Read Banggai KUAIKON 33 Bible Online

KUAIKON 33 - Banggai bible

KUAIKON 33

¹Akiyoon namate, Musa Mian Bisa nabito-bito, balakaatio ko bangsa Israel tukon bantilan-bantilan nia:

²“TEMENENO lubat luwedoi Sinai Bunggulo; Yana sumbot doi Edom bunggono buno oloyo matano tukon luwedoi Paran Bunggulo Yana laangiyo Konamian. Songulo koloon komalaekat lolainge Yana; koaung kolot doi bakalingano sembeleng.

³Bisa, ko TEMENENO seseange Konabangsa Yana lindungiyo sasaibino Komian moteali koona. Maimo nda sosuba doi aino salaano tukon taatio Kona parentah-parentah.

⁴Kita taatio Musa nahukum bineekon, nabangsa nia daano koanggano tuuno.

⁵Doi tempo ko Israel napototongian tukon sasaibino kona katua-katua; ko TEMENENO teali Tomundo doi Namian.”

⁶Ruben benseno kaliangano Musa bantile, “Boliisi Ruben benseno aki naikon nasilaka, maukai konamian natongo soisik.”

⁷Tentang Yehuda nabenseno yana bantile: “TEMENENO, lengelekai Yehuda nakakabi; pomeenggenekai yanila koi-koidan tukon nabangsa. Alamokai doi yanila doi tempo poolobosian, oh TEMENENO, tulungiyokai yanila tuuk doi napoo musuh-musuh.”

⁸ Tentang Lewi benseno yana bantile: “Tukon patanggal nabisaan Ikoo nyatakanggene Komu mongiasan, mololoi Lewi miano, Muata mo setia. Ikoo lapamo sobaiyo yanila doi Masa, tukon podangaani yanila doi Meriba paisuno matano.

⁹Yanila setia doi Komuyu lobioniiyo kolobo sasaibino, lobioniiyo koorang tua tukon motolutusan. Yanila taatio Komu parentah-parentah, Komu perjanjian yanila tapaatiyo.

¹⁰Yanila otunggule Komu mian nataatio sasaibino Komu parentah tukon sosubakene kososubakon doi balabaan Komu bunggono.

¹¹TEMENENO, tulungiokai nabenseno nia sulano nabukuan, boliisi Mupokonoi doi napoo limang. Lopuwomo kabus konapoo musuh sulano naakimo namoola tubo koidan.”

¹²Tentang Benyamin nabenseno yana bantile: “Naiyamo ko TEMENENO nabenseno sineang. Yana lindungiyo yanila oloyo tukon popook tukon podungoli yanila.”

¹³Tentang Yusuf natulunan yana bantile: “Boliisi ko TEMENENO nabalakaatio konapoo tano tukon udan, tukonkai paisu mo luwedoi buta tambikon doi bilit.

¹⁴Boliisi nasamba kolounu nabadaang kolangge sao-saono sao-saono mo monondok mo moyoo doi batango.

¹⁵Boliisi kona bungkuko-bungkuko luwedoi lounu tumbeno moono tukon buta hasilo mo istimewa.

¹⁶Boliisi konabuta linobiyonii tukon sasaibino komo monondok tuuno, yana binalakaati tukon TEMENENO namonondokan mo basilingan luwedoi laing mo kolot. Boliisi dobalakaatoo naloboson doi Yusuf natulunan bunggono, sabab yanamo komo katuaiyo koutus-utuso.

¹⁷Yusuf daano konabukuanan buno meeng kobanteng, tukon saapi lobo langgilo tanduko doiyamo sololoon Manasye natulunan tukon songulo koloon Efraim natulunan. Yana tanduke kobangsa-bangsa tukon susunggene polong doi buta bunduno.”

¹⁸Tentang Zebulon bense-benseno tukon Isakhar yana bantile: “Boliisi Zebulon nakaasa sabab naampa-ampakonan, tukon Isakhar monondoko doi nasandung-sandung.

¹⁹Yanila koloyo kobangsa-bangsa doi napoo bunggul tukon sosubakene kososubakon mo bisa indaa. Yanila malaat kaasaan luwedoi tobun, tukon luwedoi bone napupusan kotobun bibilo.”

²⁰Tentang Gad benseno yana bantile: “Tanggaalo ko TEMENENO mo koloase Gad nawilayah. Gad mototiili buno meeng kosinga yana yase mobendinge kobotokono kai oluno kulito.

²¹Yana alayo kobuta momonondok tuuno tuuk doi butongo susuungo kobakatuaian sinalakanggon doi yanila. Yanila lakukene sasaibino koparentah tukon TEMENENO Nahukum doi tempo sasaibino ko Israel katuano pototongi posinggat.”

²²Tentang Dan nabenseno yana bantile: “Dan buno meeng kosinga mongula mo suut sumbot luwedoi Basan.”

²³Tentang Naftali benseno yana bantile: “Naftali linobiyonii tukon balakaat tukon TEMENENO naseang; konalipu luwedoi Paisu Galilea polong doi lalom.”

²⁴Tentang Asyer benseno yana bantile: “Asyer benseno binalakaati lobioniiyo kobense-benseno bai-bailonggon; boliisi koutus-utuso nateali seseange yana, tukon ko zaitun batango natubo molumbang doi natano.

²⁵Boliisi kona kota-kota nalinindungi tukon tataapon-tataapon tambaga tukon besi mo babasal sulano konatuboan nasidutu aman tukon tanaang.”

²⁶“Oh Israel! Akiyo ko ilah mo buno mu Mian Bisa; yana pintosiiyo kotimbu tukon monondok tukon duduwo kobunom tuuk tulungiyo komuyu.

²⁷Mian Bisa sidutu teali mupolindung, kobotokono tumbake komuyu posidutukon. Yana siikayo komusuh luwedoi salaamu, tukon sumboliiyo poakateyo kabus yanila.

²⁸Maka Yakub natulunan naikon tubo tukon tanaang doi tano mo badaang kogandum tukon naanggur paisuno, tukon mombinetokii soiluk mo luwedoi timbu.

²⁹Kinatauwankai ikoo, oh Israel! Akiyo kobangsa mo buno ikoo TEMENENO mosalamatene. Ko TEMENENO buno sabel tukon tombide doikoo; tuuk belayo ikoo tukon beena manaangan ikoo. Mumusu-musu naikon lubat makabi soyang tukon ikoo naikon tuda-tudange yanila.”