Read Banggai KUAIKON 5 Bible Online

KUAIKON 5 - Banggai bible

KUAIKON 5

¹Musa pototongikene sasaibino ko Israel miano maka bantile doi yanila, “Utus-utus, ndongoliiyo kohukum-hukum yaku mo beekene doi komuyu oloyo nia. Potaatiyo tukon poloingiyo dohukum-hukumoo komuyu mo inotunggukon.

²Doi Sinai Bunggulo ko TEMENENO nda Mian Bisa mokubai meeng koperjanjian,

³bolikon tongo tukon tumbunggita, bai tukon kita sasaibino dimbaa.

⁴Luwedoi aung doi bunggulo bunggono ko TEMENENO yase basilingan banggadudul tukon komuyu.

⁵Bai sabab komuyu matakutene ko aung tukon aki pobarani tolibo doi bunggul, maka yaku doi tempodoo kokondong doi antara komuyu tukon TEMENENO sulano kupelenggene ko TEMENENO nabantilan doi komuyu.

⁶TEMENENO popitoikene, ‘Yakumokai ko TEMENENO po Mian Bisa mo babayo komuyu tobuat luwedoi Mesir, doilipu poinataiyan.

⁷Inai mososubaiyo ko ilah-ilah bailon. Tongo Yaku kopoo sinosubai.

⁸ Inai mokubaiyo kotimbalang maka musosubaiyo mopokakana oilamo komo daanodoi timbu, doi dunia kai doi paisu lalomo doi buta lalomo.

⁹ Inai mososubaiyo kotimbalang mo buno doiya sabab Yakumo ko TEMENENO mu Mian Bisa tukon aki naiyase pinokanakon tukon oilamo. Mian-mian mo misikitene Yaku, Yaku ukume polong doi katulunan kotoluno tukon kosanggapo.

¹⁰Bai Yaku tudoikene Daku maasi doi loloono komian nakatulunan mokilakene Yaku tukon loingiyo Daku parentah.

¹¹ Inai mobantile Kosambunggu tukon sabalangan, sabab Yaku TEMENENO mu Mian Bisa ukume indee tolong komiano komo bantile salah Kosambunggu.

¹² Polamekenekai ko Oloyo Tadean tukon poodotiiyokai sabab doiya oloyo momoliyous, sabab Yakumokai ko TEMENENO mu Mian Bisa mo maparentahkene doi komuyu.

¹³ Yaku beenamo komuyu noom kooloyo sulano pobalimang,

¹⁴bai kooloyo kopituno siokai potade sabab doiya oloyo mo tangalaas mo tuuk doi Yaku TEMENENO mu Mian Bisa. Doi oloyodoo akiyo komeeng komian momoola balimang, mau komuyu, mupau-pau, muata-ata, muiyayon piniala kai mian lulubaton mo dungol doi mutano. Koata-ata sio natade buno komuyu.

¹⁵Neneeke baikon komuyu looluk kinubai ata doi Mesir, maka ko TEMENENO mu Mian Bisa oluputene tukon nabukuan mo babasal. Tobikon doiya kuparentahyo komuyu sulano polamekene ko Oloyo Tadean.

¹⁶ Odotiiyo tukon pialayokai tamamu tukon tinamu; doiyamo Daku parentah TEMENENO mu Mian Bisa, sulano potubo monondok tukon tubo malumbit doi lipu naikon Yaku mo beekene doi komuyu.

¹⁷ Inai mangakate.

¹⁸ Inai mobalolowa.

¹⁹ Inai pondikuk.

²⁰ Inai mosakisii doi tulamu tukon kala-kala.

²¹ Inai mo momootiyo kotulamo nalobo: buno nabonua, nabuta, naboloki naata-ata, naiyayon piniala, nakeledai kai oilamo komo daano doi yana.’

²² Doiyamokai koparentah-parentah ko TEMENENO mobeekene doi komuyu doi tembopo pototongian doi bunggulo. Salataa yana basilingan tukon alalo mo babasal luwedoi aung tukon bunom mo bondolong, yana beekene doparentah-parentahdoo, tukon akiyo kona binantil bailonggon. Maka yana tulise doi lua kobatutulis tukon yana beekene doi yaku.”

²³“Doi tempo nakaitan sasaibino kobunggul tukon komuyu lengele kolalo mo luwedoi nakalipookanan, sasaibino kopoobenseno nakatua tukon tano-tano doi rayat lubat doiyaku.

²⁴Yanila bantile, ‘Ko TEMENENO nda Mian Bisa tudoikenemo konababasalan tukon namoliyousan salataa kami lengele yana mo basilingan luwedoi aung. Oloyo nia kami lapamo sakisiio baikon tutuukai kobangkapi tataap tubo, maukai nalapamo ko Mian Bisa basilingan doi yana.

²⁵Bai bulaandokai koidan mosio mai salakanggene kobutonggami koidan? Aung mo babasal naikon suayo kabus kami! Kami toiyo baikon kami naikon mate kalu lengele ko TEMENENO Mian Bisa mo basilingan koidan.

²⁶Kai daano kobangkapi mo tataap tubo salataa molongol Mian Bisa mo tubo basilingan luwedoi aung?

²⁷Tobikon doiya, tauso Musa, ndongoliiyo sasaibino ko TEMENENO Mian Bisa nabinontiikon doi kita, maka napelenggene doi kami oila konabinontiikon doikoo. Kami naikon lengele tukon loingiyo.’

²⁸Salataa nandongoliiyo doiya, TEMENENO bantile doiyaku, ‘Yaku lengelemo oila dobangsadoo nabinantil, tukon tutuukai konapoo bantilan.

²⁹Soba kalu yanila sidutu pikikene bunodoiya! Soba kalu yanila sidutu odotiiya-Ku tukon taatiyo sasaibino Daku parentah, sampe yanila tukon napo katulunan aman tuuk sidutu-posidutukon.

³⁰Tausokai diabudodoo tukon sumboliiyomo dobangsadoo naabali doi napoo basandungan suwe-suwele.

³¹Bai ikoo, Musa, abalimo tukon dungolo dimbaa podungoli Yaku; naikon Yaku beekene doikoo sasaibino kohukum tukon Daku parentah. Otunggukenemokai doi yanila, sulano napoo taatiyo doi lipu Yaku mo beekene doi yanila.’

³²Utus-utus, loingiyomo tukon setia, sasaibino ko TEMENENO mu Mian Bisa napinalentahkon doi komuyu. Mau natongo meeng luwedoi parenta-parentadoo aki namoola komuyu lumbaiyo.

³³Lakukene sasaibino ko TEMENENO mu Mian Bisa napinalentahkon komuyu sulano potubo sanaang tukon moola tataap doi lipu naikon komuyu mo dungoliyo.”