Read Banggai KUAIKON 9 Bible Online

KUAIKON 9 - Banggai bible

KUAIKON 9

¹“Lengelekai Utus-utus! Oloyo nia komuyu pintosiiyo ko Yordan Paisunobatango sulano podungoliyo kobangsa-bangsa nalipu molobian kona babasalan tukon lobiyoniio kona bukuanan doi komuyu. Kona pokota-kota pobbosolii tukon kopagar-pagaro binetoon pokakana kotimbu konakatandak.

²Komian-mianoila pobbosolii tukon bukuan kobutongoila; yaniladoo babasal tuuno, tukon komuyu lapamo molongol baikon akiyo komeeng komiankai mo moola lawane yanila.

³Bai dia budodoo komuyu naikon sakisiiyo bulaando ko TEMENENO mu Mian Bisa mo ampakon doi salaamuyu buno aung mo kolot mosuayo kooioila. Doi matamuyu salaano yana okitakene kona lungguiyano yanila, sampe komuyu moola siikayo tukon akateo kabus yanila doi namosobitan sabab doiya TEMENENO lapamo dandikene.

⁴Salataa lapa ko TEMENENO mu Mian Bisa siikayo yanila tuuk doi komuyu, inai poanggene baikon komuyu binabamo indaa sulano pobakonggukanggene dotanodoo sabab pomonondokan tukon polakukanano ko TEMENENO mu Mian Bisa namongiasan sampe pantas potalimayo. Tutuu aki nabuno doiya! TEMENENO siikayo dobangsa-bangsadoo tuuk doi komuyu sabab yanila lokis. TEMENENO batadikene poalayo kona potano, sabab yana yase tapaatiyo konaperjanjian doi tumbumuyu Abraham, Ishak tukon Yakub.

⁶Anggayokai baikon ko TEMENENO mu Mian Bisa aki nasalakanggene kobuta mo molumbangoo doi komuyu sabab pantas potalimayo. Aki! Komuyu nia bangsa mo palalentel.

⁷Neneekekai bulaando kopoo kubaiyano ko TEMENENO mu Mian Bisa sampe teali nggimal doi padang lalomo. Salataa potinggalano ko Mesir sampe komuyu polong naimbaa, komuyu tongo tumba-tumbake ko TEMENENO.

⁸Mau doi Sinai bunggulo komuyu kubaiyo ko TEMENENO teali nggimal tuuno, tobikon doiya yana yase akateyo kabus komuyu.

⁹ Yaku togoliiyo dobunggulo sulano kutalimayo dobatu perjanjianoo TEMENENO mo kubaiyo tukon komuyu. Sangkap kolono kooloyo tukon sangkap kolono kopopook konakalumbit daku dungolan doi bunggul bunggono aki kukaan tukon monginum paisu.

¹⁰Doibundu ko TEMENENO beekanaku dobatudoo molua mo lapamo Mian Bisa susuungo tulisiyo. Doi batudoo totuliso kobantilan mo lapamo nabantile luwedoi aung tanga-tangano doi komuyu, salataa popototongian doi bunggulo uuno.

¹¹Oode, toliiso sangkap kolono kooloyo tukon sangkap kolono ko popook, ko TEMENENO beekanakumo looluakon dobatu perjanjianoo.

¹²Maka ko TEMENENO bantile doiyaku, ‘Tokolumo mosobit sabab komu bangsa ikoo mobabayo tobuat luwedoi Mesir kubaiyomo kokulokisan. Yanila liaso luwedoi kuparentah-parentah, tukon yanila kubaiyomo kotimbalang sulano nasinosubai.’

¹³TEMENENO bantile koidan doi yaku, ‘Yaku toiyo dobangsadoo todudul palalentel.

¹⁴Inai mososobae sembangaku. Yaku yase akateo kabus yanila sulano naakimo napo ninonook koidan. Bai ikoo naikon kutealikene Tama luwedoi meeng kobangsa mo babasal tuuno tukon lobian kona bukuanan doi yanila.’

¹⁵Maka kuabali tonggulung, tukon yaku babayomo dobatu perjanjianoo molua tukon loolua kolimanggu, maka kuobulusiyo dobunggulo mo daano mo kait-kait.

¹⁶Yaku kitayo baikon komuyu lumbaiyomo komu Mian Bisa naparentah. Komuyu baladosamo doi TEMENENO sabab komuyu mokubaimo meeng kotimbalang saapi mo luwedoi tambaga maka pososubaiyo.

¹⁷Maka doi matamu salaano looluakon dobatu perjanjianoo yaku tikakene sampe manas tobi-tobisili.

¹⁸Maka yaku sosuba koidan doi TEMENENO salaano doi bunggul bunggono sangkap kolono kooloyo sangkap kolono kopopook kona kalumbit, aki kukaan tukon monginum paisu. Doiya yaku lakukene sabab komuyu baladosamo doi TEMENENO tukon lakukene oila kona inaanggon lokis, sampe yana nggimal.

¹⁹ Yaku matakutene ko TEMENENO nanggimalan mo kolot-kolot buno aung motuuk doi komuyu sampe yana yase lopuwo kabus komuyu, bai budodoiya ko TEMENENO daano mondongoliiyo.

²⁰Ko TEMENENO nggimoliiyo tuuno koidan doi Harun tukon yase moakateyo, tobikon doiya yaku sambeanggene yana koidan.

²¹Komu kubaiyano kosaapi timbalango mo luwedoi tambaga, yaku sakukene doi aung lalomo. Maka kumanase tukon kutumbuwo sampe alus buno ambata, tukon doambatanodoo yaku sakukene doi paisu batango pangano lalomo mo lomba luwedoi bunggoloo.

²² Koidan doi Tabera, Masa tukon Kibrot-Taawa komuyu kubaiyo nggimal ko TEMENENO.

²³ Maka doi tempodoo TEMENENO sumboliiyo komuyu motinggale ko Kades-Barnea sulano poampakon dungoliyo kobuta yana naikon mo beekene doi komuyu, bai komuyu tumbokiiyo ko TEMENENO mu Mian Bisa naparentah; komuyu aki poanggayo kai potaat doi yana.

²⁴Salataa yaku tingoniiyo komuyu, komuyu sidutu tumba-tumbake ko TEMENENO.

²⁵Yaku toiyo ko TEMENENO batetel sio nalopuwo kabus komuyu. Maka sangkap kolono kooloyo tukon sangkap kolono kopopook kona kalumbit yaku somba doi TEMENENO salaano tukon sambeang buno naiya:

²⁶“Oh TEMENENO Mo Tatandak tuuno, inaikai molopuwo kabus namu miannia, doiyamo bangsa ikoo mo olupute tukon ikoo motobuatene luwedoi Mesir tukon mubukuanan tukon mukuasa mo babasal.

²⁷Neneekekai naikon komu ata-ata Abraham, Ishak tukon Yakub, tukon inai mopalatikanggene konapo palalentelanoo, konapo kulokisan tukon nabangsa nia nalalim.

²⁸Kalu ikoo koidan lopuwo kabus komu mian, maka ko Mesir miano naikon bantile baikon ikoo aki mumoola mobabayo komu bangsa doi tano ikoo mo dondiikenemo doi yanila, tukon baikon ikoo babayo yanila doi padang lalomo sulano muakateo yanila, sabab ikoo mosikitene doi yanila.

²⁹Bai neneekekai, TEMENENO, baikon yanila nia bangsa ikoo mo lilike teali mumian, tukon ikoo babayo luwedoi Mesir tukon mubukuanan tukon Mukakuasaan mo babasal.”