Read Banggai KUAIKON 32 Bible Online

KUAIKON 32 - Banggai bible

KUAIKON 32

¹“Ndongoliiyo, oh timbu, yaku yase mobasilingan; oh dunia, ndongoliiyo namono-monondok!

²Boliisi daku otunggul naloboson buno udan, tukon Daku bantilan-bantilan natutulo buno soilu, bunokai udan ndendek doi bulung bunggono, tukon udan babasal doi lobo mosinakakon bunggono.

³Yaku naikon nggaale ko TEMENENO sambuno. Babotilanggenekai konda Mian Bisa nababasalan!

⁴Ko TEMENENO mo Tambongan tukon barani doiyamo komu potombonii kona limang talakana, tukon sasaibino konaloloon adil. Komu Mian Bisa setia, akiyo kona supetan konoano, Yana kubaiyo kolobo momonondok tukon mo bisa.

⁵Bai komuyu daanoon bangsa moaki nasetia, tukon aki napantas koidan teali Namian, bangsa mo akiyo kona kojujulan tukon baladosa,

⁶Bunomokai doiya kopoo balasano ko TEMENENO namonondokan, oh mian badaang mo longas tukon akiyo kona pikilan? Bolikonkai Yana Tamamu, Mopasitakayo ikoo, motealikene komuyu meeng kobangsa?

⁷Neneekekai koloonu loolukoo, palahatikanggene komian-mian motubo doi lounudoo. Masadaikene doi muolan tua, sulano yanila napopitoikene doi komuyu.

⁸ Salataa ko Mian Bisa ebese kotano, sasamba kobangsa tinantukon konalipu bataso tukon meeng kotemeneno salaku mokuasaiyo.

⁹Bai yakub natulunan nia TEMENENO lilike buat butongo susungo.

¹⁰Yana laate yanila daano mo lausala doi lipu mo kiis doi padang lalomo. Maka Yana dagaiyo tukon pialayo yanila tukon dagaiyo yanila buno koona.

¹¹Buno tomisi alai mo otunggule konapau mo benga yana lakoyo doi kapilo mo tebeleka tukon yana abese doi kapi-kapilo bunggono,

¹²bunomokai doiya ko TEMENENO susuungo nakatuaiyano konamian, akiyo kotemeneno bailon mo lolainge Yana.

¹³Yana kubaiyo yanila kuasaiyo kobunggul-bunggul; yanila makaan asi-asi hasilo tukon monginum dokot mo luwedoi batu bunggono. Yanila malaat lisison mo luwedoi zaitun batango mo tubo doi lipu mo batuon.

¹⁴Konapoo saapi tukon mbembe domba badaang kosusuno paisuno; konapoo iyayon piniala monondok tuuno konapoo gandum tukon anggur paisuno monondok tuuno.

¹⁵Ko TEMENENO namian teali kaasa, bai yase nggimal yanila molonokii, tukon kaan bobosul. Maka yanila tinggale ko Mian Bisa, Mopasitakayo yanila tukon tolayo Konapasalamat motambongan barani.

¹⁶Yanila sosubaiyo kopilogot, sampe ko TEMENENO mosikitene yanila, tosuungi Konanggimalan sabab dokulokisanoo.

¹⁷ Yanila sosubakene konapoo sosubakon doi roh-roh molokis mobolikon Mian Bisa, doi ilah-ilah yanila mo aki natingoniiyo, ilah-ilah boolu mo aki napoo mbumbu namatakutene.

¹⁸Yanila lailainggene konapoo Pasalamat, motambongan tukon mobarani, toliminggene donapoo Mian Bisa mo beena tuboan.

¹⁹Kitayo dolanggedoo, ko TEMENENO teali nggimal, tukon tolayo konapau-pau.

²⁰Konabantilano, ‘Yaku aki kuiyase motulungiyo yanila koidan; Yaku batadikenemo bulaando konapoo tuboan oloyo doi bundu. Sabab dobangsadoo matikas konoano tukon koidan aki nasetia tutuuno.

²¹ Yanila kubaiyo yaku mosikitene doi mobolikon Mian Bisa, tukon nggimoliiyo doi napoo pilogot timbalango. Maka Kukubaiyo Daku mian mosikitene doi mobolikon bangsa, tukon nggimoliiyo doi bangsa mo longas.

²²Daku nggimalan naikon tuboimo buno aung mokolot mokopule polong doi mian mate nadunia. Doaungoo suayo kobuta tukon sasaibino kohasilo, tukon bunggul-bunggul polong doi anggol-anggolo.

²³Banggadudul momeeng Kulubatene kosilakaan, Kupanakene sasaibino Daku panah doi yanila.

²⁴Yanila naikon mate sabab maligoot tukon malaalan, tukon sabab panakit mo minatakuton. Yaku batadikene yanila iyayon mobarani mosokuwo, tukon binda mo upason nasokuwo.

²⁵Kopoolobosian babayo komatean doi loloon-loloon; komatakutan lubotiio komian badaang doi bonua. Kotatabo tukon pau boine mongula naikon inakabuso, tukon koidan kopau lumboon tukon mian mo motuamo tuuno.

²⁶Yaku yase mo akabuse idan yanila, sulano yanila akimo naninonook koidan.

²⁷Bai aki Kuiyase ko Israel miano namusuh mobabanggaal; inai-inai napoo sanggayo sala tukon bantile baikon yanila lungguiyo Daku mian,’ baanggokai Yakumo komo lakukene.

²⁸Ko Israel meeng kobangsa mo akiyo kona palatimbangan; tukon kopangalatian akiyo doi yanila.

²⁹Kalukai yanila pandoi, yanila naikon mangalati, tukon pikikene konapoo tuboan oloyo doi bundu.

³⁰Bulaando komeeng komian momoola lelenggene sololoon komian, tukon lua komian kubaiyo moobulen kosongulo kololoon komian? Ko TEMENENO, yanila na Mian Bisa, lapamo balukene yanila; ko Mian Bisa motambongan barani otinggalemo yanila.

³¹Ko Israel namusuh toiyo baikon komo dagaiyo yanila aki nabuno Mian Bisa mo dagaiyo ko Israel.

³²Sabab yanila kulokis buno Sodom tukon Gomora, buno anggur batango mo mosopot tukon saono mo daano kolasumo.

³³Konapoo anggur paisuno buno binda mo daano koupaso mo daano kolasumo.

³⁴TEMENENO neneeke Konamian namusuh nakokubai tukon naikon hukume yanila doi tempono.

³⁵ TEMENENO naikon balese tukon hukume yanila, akimo namalumbit koidan yanila tuwongo mosilaka; konapoo linopuan kabus mosobito kotempono.

³⁶ TEMENENO naikon salamatene Konamian, tukon seseange Kona ata-ata, kalu Yana kitayo yanila akiyono konapoo balaanan tukon akimo nabukuan.

³⁷Maka ko TEMENENO naikon masadai doi Namian ‘Inaando kotemeneno-temeneno mo bukuan komuyu mo balaanggene?’

³⁸Yanila makaan inak komuyu mososubakene, tukon monginum anggur paisuno komuyu mososubakene. Sumboliiyo yanila nalubat mo tulungiyo komuyu, sulano nateali mupotombonii.

³⁹Kitayokai, Yaku Mian Bisa mo Meeng, akiyo ko Mian Bisa mo sangalaasan Yaku. Yaku mangakate tukon mongotuboi, pokoloniyo tukon aline. Kalu Yaku mokubai tindakan, akiyokai komeeng komian mo moola lawane.

⁴⁰Tongo yaku susunggu, ko Mian Bisa mo tubo, Kutidekene kolimanggu maka Kubatotopi:

⁴¹Yaku naikon bilase daku sabel mo didilengan, tukon ambakonggene kohukuman. Yaku balese sasaibino Daku lawan tukon Yaku hukume sasaibino komo mosikitene Yaku.

⁴²Daku panah-panah naikon mbetak tukon saunoila; sasaibino komo lawanaku Yaku akateo tukon Kusabel. Aki Kusodiinggene indeekai komo lawana-Ku; komian mo tinaan tukon mo pako-pakolon sio namate koidan.

⁴³ Oh bangsa-bangsa, nggaale ko TEMENENO namian, sabab ko TEMENENO hukumemo sasaibino komo akateo yanila. Yana balese kona musuh Nabatuulikanano bai ompunio Konamian nalalim.”

⁴⁴Musa tukon Yosua Nun napau basilinganggene donanianoo, sampe sasaibino kobangsa Israel moola namondongolii.

⁴⁵Salataa lapa pelenggene ko TEMENENO naotunggul-otunggul doi bangsa Israel,

⁴⁶Musa bantile, “Popalaatikanggenekai sasaibino koparentah Yaku mo beekene doi komuyu oloyo nia. Otunggulikene doi mupau-pau, sulano yanila tukon setia nalakukene sasaibino ko TEMENENO nahukum.

⁴⁷Dootungguloo bolikon bantilan-bantilan mo kala, baikai bisa. Taatiyokai sasaibino doparentahdoo, sulano potubo monunut doi lipu mo akimo namalumbit koidan komuyu modungoliyomo doi Yordan Paisunobatango sembeleng.”

⁴⁸ Doi oloyodoo koidan ko TEMENENO bantil doi Musa,

⁴⁹“Tausokai doi Abarim bunggulo doi tano Moab doi kota Yerikho sembeleng. Maka tolibomokai doi Nebo bunggulo tukon mbalengekai kotano Kanaan moakimo namalumbit koidan yaku salakanggenemo doi bangsa Israel.

⁵⁰Ikoo naikon mate doi bunggulo bunggono, buno Harun utusomu mo mate doi Hor Bunggulo.

⁵¹Komuyu looluakon aki posetia doiyaku tukon aki poodotiiyaku doi bangsa Israel salaano doi tempo podaanoan doi Meriba paisuno matano, loolani kokota Kades doi Zin padang lalomo.

⁵²Tobikon doiya ikoo aki namoola usok doi lipu Yaku mobeekene doi bangsa Israel; ikoo tongo moola mbalenge luwedoi namododoonan.”