Read Banggai YOHANES 10 Bible Online

YOHANES 10 - Banggai bible

YOHANES 10

¹“Bisa tuuno Kubantilan nia: Mian mo usok doi domba natondok lalomo lupayo kopagal, tukon aki naloloiyo kotataapon, bai liba loloiyo kololoon bailong, mianoo pondikuk tukon palambok.

²Bai mian mo usok loloiyo kotataapon, doiyamo padagai domba.

³Padagai tondok bukayo kotataapon doi yana, tukon kodomba-domba loloiyo koalalo singgatoo yana uange yanila tukon sambuno meeng-meeng tukon andane yanila tobuat.

⁴Sambuno dombadoo binaba doi tonggulung, padagaidoo ampakon matailukon, tukon do domba-dombadoo tunduwo yana sabab yanila tingoniiyo koalalo.

⁵Yanila aki nayase tuunduwo komian bailon, bai naikon bulenggene do mianoo, sabab aki napo tingoniiyo domianoo alalo.”

⁶Yesus basalitakene do ande-andeanoo, bai yanila aki naalatiyo oila Kona totuuk.

⁷Maka Yesus bantil koikoidan, “Bisa tuuno Kubantilan nia: Yakumo kotataapon motuuk doi domba.

⁸Sasaibino komo lubat akiyoon nadaano Yaku doiya pondikuk tukon palambok, bai dombadoo aki ndongoliiyo yanila alalo. Yakumo kotataapon.

⁹Indee komo usok mololo doi Yaku naikon salamat; yana tobuat tukon usok malaat kinaan.

¹⁰Pondikuk lubat tolongo sulano pondikuk, tolongo mangakate sulano nalusayo. Bai Yaku lubat sulano kobanggapi malaat tuboan — tuboan molobi-lobian.

¹¹Yakumo kopadagai monondok. Padagai mo monondok beekene kona ansaang motuuk doi nadomba-domba.

¹²Mian bailonggon mo bolikon padagai tukon bolikon koidan do dombadoo tumbuno, naikon dampas kalu yana kitayo koasu lobo molubat. Maka do dombadoo sinoku tukon pinoobiiton asu lobo.

¹³Mian balainggonoo obulen, sabab yana balimang sulano natinambo. Yana aki napusinggene do domba-dombadoo.

¹⁴Yakumo kopadagai mo monondok. Pokakana buno Tama tingoniiyo Yaku tukon Yaku tingoniiyo Tama, bunomo koidan Yaku tingoniiyo Kudomba-domba tukon yanila koidan tingoniiyo Yaku. Yaku salakanggene Kuansaang motuuk doi yanila.

¹⁶Daano kodomba-domba bailon koidan mo baino Koonggu, bai aki napototongi doi domba-domba tambuno nia. Yanila koidan sio Kubabayo tukon yanila ndongoliiyo Kulalo. Yanila sasaibino naikon teali meeng kona pototongian tukon meeng kona padagai.

¹⁷Tama mamaasikene Yaku sabab Yaku salakanggene Kuansaang, sulano natinalima koidan.

¹⁸Akiyo komeeng komian monggoola alayo doi Yaku. Yaku salakanggene tongo kumongiasan susuunggu. Yaku balakuasa mosalakanggene, tukon balakuasa moalayo koidan. Doiyamo kolimang Yaku mo talimayo doi Tamang-Ku.”

¹⁹Tobikon Yesus nabantile buno doiya, Yahudi miano tambuuno ponggeeleki.

²⁰Badaang komo bantile, “Yana inusoki setan! Yana tindo! Oila kogunano komuyu mondongoliiyo Yana?”

²¹Bai daano kobailonggon mo bantile, “Mian mo inusoki setan aki nabasilingan buno doiya! Kai nggoola kosetan kubaiyo komian piit teali mongkita?”

²²Doi Yerusalem komian badaang daano Molamekene Kooloyo Ba selaan Temeneno Na Bonua. Doiya kosinggatoo tempo udan.

²³Yesus daano moampakon doi Salomo na Gandalian doi Temeneno Na Bonua lalomo,

²⁴salataa Yahudi miano lubat pototongi potikunggon Yesus. Yanila bantile, “Polong doiyaa Ikoo sodiikene kami sasaaki? Bantilemo kona bisa-bisaan, kalu Ikoo bisa-bisa Tomundo Pasalamat.”

²⁵Yesus timbiliyo, “Lapamo kubontiikonggonmuyu, bai komuyu aki pomaangga. Limang-limang Yaku mo limange lengget doi Tamang-Ku, mobeena tokitaan motuuk doi Yaku.

²⁶Komuyu aki poanggayo sabab komuyu aki potongusokon doi Kudomba-domba.

²⁷Daku domba-domba lengele Kulalo. Yaku tingoniiyo yanila, tukon yanila loloiyo Yaku.

²⁸Yaku beene yanila tuboan mobisa tukon posidutukon, tukon posidutukon yanila aki nasilaka. Akiyo komeeng komian monggoola alayo yanila doi limang-Ku.

²⁹Tamang-Ku mo lapamo beekene yanila doi Yaku, lobian doi sasaibino. Tukon akiyo komeeng komian moalayo yanila doi Tamang-Ku limano.

³⁰Yaku tukon Tamang-Ku daano meeng.”

³¹Maka Yahudi miano mangala koidan batu sulano napo sakule Yesus.

³²Bai Yesus bantile doi yanila, “Komuyu lapamo kitayo Yaku mokubaiyo badaang kolimang monondok, Tama nasinumboliikon doi Yaku. Doi sasaibino limangoo, naando kai komo tealikene komuyu yase sakule Yaku?”

³³ Yahudidoo miano timbiliyo, “Bolikon kai Komu limang-limangoo mo monondokoo kami yase sakule Ikoo tukon batu, bai sabab Ikoo mokulokisanggene ko Mian Bisa. Ikoo meeng kobanggapi, muyase bunekene kobuto-Mu Mian Bisa.”

³⁴ Maka Yesus timbiliyo, “Bolikon kai doi mu Buku Ukumoo lalomo daano mototulis: Mian Bisa bantile, ‘Komuyu naiya ilah’?

³⁵Kita toiyo baikon indee komo totulis doi Kitab Moliyous lalomo teali posidutukon. Jadi, kalu Mian Bisa mebee bantilan ‘ilah’ doi mian badaang mo talimayo Konabantilan,

³⁶bulaando komuyu mobantile Yaku kulokisanggene ko Mian Bisa sabab Yaku bantile Yaku Mian Bisa na Pau? Banggokai Tamang-Ku piliyo Yaku tukon sumboliiyo doi Yaku doi dunia nia.

³⁷Kalu Yaku aki kulimange kolimang Tamang-Ku nasinumboliikon, inai pomangangga doi Yaku.

³⁸Bai Yaku mokubaiyomo, poanggayomo indee Kukinubai doo, mau kai komuyu aki poyase mangangga doi Yaku. Tukon buno doiya komuyu toiyo tukon alatiyo baikon Tama daano pomeenggon tukon Yaku, tukon Yaku daano pomeenggon tukon Tama.”

³⁹Yanila mounggolii loloon koidan napolakoyo Yesus, bai Yana tongosodii doi yaniladoo.

⁴⁰ Yesus abali doi Yordan Paisunobatango sembeleng, doi lipudoo Yohanes looluk namansauan banggapi, maka Yana ndoong indaa.

⁴¹Badaang komian molubat doi Yana. Yanila bantile, “Yohanes aki namongkubai komo minasaindinggon, bai sasaibino kona binantiloo namian nia bisa.”

⁴²Maka badaang komian indaa mangangga doi Yesus.