Read Banggai KUAIKON 7 Bible Online

KUAIKON 7 - Banggai bible

KUAIKON 7

¹ “TEMENENO mu Mian Bisa naikon babayo komuyu doi tano naikon komuyu mo dungoliyo, tukon naikon badaang kobangsa nasiniika luwe idoo. Doi mupokita lalomo yana naikon siikayo kopitu kobangsa mo lobian babasal tukon molobian kona bukuanan luwedoi komuyu, doiyamo Het miano, Girgasi, Amori, Kanaan, Feris, Hewi tukon Yebus.

²Kalukai naikon ko TEMENENO mu Mian Bisa salakanggene dobangsa-bangsadoo doi mukuasa lalomo tukon komuyu lungguiyo yanila, akateomo yanila sasaibino. Inai momamaasikene tukon mokubai perjanjian tukon yanila.

³Komuyu aki namoola popokila tukon yanila, tukon inai mopataikene komu pau-pau napokila tukon yanila,

⁴sulano naaki napoo dedeenggene komu pau-pau luwedoi TEMENENO tukon tealikene yanila mososubaiyo ko ilah-ilah bailon. Kalu komuyu sosubaiyo ko ilah-ilah bailon, ko TEMENENO nggimal tukon komuyu naikon yana mosobit akateo kabus.

⁵ Tobikon doiya lubangemo dobangsa-bangsadoo nabalabaan-balabaan, pomanasemo kobatu-batu moinokokondong yanila mo anggene karamaton, lubange ko Asyera timbalango, tukon suayomo kotimbalang-timbalang bapilogotan yanila mo sosubaiyo.

⁶ Lakukene sasaibino doiya sabab komuyu TEMENENO mu Mian Bisa koona. Luwedoi sasaibino ko bangsa doi dunia nia bunggono komuyumo ko TEMENENO mu Mian Bisa namian linilik mo monondok tuuno.

⁷Komuyu kinilakon tukon ko TEMENENO lilike, sabab bolikon polobioniiano kona babasalan kobangsa-bangsa bailon; bai kona tutuuan komuyu daanon bangsa mo poipoisik tuuno doi dunia nia bunggono.

⁸Bai ko TEMENENO lilike komuyu sabab yana mamaasikene komuyu tukon yase tapaatiyo kona perjanjian kinubai tukon tumbumuyu. Doiyamo kosababpo sampe yana salamatenemo komuyu tukon kuasa mo babasal tukon olupute komuyu luwedoi poinataiyan doi tomundo Mesir.

⁹ Neneeke baikon ko TEMENENO mu Mian Bisa tongo Yana ko Mian Bisa, tukon Yana Mian Bisa mo setia. TEMENENO tapaatiyo kona perjanjian tukon tudoikene konaseang motataap polong sololoon kokatulunan doi mian mokilakene Yana tukon taatio kona parentah-parentah.

¹⁰Bai tukon aki namata-matakut Yana hukume yanila mo mosikitene doi Yana.

¹¹Jadi, taatiyokai sasaibino kohukum yaku mopelenggene doi komuyu oloyo nia.”

¹² “Kalu komuyu palatikanggene doparentah-parentahdoo, tukon lakukene tukon setia, maka ko TEMENENO mu Mian Bisa kai naikon setia doi naperjanjian kinubai tukon komuyu. Yana naikon tudoikene doi komuyu konamaasi mo tataap, bunomo kona pinalajanjikon doi tumbumuyu.

¹³Yana naikon seseange tukon balakaatio komuyu tobikon badaang komu pau tukon tosuungi kopoo kadaang. Yana naikon balakaatio komu asi-asi, tobikon doiya doasi-asidoo hasilkanggene ko gandum, anggur tukon zaitun lisisono. Yana naikon balakaatio komuyu sampe badaang kopoo sapi mbembe tukon mudomba. Sasaibino dobalakaatoo naikon komuyu talimayo doi tano TEMENENO mo beekene doi komuyu, pokokonoi tukon naperjanjian doi mumbumbu.

¹⁴Luwedoi sasaibino kobangsa doi dunia, akiyo komeengkai komo malaat balakaat mo bunodoiya kona lobi-lobianan pokakana komuyu. Luwedoi komuyu sasaibino tukon luwedoi saibino kopoo iyayon piniala akiyokai komeeng komo komba.

¹⁵Ko TEMENENO naikon dagaiyo komuyu luwedoi sasaibino kopanakit tukon balaa komuyu mokitayo doi Mesir, bai dobala-balaadoo naikon linubotiikon doi mumusu-musu.

¹⁶Sasamba kobangsa TEMENENO mu Mian Bisa mosalakanggene doi mukuasa lalomo sio poakateyo kabus; mau naaki museseange doi yanila. Inai mososubaiyo yanila natemeneno sabab dokokubaidoo lubatene kosilakaan doi komuyu.

¹⁷Ugaatene komuyu pikikene dobangsa-bangsadoo lobioniiyo komuyu kona kadaang sampe komuyu aki pomoola siikayo yanila.

¹⁸Bai inai momatakutene doi yanila; neneeke oila ko TEMENENO mu Mian Bisa nailakukanggon motuuk doi tomundo Mesir tukon sasaibino konarayat.

¹⁹Neneekekai kobala-balaa mohebat komuyu mosakisiiyomo, komo mina-minasaindinggon, tukon bukuanan mo babasal TEMENENO mu Mian Bisa mopakeo sulano naolupute komuyu. Bunomo koidan ko TEMENENO mu Mian Bisa naikon mokubai tindakan doi sasaibino kobangsa komuyu momatakutene.

²⁰Bunomodoiya koidan ko TEMENENO mu Mian Bisa naikon olubatene komatakutan doi yanila, sampe komian-mian momoola obulenggene kobutongo tukon basapiton koidan naikon mate kabus.

²¹Jadi inaimo momatakutene dobangsa-bangsadoo. Ko TEMENENO mu Mian Bisa dagaiyo komuyu. Yana daanokai Mian Bisa mo babasal tukon mo minasaindinggon.

²²Luwedoi salaamuyu Yana siikayo dobangsadoo doi nabaki-kidikian. Aki namoola komuyu akateo kabus yanila tukon mosobit, sulano koiyayon-iyayon mo mbosolo inai natosuungi badaang tukon aki nateali mumusu.

²³Bunomokai doiya ko TEMENENO mu Mian Bisa naikon nasalakangganano komu musuh-musuh doi komuyu. Yana naikon ponggalanggabutene yanila sahingga yanila teali mate kabus.

²⁴Yana naikon salakanggene yanila natomundo-tomundo doi komuyu. Yanila naikon komuyu akateo, tukon kosambunoila naikon tinoliminggon. Akiyokai komeeng komian mo moola bataanggon mosasalaane komuyu; yanila sasaibino naikon komuyu lopuwo kabus.

²⁵Posuayomo konapoo pilogot timba-timbalango yanila mososubaiyo. Inai natongo komuyu palaluuwo konapo perak kai mosoni molambot doi yana tukon inai poalayo tuuk doi butomuyu susuumu. Kalu komuyu lupaiyo doparentahdoo komuyu naikon mate, sabab ko TEMENENO mu Mian Bisa mosikitene komian mososubaiyo kopilogot timbalango.

²⁶Inai moabese komeeng kopilogot timbalango doi mubonua lalomo, sulano kokatula mo lupayo yana naaki nalupayo komuyu koidan. Sio pomosikitene dolanggedoo tukon kitayo lokis, sabab ko TEMENENO kutukemo.”