Read Banggai YOHANES 1 Bible Online

YOHANES 1 - Banggai bible

YOHANES 1

¹Tumbe-tumbeno, kodunia akiyoon natinealikon, Bantilan anomo. Bantilanoo ano polaing Mian Bisa tukon do Bantilanoo meengomo ko Mian Bisa.

²Doi tumbeno yana polaing ko Mian Bisa.

³Sasaibino kona tinealikon lolo doi yana, tukon sasaibino komo daano, akiyo kolangge meeng motinealikon moakiyo yana.

⁴Bantilanoo tuboan uuno, tukon tuboan mobeena madialan kobanggapi.

⁵Madialanoo diyoliiyo kokalipookan lalomo, tukon kalipookanoo aki nanggoola posoiyo.

⁶ Lubato komian Mian Bisa mo bintekene, Yohanes kosambuno.

⁷Yana lubat babotilanggene do madialanoo, sulano sasaibino komian anggayo.

⁸Yana susuungo bolikon do madialanoo, yana tolongo babotilanggene.

⁹Madialan motalakana lubat doi dunia mo diyoliiyo kobanggapi sasaibino.

¹⁰Bantilanoo daano doi dunia, dunia tinealikon lolo doi Yana, bai kodunia aki natingoniiyo Yana.

¹¹Yana lubat doi nalipu susuungo bai Napolipuiyan aki natalimayo Yana.

¹²Mau nadaano komian mo talimayo Yana tukon mangangga doi Yana; Yana beena hak nateali Mian Bisa napau,

¹³mo sinuung bolikon doi banggapi, sabab do tuboanoo moboolu doi Mian Bisa kona luwean.

¹⁴Do Bantilanoo tealimo banggapi, Yana dungolo doi kita, tukon kita lapamo kitayo Nababasalan kona kuasa. Nababasalanoo Yana talimayo salaku Tama Napau momeeng. Lolo doi Yana kita kitayo ko Mian Bisa tukon naseang doi kita.

¹⁵Yohanes lubat buno Nasakisii, yana babulitakanggene: “Naiyamo Yana yaku mo bantilemo: Yana naikon lubat doibundu bai lobian kona kuasa doi yaku, sabab akiyoon nadaano yaku, Yana daanomo.”

¹⁶Yana daano kona seang; akiyo kona belentian, Yana balakaatiyo kita.

¹⁷Ko Temeneno naaturan kita talimayo doi Musa. Bai ko Mian Bisa naseang tukon namonondokan inokitakonggon lolo doi Yesus Kristus.

¹⁸Akiyoon nadaano komo kitayo ko Mian Bisa, tolongo Tama Napau momeeng, mo buno pokakana Tama tukon pomeenggon tuuno doi Yana. Doiyamo kona batokitaan Tama doi kita.

¹⁹Pamarenta Yahudi doi Yerusalem mobintokon imam-imam tukon Lewi miano naampakon doi Yohanes tukon namansadaikene doi yana, “Ikoo naiya indee miano?”

²⁰Yohanes mangaku tukon tutuu, “Yaku bolikon Tomundo Pasalamat.”

²¹ “Kalu buno doiya, ikoo indee miano?” yanila sadaiyo. “Kai ikoo Elia?” “Bolikon,” Yohanes napotimbili. “Kai ikoo meeng konabi,” yanila sadaiyo koidan. “Bolikon,” yana timbiliyo.

²²“Kalu buno doiya, bantikene doi kami indee miano ikoo nia,” yanila bantile, “sulano kami nggoola beena potimbili doi mian mo bintekene kami. Indee komubantilano kobutomu susuumu?”

²³ Yohanes timbiliyo, “Yakumo nia Nabi Yesaya nabinantil: ‘Mian mo pelenggene doi padang lalomo: Keseayo ko Temeneno naloloon.’ ”

²⁴Parisi miano na mian-mian binitokon

²⁵mansadai, “Kalu ikoo bolikon Tomundo Pasalamat, bolikon Elia, bolikon koidan meeng konabi, bulaando ikoo momansau mian?”

²⁶Yohanes timbiliyo, “Yaku mansau mian tukon paisu. Bai doi tulamuyudoo daano komian komuyu akipo tingoniiyo.

²⁷Yana lubat doibundu tukon yaku, bai nasapatu aloso yaku aki nanggoola bukayo.”

²⁸Sasaibino doiya kona tealian doi Betania, doi Yordan Paisunobatango taalikon oloyo nasumbotan Yohanes namansauan mian.

²⁹Modoakon kooloyo, Yohanes kitayo Yesus lubat doi yana. Maka Yohanes bantil, “Pokitayo ndaiyamo ko Mian Bisa na Domba Pauno mo telese kobanggapi nalalim doi dunia.

³⁰Yanamo daku binantiloo naikon lubat doi bundukon doi yaku, bai lobian kona babasalan doi yaku, sabab akiyoon kusosuung Yana daanomo.

³¹Akiyoon, yaku toiyo indee miano Yanadoo. Baanggon yaku lubat mansau mian tukon paisu sulano kobangsa Israel tingoniiyo Yana.”

³²Yohanes koidan pelenggene nabilita nia, “Yaku kitayo ko Mian Bisa Na Roh obulus buno tomisi lapatiing doi timbu maka dungol doi bunggono.

³³Doiya kosinggatoo yaku akiyoon kutoiyo indee Yana. Bai Mian Bisa bintekene yaku sauwo tukon paisu lapamo bontiikene doi yaku, ‘Kalu ikoo kitayo ko Mian Bisa Na Roh obulus, maka dungol doi meeng komian, Yanamo naikon komo mansau tukon Mian Bisa Na Roh.’

³⁴Yaku lapamo kitayo susuunggu,” Yohanes bantile, “tukon yaku pelenggene kobantilan baikon Yanamo ko Mian Bisa Napau.”

³⁵Modoakon kooloyo Yohanes daano doi lipudoo koidan tukon lua kona pololaing.

³⁶Sambuno yana kitayo Yesus alon, yana bantile, “Pokitayo! Naiyamo ko Mian Bisa na Domba Pauno.”

³⁷Yohanes napololaing molua lengele bantilan-bantilanoo, maka ampakono lainge Yesus.

³⁸Yesus mbaleng doi tonggulungo, tukon kitayo yanila daano molainge Yana. Yana mansadai, “Oila komuyu nainumbolii?” Yanila timbiliyo, “Rabi, naando Rabi nadungolan?” (Silingan ‘Rabi’ koalatino guru.)

³⁹“Mai pokitayo,” Yesus bantile. Yanila ampakon tukon Yana mokitayo inaando kona dungolan. Doiya kosinggatoo batong sangkap kinobiano. Oloyodoo yanila podungoli Yana.

⁴⁰Daano komeeng doi mianoo molua mo lapamo mondongolii oila Yohanes nabinantiloo tukon doibundu ampakon lolainge Yesus, doiyamo Andreas, Simon Petrus utuso.

⁴¹Soisobiton Andreas unggoliiyo Simon, utusodoo, tukon bantile doi yana, “Kami lapamo pososuung tukon Mesias!” (Mesias pokakana Kristus, doiyamo: Tomundo Pasalamat.)

⁴²Andreas antekene Simon doi Yesus. Yesus sumboliyo Simon, maka bantile, “Ikoo Simon, Yona napau. Ikoo naikon sinombuikon Kefas.” (Kefas pokakanamo Petrus, koalatino: batu bunggo.)

⁴³Modoakon kooloyo Yesus tatukenemo sulano ampakon doi Galilea. Yana pososuung tukon Filipus, tukon bantile doi yana, “Mai laingaku!”

⁴⁴Filipus kona lipu doi Betsaida, doiyamo Andreas tukon Petrus nadungolan.

⁴⁵Filipus pososuung tukon Natanael maka nabantile doi yana, “Kami lapamo pososuunggene domianoo Musa mo bantile doi Mian Bisa na Buku Ukum lalomo, tukon nabi-nabi mo babulitakanggene. Yanadoo Yesus doi Nasaret, Yusuf napau.”

⁴⁶Bai Natanael timbiliyo, “Moolakene kai kolangge meeng monondok lubat doi Nasaret?” “Mai kitayo susuumu,” Filipus timbiliyo.

⁴⁷Yesus kitayo Natanael lubato, maka bantil doi yana, “Kitayo, ndaiya Israel miano motutuu. Akiyo kona kala doi Yana.”

⁴⁸“Bulaando Tama tingoniiyo yaku?” Natanael sadaiyo Yesus. Yesus timbiliyo, “Akiyoon Filipus nauange ikoo, Yaku kitayomo ikoo doi kayung taepa uunodoo.”

⁴⁹“Tama Guru,” Natanael bantile, “Tama daano Mian Bisa Na Pau! Tama kai ko Tomundo bangsa Israel!”

⁵⁰Yesus bantile, “Ikoo mangangga tongo sabab Yaku bantile baikon Yaku lapamo kitayo ikoo doi taepa uunodoo? Langge-langge mo lobian mododoon lobian babasal naikon ikoo kitayo!”

⁵¹ Yesus bantile koidan, “Bisa, anggayomo, ikoo naikon kitayo kotimbu tobuka, tukon ko Mian Bisa namalaekat-malaekat liba obulus doi Manusia na Pau.”