Read Banggai YOHANES 11 Bible Online

YOHANES 11 - Banggai bible

YOHANES 11

¹ Meeng komian kosambuno Lazarus ndoong doi Betania polaing-laing tukon utuso Maria tukon Marta.

² Maria doiyamo boinedoo mo kundongiiyo lisison babangi Yesus aino, maka soutiyo tukon nabuuk. Daano kotempo meeng Lazarus masakit.

³Doutusodoo molua pailukene doi Yesus, “Temeneno, utusonggami Temeneno mo mamaasikene masakit.”

⁴Sambuno Yesus lengele do bilitadoo, Yana bantile, “Sesel nia aki naikon namatekene. Naiya teali sulano ko Mian Bisa inakabasal, tukon sulano buno doiya Mian Bisa Napau inakabasal koidan.”

⁵Yesus mamaasikene Marta, Maria tukon Lazarus.

⁶Bai sambuno Yesus malaat bilita baikon Lazarus masakit, Yana sangada ndoong lua kooloyo doi nalipu.

⁷Lapa doiya maka nabantile doi napololaing-pololaing, “Mai kita abalimo doi Yudea.”

⁸Yanila timbiliyo, “Tama Guru, akiyoon namalumbit Yahudi miano yase sakule Tama tukon batu maka naapa doiya Tama yase abali koidan indaa?”

⁹“Bolikon kai meeng kooloyo songulo lua kojam?” Yesus nabantilano. “Mian mo ampakon oloyo, aki natakait sabab yana kitayo kodunia momadialango.

¹⁰Bai komian mo ampakon doi kalipookan takait, sabab akiyo komadialan modaano doi yana.”

¹¹Bunomo doiya Yesus nabantilan. Doibundu Yana bantile koidan, “Konda sobat Lazarus moolomo, bai Yaku taus bangune yana.”

¹²Pololaing-pololaing Yesus bantile, “Temeneno, kalu Lazarus moolo, sio yana naikon natotobo.”

¹³Yesus namakisuut doiyamo Lazarus matemo. Bai yanila neneeke Yesus namakisuut Lazarus tolongo moolo biasa.

¹⁴Tobikon doiya Yesus bantile doi yanila tukon tala-talaang, “Lazarus matemo.

¹⁵Bai Yaku sanaang koidan Yaku moakiyo indaa, sabab lobian kona monondokan doi komuyu, sulano komuyu moola maangga. Maimo doiya budodoo nda ampakon doi Lazarus.”

¹⁶Tomas mo binantil “I Pinga” bantil doi tula-tulano Yesus napololaing-pololaing, “Maimo nda lainge, mau nda mate polaing Yana!”

¹⁷Sambuno Yesus polong doi lipudoo, Lazarus sangkapo kooloyo kona kinibulan.

¹⁸Betania nggaup ko Yerusalem, uga-ugaate tolu kokilo kona kodoon.

¹⁹Badaang ko Yahudi miano molapamo lubat molubotiiyo Marta tukon Maria tuuk hibule yanila sabab koitusoila momate.

²⁰Sambuno Marta lengele Yesus molubato, yana kobuaton motalimayo Yesus, bai Maria ndoong doi bonua.

²¹Marta bantile doi Yesus, “Temeneno, andeno Temeneno daano naimbaa doi tempodoo, tantu koitusonggami aki namate.

²²Mau nabuno doiya yaku toiyo baikon mau budodoiya nia koidan Mian Bisa naikon beena oila ko Temeneno nakinabi doi Yana.”

²³“Koutusomuyu naikon abalimo tubo,” Yesus bantile doi Marta.

²⁴Marta timbiliyo, “Yaku toiyo Lazarus tubo koidan kalu mian mate inotuboi koidan doi Oloyo Nakiamatan.”

²⁵“Yakumo komo beena tuboan tukon mootuboiyo komian mate,” Yesus bantile doi Marta. “Mian mo mangangga doi Yaku naikon tubo, mau nalapamo yana mate.

²⁶Tukon mian motubo mo anggayo Yaku, posidutukon aki naikon namate. Ikoo anggayo doiya kubantilanoo?”

²⁷“Yesus,” Marta timbiliyo, “yaku anggayo Temeneno Mian Bisa Napau, Tomundo Pasalamat naikon mo lubat doi dunia nia.”

²⁸Sambuno Marta bantile buno doiya, yana ampakon uange Maria, utuso tukon polisoukiyo yana, “Tama Guru daano naimbaa; Yana mansadaikene ikoo.”

²⁹Sambuno Maria lengele doiya, kosobiton bangun, maka ampakon pososuung tukon Yesus.

³⁰Doiya kosinggatoo, Yesus akiyoon nausok doi kampung. Yana daanoon doi lipudoo Marta nalaatano.

³¹Yahudi miano mo daano hibule Maria doi bonua, kitayo Maria moso-mosobit bangun tukon kalual; jadi yanila ampakon loloiyo yana, sabab yanila aanggene yana ampakon doi kibul sulano nakokiil.

³²Sambuno Maria polong doi lipudoo Yesus tukon kitayo yana, Maria ladanggene kotuulo doi Yesus salaano tukon bantile, “Temeneno, ande-andeno Temeneno daano naimbaa doiya kosinggatoo, tantu koutusonggami aki namate.”

³³Sambuno Yesus kitayo Maria mokokiil, tukon Yahudi miano mo lubat polaing Mariadoo kokiil koidan, konoano poloon tukon Yana tokita poloon tuuno.

³⁴Maka Yana sadaiyo doi yanila, “Doiyaa kopo tadinano yana?” “Mai nda kitayo, Yesus,” yanila bantile. Maka Yesus kokiilo.

³⁵Maka Yahudidoo miano bantile, “Kitayo, bulaando kona seangano Lazarus!”

³⁶

³⁷Bai doi yaniladoo daano komo bantile, “Yana kubaiyo komian piit teali mongkita, bulaando Yana moaki nanggoola kubaiyo sulano Lazarus naaki namate?”

³⁸Yesus poloono koidan, maka naampakon doi kibuloo. Do kibuloo daano meeng koleeng mo sinunggup tukon batu mobabasal.

³⁹“Poliate koiya batunokon,” Yesus bantile. Marta, utuso Lazarus matedoo, timbiliyo, “Bai Yesus, yana sangkapo kooloyo kona tinadinan. Tantu koboono boano!”

⁴⁰Yesus bantil doi Marta. “Bolikon kai lapamo kubantile doi komuyu: Kalu ikoo anggayo, ikoo kitayo bulaando kona babasalan ko Mian Bisa nakuasa!”

⁴¹Maka yanila saakene do batudoo. Doibundu Yesus lelengea doi timbu tukon bantile, “Kinatauwan, Tama sabab Ikoo lapamo ndongoliiyo Yaku.

⁴²Yaku toiyo Ikoo sidutu ndongoliiyo Yaku, bai Yaku bantile naiya, tuuk doi mian badaang mo daano naimbaa; sulano yanila anggayo baikon Ikoomo komo bintekene Yaku.”

⁴³Salataa lapa bantile buno doiya, Yesus nggeleamon tukon alalo mobabasal, “Lazarus, tobuat!”

⁴⁴Maka tobuato Lazarus mo matedoo. Limano tukon aino daano mototombuki toik pabalun, tukon koduduso daano mototombuki tukon toik potombuki duduso. “Liate kotoik pabalun sulano yana naloi ampakon,” Yesus bantile doi mianoo badaang modaano idoo.

⁴⁵Badaang doi Yahudi miano molubat lubotiiyo Maria, anggayomo Yesus, sambuno yanila kitayo do kajadianoo.

⁴⁶Bai moimoiya komian doi yanila ampakon doi Parisi miano maka pelenggene oila komo lapamo Yesus kubaiyo.

⁴⁷Tobikon doiya Parisi mian-miano tukon imam-imam kapalano mongkubai kombulan tukon Pangadilan Agama. Yanila bantile, “Kita sio nda mongkubai oila? Mian nia mongkubai badaang komo minasaingdinggon!

⁴⁸Kalu tolongo kita batadikene Yana nabuno naiya sidutu sasaibino komian mangangga doi Yana. Tukon doi napupusan pamarenta Roma naikon lubat tukon manase Temeneno Na Bonua tukon sasaibino kobangsa nai nda lipu nia!”

⁴⁹Daano komeeng doi yaniladoo kosambuno Kayafas, imam babasal doi taundoo, bantile, “Komuyu akiyo kopo tinoi.

⁵⁰Oilakai komuyu moaki pomangalati baikon komian badaang, lobian komonondok meeng komian momate kalu baino sasaibino konda bangsa inakabus?”

⁵¹Kona bisaan Kayafas bantile doiya, bolikon doi napikilan susuungo. Bai buno meeng koimam babasal doi taundoo yana tantukenemo baikon Yesus naikon mate tuuk doi Yahudi miano.

⁵²Tukon bolikon tolongo tuuk doi Yahudi miano, bai koidan tuuk mopototongikene tukon pomeenggene ko Mian Bisa nalabuk-labuk mo pobandakono.

⁵³Tambuuno doi oloyodoo kopamarenta Yahudi pomeenggono sulano akateyo Yesus.

⁵⁴Tobikon doiya Yesus akimo nabaakitakon doi mian nabadaangan doi Yahudi miano. Yesus tinggalemo ko Yudea, maka naampakon doi kota kosambuno Efraim lolani kopadang lalomo. Idoo Yana ndoong tukon Kupololaing-pololaing.

⁵⁵Doiya kosinggatoo lolanimo ko Oloyo Babasal Paskah Yahudi. Badaang komian doi kampung-kampung molapamo ampakon doi Yerusalem sulano najalanggene koupacara bakumosian butong moakiyoon nalaate do lameanoo.

⁵⁶Yanila umboliiyo Yesus, tukon tempo pototongi doi Temeneno Na Bonua, yanila bantil meeng doi bailon, “Bulaando komu palaat? Ugaate Yana aki nalubat nai lamean nia.”

⁵⁷Yanila bantile buno doiya sabab imam-imam kapalano tukon Parisi mian-miano lapamo kaluale koparenta baikon mian mo toiyo inaando Yesus nadaanoan, sio napailukene sulano Yana nalinako.