Read Banggai KUAIKON 6 Bible Online

KUAIKON 6 - Banggai bible

KUAIKON 6

¹“TEMENENO mu Mian Bisa sumboliiyo yaku mootunggulikene sasaibino nahukum nia doi komuyu sulano polakukene doi lipu moakimo namalumbit komuyu dungoliyomo.

²Siokai komuyu tukon pokaturunan polong pomatekon naodotiiyo ko TEMENENO mu Mian Bisa tukon taatiyo sasaibino kona hukum yaku mo pelenggene doi komuyu, sulano potubo malumbit doi lipudoo.

³Tobikon doiya polengelekai utus-utus, lakukenekai doiya tukon setia, sulano potubo sanaang tukon teali bangsa mobabasal doi lipu mo kaasa tukon molumbang, buno ko TEMENENO Mian Bisa najinanjikon doi tumbunggita.

⁴ Utus-utus, neneekekai! Tongo TEMENENO, tukon tongo TEMENENO tolong konda Mian Bisa!

⁵Seseange ko TEMENENO mu Mian Bisa tukon tootubo konoamu: Tudoikenekai doiya doi mulenggang tuboan doi mukokubai lalomo.

⁶Inaikai motoliminggene koparentah-parentah yaku mobeekene doi komuyu oloyo nia.

⁷Otunggulikenekai doi mulabuk-labuk. Siokai pobisalakene doi bonua lalomo tukon doi bonua bailon, doi tempo tadean tukon doi tempo balimangan.

⁸Keetenemo doi botokomu tukon alambetemo doi paasomu sulano poneneeke.

⁹Tulisemokai doi mubonua tataapono posokolo tukon doi mutataapon mo babasal.”

¹⁰“Ko TEMENENO mu Mian Bisa paladandimo doi tumbumuyu Abraham, Ishak tukon Yakub baikon yana naikon beekene dotanodoo doi komuyu. Kokota-kotano babasal tukon badaang kohasilo, tukon bolikon komuyu komo ekekendenge.

¹¹Konapoo bonua moono tukon buat-buat mo monondok, tukon bolikon komuyu komuyu ontokiyo. Komuyu naikon pososuunggene kobubung-bubung, tukon bolikon komuyu komo kaliyo. Komuyu naikon malaat anggur tukon zaitun asino, tukon bolikon komuyu komo sakakene. Kalukai ko TEMENENO babayomo komuyu doi lipudoo, tukon kalu daanomo kopoo lobo samba komuyu mo yase kaane,

¹²dagaiyo namono-monondok sulano naaki potoliminggene ko TEMENENO mo lapamo olupute komuyu luwedoi Mesir, doi lipu poinataiyan.

¹³Odotiiyokai ko TEMENENO mu Mian Bisa, tukon musosuba tolongo doi yana, tukon kalu komuyu batotopi polakukenekai tongo sambuno tolong.

¹⁴Inai mososubaiyo ko bangsa-bangsa mopokolanikon komuyu natemeneno-temeneno bailon.

¹⁵Kalu komuyu sosubaiyo kotemeneno-temeneno bailon, maka komuyu naikon malaat ponggimolii doi mu TEMENENO Mian Bisa tukon komuyu inakate kabus, sabab ko TEMENENO mu Mian Bisa mopodungoli komuyu aki naiyase pinokakanakon tukon lobo bailon.

¹⁶Inai mosobaiyo ko TEMENENO mu Mian Bisa pokakana kopoo linakukon doi Masa.

¹⁷Taatiyokai sasaibino kohukum TEMENENO mu Mian Bisa mobeekene doi komuyu.

¹⁸Oila ko TEMENENO nakinita momonondok tukon adil doiyamo kopoo linakukon, maka komuyu naikon sanaang. Tano mo molumbang TEMENENO modandikene doi tumbumuyu, naikon teali koomu,

¹⁹tukon komuyu naikon siikayo komu musuh-musuh pokakana ko TEMENENO mo dandikenemo.

²⁰Oloyo doi bundu komupau-pau naikon masadai doikoo, ‘Bulaando ko TEMENENO nda Mian Bisa mosumboliiyo nda taatiyo sasaibino doparentahdoo?’

²¹Maka sio potimbiliyo buno naiya, ‘Looluk kita teali tomundo Mesir naata, maka ko TEMENENO oluputene kita tukon nakuasa mo babasal.

²²Kami sakisiiyomo ko TEMENENO molakukene komo minasaindinggon tukon langge-langge Mesir miano mo matakutene tukon napoo tomundo tukon sasaibino kona sambu-sambu bailon.

²³Yana olupute kita luwedoi Mesir sulano nababayo kita naimbaa, tukon nabuta nia bineekono doi kita sabab doiya lapamo dandikene doi tumbunggita.

²⁴Ko TEMENENO nda Mian Bisa sumboliiyo kita molakukene sasaibino doparentahdoo tukon odotiiyo yana. Kalu kita kubaiyo buno doiya, yana naikon sidutu pialayo konda bangsa sulano natataap tubo sanaang.

²⁵Kalu kita tukon setia moloingiyo sasaibino ko TEMENENO nda Mian Bisa napinalentahkon doi kita, maka yana naikon pokokonoi doi kita.’ ”