona parentah-parentah.

¹³Tukon dokokubaidoo komu pau-pau mo akiyoon nabiasa molongoli TEMENENO mu Mian Bisa Nahukum moola namondongolii tukon monggiotunggukon koodotiiyano ko TEMENENO doi nadaanoan yanila motubo doi tano moakimo namalumbit koidan komuyu modungoliyomo doi Yordan Paisunobatango sembeleng.”

¹⁴Doibundu TEMENENO bantile doi Musa, “Komutuboan akimo koidan namalumbit. Jadi uangemo Yosua tukon babayomo yana doi Kusandung, sulano kumoola beena potu-potudoikon doi yana.” Maka tauso Musa tukon Yosua doi TEMENENO nasandung,

¹⁵maka ko TEMENENO okitakene kobutongo doi yanila doi bunom sudongo lalomo loolani ko sandung tataapono.

¹⁶TEMENENO bantile doi Musa, “Komumatean loolanimo. Salataa lapa komu tausan, kobangsa Israel akimo koidan nasetia doiyaku tukon akiyenggene koperjanjian yaku mo kubaiyo tukon yanila. Yanila naikon tinggalemo yaku tuuk sosubaiyo ko temeneno-temeneno mo sinosubai doi tano mo akimo namalumbit koidan yanila usokiyomo.

¹⁷Kalu doiya teali, daku nggimalan naikon tokumbe tuuk doi yanila. Yaku naikon tinggale yanila tukon yaku akateo kabus. Badaang kosusah mo babasal naikon molubotiiyo yanila, maka yanila naikon tingoniiyo baikon sasaibino doiya teali sabab yaku, napoo Mian Bisa akimo koidan naloolainge yanila.

¹⁸Doi tempodoo yaku akimo kuiyase motulungiyo yanila, sabab yanila sosubaiyomo kotemeneno-temeneno bailon tukon mokubai lokis.

¹⁹Diabudodoo tulisemo nanyanyian nia tukon otunggukene doi bangsa Israel salaku kasaksian motuuk doi yanila.

²⁰Yaku naikon babayo yanila doi tano mo kaasa tukon molumbang, buno daku dinondiikon doi napoo mbumbu. Idoo yanila naikon tubo tukon sanaang tukon malaat sasaibino kokinaan yanila mo palaluuwo. Bai doibundu yanila naikon abali tukon sosubaiyo kotemeneno-temeneno bailon. Yanila naikon tolayo yaku tukon akiyenggene daku perjanjian,

²¹tukon badaang kosusaan mobabasal naikon mo lubotiio yanila. Bai nanyanyian nia naikon tataap minananikon tukon pinake teali kasaksian mo tuuk doi yanila. Tobikon diabudoo, akiyoon kubabayo yanila doi tano yaku mo dondiikene, yaku toiyo konapoo pinikikon.”

²²Doi oloyodoo koidan Musa tulise donanianoo, maka naotunggukene doi bangsa Israel.

²³ Doibundu ko TEMENENO basilingan doi Yosua, Nun napau, kona bantilano, “Siokai namoonggol konoamu tukon barani, Yosua! Ikoo naikon katuaiyo kobangsa Israel mousokiyo kotano yaku mo dondiikene doi yanila, tukon yaku naikon tulungiyo ikoo.”

²⁴Maka Musa tulise ko Mian Bisa Nahukum doi meeng kobuku lalomo. Yana tulise tukon teliti luwedoi natambuunan polong doi napupusan.

²⁵Salataa lapa, yana bantile doi sasaibino ko imam Lewi mo balimang tuuk ulusiyo ko Peti Perjanjian,

²⁶“Alayomo ko TEMENENO Nabuku Hukum nia, tukon binggakene doi TEMENENO mu Mian Bisa Napeti Perjanjian sembeleng, sulano natataap daano idoo salaku kasaksian motuuk doi bangsadoo.

²⁷Yaku toiyo yanila todudul matikas konoano tukon yase banggabut. Maukai nadaanoon yaku motubo, yanila nggimal doi TEMENENO, baimokai naikon kalu yaku mate!

²⁸Diabudodoo sumboliiyomo sasaibino kobangsa katuano tukon sasaibino kosuludadu kapalano napototongi doi salaanggu, sulano kumoola pelenggene nalangge-langge nia doi yanila. Timbu tukon buta yaku uange teali sakisii mo tuuk doi yanila.

²⁹Yaku toiyo baikon kalu yaku matemo, mian badaangoo naikon teali lokis tukon tolayo oila komo lapamo yaku otunggulikene doi yanila. Tukon naikon koidan kosusaan lubotiio yanila, sabab kubaiyo nggimal ko TEMENENO tukon lakukene oila komo pinantanggon.”

³⁰Doibundu Musa bantile nanyanyian nia polong kabus tukon daanoon sasaibino kobangsa Israel mondongoliyo.