Read Banggai KUAIKON 8 Bible Online

KUAIKON 8 - Banggai bible

KUAIKON 8

¹“Sasaibino kohukum yaku mobeekene doi komuyu oloyo nia sio polakukene tukon setia, sulano potataap tubo, tosuungi badaang tukon dungoliyo kotano TEMENENO modondiikenemo doi tumbumuyu.

²Neneekekai! Sangkap poloono kotaun konakalumbit ko TEMENENO mu Mian Bisa nakatuaiyano komuyu doi poampakonan mo odoon loloiyo ko padang lalomo. Doi poampakonanoo lalomo ko TEMENENO maksutio sulano nasobaiyo komuyu, sulano namoola kitayo oila komo daano doi noamu lalomo tukon oilakai komuyu naikon loingiyo kona parentah-parentah.

³ Yana batadikene pomalaal, maka pobineekon komana sulano nateali pokinaan. Looluk komuyu tukon tumbumuyu akiyoon napobiasa makaan dokinaanoo. Ko TEMENENO kubaiyo buno doiya sulano naotunggule komuyu baikon kobangkapi aki natubo luwedoi mo kinaan tolong, bai luwedoi sasaibino kolobo TEMENENO mo bantile.

⁴Doi sangkap poloono kotaun nia konakalumbit komu pakean aki nateali miminas tukon koaimuyu aki nateali boboongan.

⁵Neneeke baikon ko TEMENENO mu Mian Bisa otunggule komuyu pokakana komeeng kopau tamano mootunggule konapau-pau.

⁶Jadi, lakukenemo sasaibino ko TEMENENO mu Mian Bisa napinalentahkon. Tubokai loloiyo kona hukum-hukum tukon odotiiyokai yana.

⁷Ko TEMENENO mu Mian Bisa babayo komuyu doi lipu mo molumbang; tano mo badaang kopaisu batango tukon paisu matano tukon paisu mo lomba doi buta lalomo motobuat doi peak tukon bunggul-bunggul.

⁸Dotanodoo kohasilo badaang kogandum kaliangano, anggur, ara saono, delima saono, zaitun batango tukon dokot.

⁹Idoo komuyu aki naikon pomalaal kai kakurangan. Kobatu daano kobesino, tukon luwedoi bunggul-bunggul komuyu bakali malaat tambaga.

¹⁰Komuyu naikon kaan polong bia-biai tukon basukuur doi TEMENENO mu Mian Bisa sabab Yana mo beekene kotano mo molumbang doi komuyu.”

¹¹“Dagaiyokai mono-monondok sulano naaki potoliminggene ko TEMENENO mu Mian Bisa; inai molapusene mau natongo meeng luwedoi sasaibino kona hukum yaku mo beekene doi komuyu oloyo nia.

¹²Kalu komuyu lapamo kaan mobiya-biyai tukon lapamo mabangun bonua-bonua mo monondok teali mubonua dungolan,

¹³tukon kalu tosuungimo komu saapi mbembe tukon mudomba, perak tukon mumosoni tukon sasaibino komu buat bailon,

¹⁴dagaiyokai mono-monondok sulano naaki pobabanggaal tukon potoliminggene ko TEMENENO mu Mian Bisa mo oluputene komuyu luwedoi Mesir, lipu poinataiyan.

¹⁵TEMENENO komo andane komuyu lolo doi padang lalomo mo bebelan tukon babasal tuuno, mo badaang kobinda mo upason, tukon badaang komanda sopit. Doi tano motuul moakiyo kopaisuno yana kubaiyo kopaisu mo tobuat lomba luwedoi batu, sulano pomoola monginum pobiya-biyai.

¹⁶Doi padang lalomo Yana beena komuyu manna teali pokinaan, tukon moaki tumbumuyu natingoniiyo. TEMENENO lakukene doiya tuuk mosobaiyo komuyu tukon ekependeo konoamuyu, sulano doi bundu Yana moola mokubai namondokan doi komuyu.

¹⁷Jadi, inaimo popikikene baikon tukon mukakaatean kai mubukuanan susuumu komuyu teali kaasa.

¹⁸Neneeke baikon ko TEMENENO mu Mian Bisa kai komo beekene dokaasaanoo doi komuyu. Dolanggedoo Yana lakukene sabab polong doi oloyo nia Yana daano mo setia doi perjanjian Yana mokubaiyo tukon tumbumuyu.

¹⁹Inai motoliminggene ko TEMENENO mu Mian Bisa tukon inai moabali doi mutemeneno-temeneno bailon sulano musosubaiyo tukon musalakanggene kobutomu doi yana. Oloyo nia yaku ingotiikene komuyu baikon kalu komuyu lakukene koidan, tantu komuyu TEMENENO lopuwo kabus.

²⁰Kalu komuyu aki potaat doi TEMENENO mu Mian Bisa, komuyukai naikon linopu kabus, buno bangsa-bangsa moilopumo kabus komuyu mokitayomo.”