Read Banggai KUAIKON 4 Bible Online

KUAIKON 4 - Banggai bible

KUAIKON 4

¹Maka Musa bantile doi bangsadoo, “Loingiyomo sasaibino kohukum yaku mo otunggulikene doi komuyu, sulano pomoola tubo polong modungoli tano naikon TEMENENO, mumbumbu na Mian Bisa mobeekene doi komuyu.

² Oila daku pinalentahkon, inai nasinuungi kai mbineengi maunatongo soisik. Loingiyomokai ko TEMENENO mu Mian Bisa naparentah, yaku mo beekene doi komuyu.

³ Komuyu susuumuyu kitayo oila komu TEMENENO nailakukon doi Peor bunggulo. Samba komian mo sosubaiyo ko Baal doi lipudoo inakate kabus,

⁴bai komuyu motataap setia doi TEMENENO mu Mian Bisa daano motubo polong diabudodoo.

⁵Sasaibino dohukumoo yaku otunggulikene doi komuyu pokakana ko TEMENENO ku Mian Bisa napinalentahkon doi yaku. Loingiyomo sasaibino doiya doi lipu komuyu naikon mousokiyomo tukon dungoliyodoo.

⁶Lakukenemo doiya tukon setia. Kalu komuyu kubaiyo buno doiya, maka komu pandoian teali tokita doi bangsa-bangsa bailon. Kalukai yanila mondongolii dohukum-hukumoo kaliangano, yanila naikon bantil, ‘Bukan maen kona pandoian tukon natololongolan dobangsa mobabasaloo!’

⁷Inaandokai kobangsa mo babasal mo daano kona ilah mo buno doiya kona loolanian tuuno kalukai pinalaluu buno nda TEMENENO moloolani doi kita? Yana timbiliyo kita doi sasamba kotempo kalu kita makabi tulung doi Yana.

⁸Tukon indeemokai kobangsa mo babasal modaano kohukum-hukum mobuno doiya kona adilan pokakana kuhukum-hukum yaku mootunggulikene doi komuyu oloyo nia?

⁹Okiteese tukon neneekekai tutuuno, sulano komuyu pomatekon aki potoliminggene oila komo lapamo komuyu sakisiiyo susuumuyu. Salitaikene doi mupau tumbu

¹⁰tentang dooloyodoo salataa pokokondongan doi TEMENENO mu Mian Bisa salaano doi Sinai Bunggulo. Doi tempodoo yana bantile doi yaku, ‘Pototongikene dobangsadoo. Yaku yase yanila namolongol oilamo Daku pinolonggon, sulano napoo inotunggul taatan doi Yaku pomatekon, tukon sulano yanila naotunggule konapoo pau-pau koidan sulano nataat doi Yaku.’

¹¹ Salitaikene doi mupau-pau bulaando kopoo lubatan tukon pokokondongan doi bunggul uuno mosinunggupimo tibolung mokalipookan pokakana kobunom mo bondolong tukon aung mo kait polong doi timbu.

¹²Doibundu TEMENENO basilingan doi komuyu luwedoi aung tukon komuyu lengele koalalo, bai aki pokitayo oilano kondondoongo.

¹³ Imbali Yana popitoikene doi komuyu oila komo sio polakukene sulano natapaatiyo koperjanjian Yana mokubai tukon komuyu. Songulo Koparentah molapamo totulis doi lua kobatutulisoo sio polakukene.

¹⁴ TEMENENO sumboliiyo yaku mootunggulikene doi komuyu sasaibino kohukum mosio natinaati doi lipu komuyu naikon mousokiyo tukon dungoliyo.”

¹⁵“Neneeke tutuuno! Salataa ko TEMENENO basilingan doi komuyu luwedoi aung lalomo doi Sinai Bunggulo, komuyu aki pomokita oi-oila.

¹⁶ Jadi podagaiyokai sulano naaki pobaladosa sabab komuyu mokubai timbalang mosinosubai mobuno langge meeng, mala-malane kai moluko,

¹⁷ tomisi kai ikan, iyayon motolondok kai iyayon bailon.

¹⁸

¹⁹Inaikai pobaladosa sabab pososubaiyano tukon posalakangganano kobutomuyu doi oila kopoo kinita doi timbu, oloyo, bituwon, tukon mandala-mandala. Ko TEMENENO mu Mian Bisa sodiikene kobangsa-bangsa bailon nasosubaiyo dolobo-lobodoo.

²⁰ Bai komuyu nia daanokai bangsa mosinalamaton luwedoi Mesir, dolipudoo posakisaawan tuuno. Yana babayo komuyu tobuat luwedoi lipudoo, sulano nateali nabangsa susuungo buno potuboan diabudodoo nia.

²¹ Bai ko TEMENENO mu Mian Bisa teali nggimoliiyo yaku sabab komuyu, tukon Yana batotopi baikon yaku aki naikon kupintosiio ko Yordan Paisunobatango sulano kuusok doi buta momolumbang naikon yana mobeekene doi komuyu.

²²Akimo namalumbit koidan komuyu naikon pintaso tukon dungolo doi buta momolumbangoo; bai yaku aki kumalaing sabab yaku naikon matemo naimbaa.

²³Neneeke tuuno! Inai motoliminggene naikon koperjanjian TEMENENO mu Mian Bisa mokubaiyo tukon komuyu. Loingiyo Konaparentah; aki namoola pomokubai timbalang mobuno oila kondondoongo motuuk doi butomu maka musosubaiyo,

²⁴ sabab ko TEMENENO mu Mian Bisa nanggimalan buno aung mosuayo kabus Yana aki naiyase pinokanakon tukon oilano.

²⁵Koidan kalu komuyu naikon malumbito kopo dungolan doi lipudoo tukon lapamo mosuung pau tumbu, inai momokubai lalim sabab mokubai timbalang mobuno oila kondondoongo maka musosubaiyo. Kokubaidoo meeng kokulokisan doi TEMENENO mu Mian Bisa matano tukon naikon tealikene yana nggimal.

²⁶Boliisi kotimbu tukon dunia oloyo nia nateali sakisii baikon kalu aki potaat doi yaku, komuyu naikon mosobit lapus luwedoi tano komuyu modungoliyo taalikon doi Yordan Paisunobatango sembeleng. Aki naikon namalumbit kopoo dungolan idoo; komuyu naikon inakate kabus.

²⁷ Ko TEMENENO naikon pobabandakene komuyu doi antara bangsa-bangsa bailon tukon tongo soisik doi komuyudoo komo tubo.

²⁸Idoo komuyu naikon sosubaiyo kotimbalang banggapi mokubaiyo, timbalang-timbalang moluwedoi kayung tukon batu moaki namoola monggita kai molongol, aki namoola kaan kai mosomakon.

²⁹ Maka poumboliiyo kopoo TEMENENO mu Mian Bisa, tukon kalu komuyu unggoliiyo tukon sasaibino konoamuyu komuyu naikon pososuunggene Yana.

³⁰Kalukai sasaibino dobaladoo tepokiiyo komuyu tukon komuyu ano doi susaan lalomo, maka komuyu naikon abali doi TEMENENO mu Mian Bisa tukon taat doi Yana.

³¹Kopoo TEMENENO mu Mian Bisa daanokai Mian Bisa mo babasal tuuno konamaasi. Yana aki naikon naotinggale kai akateo kabus komuyu, kai toliminggene kona perjanjian kinubai susuungo tukon tumbumuyu.

³²Posolidikiyokai kotempo looluk, anon momalumbit akiyoon posinuung, tambuun luwedoi oloyo salataa Mian bisa pasitakayo kobangkapi doi dunia nia. Unggoliiyokai posaapon doi dunia nia bunggono. Baanggokai daanomo kolangge moteali mo pokakana naiya kona hebatan? Kai biasamo komian momolongol kokadadian kaliangano mo buno nia?

³³Kai daanomo kobangsa mo tataap tubo salataa lengele komeeng kotemeneno mo basilingan doi yanila luwedoi aung, buno kopoo tinoupi?

³⁴Kai daano komeeng kotemeneno mobarani alayo komeeng kobangsa luwedoi bangsa-bangsa maka natealikene yanila naumat susuungo, buno TEMENENO mu Mian Bisa nakinubai tuuk doi komuyu doi Mesir? Komuyu kitayo susuumuyu bulaando ko Mian Bisa tukon nabukuanan mo babasal lubatene kobalaa tukon polobosiyan, mokubaiyo komo minasaindinggon tukon molakukene kolangge-langge mo hebat.

³⁵ Sasaibino doiya TEMENENO tudoikene doi komuyu sulano naokitakene baikon tongo TEMENENO doo ko Mian Bisa tukon akiyono kobailon.

³⁶Luwedoi timbu yana longolikene koalalo doi komuyu sulano naotunggule komuyu; doi dunia nia yana lapamo okitakene doi komuyu kona aung mo hebat, tukon luwedoi aungoo yana basilingan doi komuyu.

³⁷Sabab yana kilakene tumbumuyu, tobikon doiya yana lilikemo komuyu, tukon nakuasa mo babasal yana lapamo babayo komuyu tobuat luwedoi Mesir.

³⁸Kobangsa-bangsa mo lobian kona babasalan tukon molobian kona bukuanan yana siikayo luwedoi salaamuyu, sulano naantekene komuyu doi napoo lipu yana mobeekene doi komuyu, lipu mo diabudodoo teali komuyu.

³⁹Tobikon doiya posadariyo oloyo nia tukon inai potoliminggene: Tongo TEMENENO ko Mian Bisa doi timbu tukon doi dunia; akiyo kobailon.

⁴⁰Poloingiyomo sasaibino kohukum yaku mo beekene doi komuyu oloyo nia, maka komuyu tukon mukatulunan naikon monondoko tukon banggadudul tubo doi lipu TEMENENO mu Mian Bisa mobeekonggon teali komuyu tuuk sidutu-posidutukon.”

⁴¹ Maka musa tudoikene tolu kokota taalikon doi tolopot ko Yordan Paisunobatango,

⁴²teali kota soopan, lipu komian momoola salamatene kobutongo kalu yana tukon aki nasangadaiyo lapamo akateyo komian mo bolikon namusuh. Yana moola naobulenggene kobutongo doi antara meeng doi kotadoo sulano naaki nainakate koidan.

⁴³Tuuk Ruben nabenseno sinadiakon kokota Bezer doi padang lalomo peako mo tatandak; tuuk Gad nabenseno kota Ramot doi Gilead lipuno tukon tuuk doi Manasye miano kota Golan doi Basan lipuno.

⁴⁴Maka Musa beekene ko Mian Bisa Nahukum-hukum tukon Naparentah-parentah doi bangsa Israel.

⁴⁵Dolanggedoo yana lakukene salataa lapamo yanila tobuat luwedoi Mesir tukon daanoon doi Yordan Paisunobatango pepelako taalikon tolopot posasalaan tukon Bet-Peor kotano. Dolipudoo doiyamo Sihon nalipu loolukon, Amori miano natomundo, mo doi loolukoo maparentah doi kota Hesybon. Musa tukon bangsa Israel lungguiyo yana doi tempo napoo tobuatan luwedoi Mesir.

⁴⁶

⁴⁷Yanila dungoliyo Tomundo Sihonoo nalipu, tukon koidan tomundo Og natano luwedoi Basan, meeng ko Amori miano natomundo bailon modungol taalikon doi tolopot ko Yordan Paisunobatango.

⁴⁸Butadoo tobuka bebelan luwedoi kota Aroer doi Arnon Paisunobatango bibilo, banggadudul doi lembet polong doi Siryon Bunggulo, doiyamo Hermon Bunggulo,

⁴⁹tukon posaapon kolipu taalikon tolopot ko Yordan paisuno batango tukon doi lalom polong doi Tobun Mate doi Pisga Bunggulo uuno.