Read Banggai YOHANES 12 Bible Online

YOHANES 12 - Banggai bible

YOHANES 12

¹Noom kooloyo akiyoon nalaate ko Oloyo Babasal Paskah, Yesus ampakon doi Betania. Doi lipudoo baino Lazarus komo ndoong yana mo lapamo Yesus otuboiyo doi namatean.

²Indaa yanila okoniiyo Yesus, tukon Marta komo leleaniyo. Lazarus tukon mian-mian molubat osulang kaan polaing-laing tukon Yesus.

³ Doibundu Maria lubat makanggi uga-ugaate sembeleng koliter kolisison babangi narwastu mo maaling koolino. Yana kundongiikene do lisisonnoo doi Yesus aino, maka soutiyo tukon nabuuk. Posaapon do bonuadoo tealimo babangi sabab do lisisonnoo boono.

⁴Bai Yudas Iskariot, meeng komian doi Yesus napololaing — doibundu mokulokisene Yana — bantile,

⁵“Bulaando do lisisonnoo mobabangi moaki nabinalukon tolu kosakato kodoy suasa, tukon kodoyno bineekon doi mian motalalais?”

⁶Yudas bantile buno doiya bolikon kai yana otingoniiyo komian motalalais, bai sabab yana pondikuk. Yana biasa pulute kodoy kas polong kona inusol.

⁷Bai Yesus bantile, “Sodiiyomo koboinenokon! Yana kubaiyo naiya tuuk doi oloyo kutinadinan.

⁸ Mian motalalais sidutu daano doi komuyu, bai Yaku aki.”

⁹Badaang ko Yahudi miano molengele baikon Yesus daano doi Betania, jadi yanila ampakon indaa. Yanila ampakon bolikon tolongo doi Yesus, bai koidan yanila yase mokitayo Lazarus mo lapamo inotuboi doi namatean.

¹⁰Doiyamo kosababpo imam-imam kapalano yase akateyo Lazarus koidan;

¹¹doiyamo kosababpo tobikon nabadaang ko Yahudi miano motinggale yanila tukon manganggamo doi Yesus.

¹²Modoakon kooloyo mian badaang mo lapamo lubat lamekene ko Paskah yanila ndongoliiyo baikon Yesus daanomo doi loloon tangano lubat doi Yerusalem.

¹³ Maka yanila mangala palem-palem loono maka yanila ampakon sambute Yesus tukon yanila tolo-toloukon, “Nggaale ko Mian Bisa! Binalakaati Yana mo lubat tukon Temeneno sambuno. Binalakaati ko Tomundo Israel!”

¹⁴Yesus malaat meeng kokaladai molumboon, tukon Yana lokitiyo. Maka tealimo komo totulis doi Kitab Moliyous lalomo:

¹⁵ “Inai momatakut, boine Sion! Kitayo kopo Tomundo molubat, molokiti meeng kokaladai molumboon!”

¹⁶Doiya kosinggatoo Yesus napololaing-pololaing akiyoon naalatiyo sasaibino doiya. Bai sambuno Yesus inakabasal doi namatean, maka yanila neneeke baikon komian badaang nakokubai motuuk doi Yana lapamo totulis doi Kitab Moliyous lalomo.

¹⁷Mian badaang mo daano doiya singgat Yesus nauangano Lazarus tobuat doi kibul tukon otuboiyo doi namatean, banggadudul mebee katalangan doi Lazarus nai notuboiyanoo.

¹⁸Doiyamo kosababpo mian badaangoo ampakon doi Yesus sabab yanila lengele baikon Yanamo komo mongkubai mominasaindinggonoo.

¹⁹Maka Parisi mian-miano bantile meeng tukon bailon, “Kita aki nda nggoola mongkubai oioila! Pokitayomo, sasaibino kodunia ampakono lainge Yana!”

²⁰Dopai mian mobadaangoo mo ampakon doi Yerusalem mobakaleda doi lameanoo oloyono daano komoimoiya ko Yunani miano.

²¹Yanila lubat doi Filipus tukon bantile, “Utus kalu nggoola, kami yase pososuung tukon Yesus.” (Filipus kona luwean doi Betsaida doi Galilea.)

²²Maka Filipus ampakon bontiikene doi Andreas, boobus maka yanila luaila pelenggene doi Yesus.

²³Yesus bantile doi yanila, “Laatemo kotempono Manusia na Pau nainakabasalan. Bisa tuuno Kubantilan nia:

²⁴Kalu meeng kolabue batuno aki natiniduk doi buta tukon mate, do labuedoo batuno tolongo tataap meeng. Bai kalu do labuedoo batuno mate, maka nasodo sawokene badaang kolabue.

²⁵ Mian mo seange kona tuboan teali lapus kona tuboan. Bai mian mo sikitene kona tuboan doi dunia nia yana piyalayo kotuboan mobisa tukon posidutukon.

²⁶Mian mo yase leleani Yaku sio nalainge Yaku; sulano Kupeleleani polaing-laing Yaku inaando Kuanoan. Mian mo leleani Yaku naikon Tamang-Ku odotiiyo.”

²⁷“Noang-Ku susa; oila Kubinantil budodoiya? Nggoola kai Yaku bantile, ‘Tama, osodiiyo Yaku diabudodoo’? Bai sulano Kutoupiyo naiya sakisanan nia naiyamo kona motuuk Kulubatan.

²⁸Tama, akabasale kosambu-Mu!” Maka tololongol koalalo doi timbu mobantile, “Yaku lapamo akabasale, tukon Yaku akabasale koidan.”

²⁹Mian badaang mo daano idoo komo lengele alalodoo. Yanila bantile, “Koiya selese!” Bai daano komo bantile koidan, “Bolikon! Malaekat komo basilingan doi Yana!”

³⁰Maka Yesus bantil doi yanila, “Do alaloo molongol, bolikon tuuk doi Yaku, bai tuuk doi komuyu.

³¹Diabudodoo laatemo kotempono dunia natinindokiiyan; diabudodoo kopamarenta dunia ngginolingo.

³²Bai Yaku nia, kalu lapamo inakatandak nai dunia nia bungkukono, Yaku naikon kanggiyo sasaibino komian doi Yaku.”

³³Yana bantile buno doiya sulano otudoikene bulaando kona tealian Yana momate.

³⁴ Mian badaangoo bantil doi Yana, “Mololoi mai Buku Ukum, Tomundo Pasalamat Yana tubo posidutukon. Bulaando Ikoo nggoola bantile baikon Manusia na Paudoo sio nainakatandak doi buta bungkukono? Indee do Manusiadoo na Pau?”

³⁵Yesus timbiliyo, “Tolongo budodoiya kona nadaanoan do madialanoo doi komuyu. Jadi, poampakono modaanoon do madialanoo, sulano komuyu akipoo linaat kalipookan. Mian mo ampakon doi kalipookan aki napoo toiyo inaando kona ampakonan.

³⁶Poanggayomo do madialanoo daanoon doi komuyu, sulano komuyu teali pau-pau madialan.” Sodo lapa Yesus bantile buno doiya, Yana ampakono indaa tukon aki Kuyase bangokitanggon doi yanila.

³⁷Mau nalapamo badaang komo minasaindinggon Yesus nakinubai doi yanila salaano, yanila aki namangangga doi Yana.

³⁸ Maka tealimo oila Nabi Yesaya nabinantil, “Temeneno, indeemo komiano komo anggayo komai bilita? Doi indee miano ko Temeneno nakuasa nainokitakonggonan?”

³⁹Doiyamo kosababpo yanila aki namangangga, sabab Yesaya bantilemo koidan, “Mian Bisa bantile,

⁴⁰ ‘Yaku opiite komatanoila, kubaiyo yanila noano matikas, sulano komatanoila aki nanggoola mokita, yanila napopikikon aki namangalati. Sulano yanila aki naabali doi Yaku, maka Yaku otuboiyo yanila.’ ”

⁴¹Yesaya bantile buno doiya sabab yana lapamo kitayo Kona kinabasalan Yesus, tukon basilingan tuuk doi Yana.

⁴²Mau nabuno doiya, badaang komian, buno kai pamarenta Yahudi miano anggayomo doi Yesus. Bai yanila aki nabarani mangakukene doiya tukon nabisaan tuuno, sabab yanila matakutene inai-inaikene Parisi miano aki napataikene yanila usok doi bonua kaleda.

⁴³Yanila lobian kona iyasano momalaat panggaal doi banggapi tukon doi Mian Bisa napokindokan.

⁴⁴Maka Yesus nggeleamon, “Mian mo anggayo doi Yaku, bolikon doi Yaku kona inangga, bai doi yanamo bintekene Yaku.

⁴⁵Tukon mian mo kitayomo Yaku, kitayomo Yana mo bintekene Yaku.

⁴⁶Yaku lubat doi dunia nia buno madialan, sulano sasaibino komian mo anggayo Yaku aki nandoong doi kalipookan lalomo.

⁴⁷Mian mo mondongolii Kuotunggul, bai aki naloingiyo — bolikon Yaku komo ukume yana. Sabab Yaku lubat bolikon ukume kodunia, bai sulano Kusalamatene.

⁴⁸Mian mo tolake Yaku tukon aki mondongolii Kubantilan, lapamo daano komo tindokiiyo yana. Bantilan mo Yaku pelenggene, doiyamo komo tindokiiyo yana doi Oloyo Nakiamatan.

⁴⁹Sabab Yaku aki Kubasalita doi Kumongiasan susuunggu; Tama mo sumboliiyo Yaku, Yanamo komo bintekene Yaku, oila komo moola Yaku bantile tukon pelenggene.

⁵⁰Tukon Yaku toiyo Dona parentadoo mebee tuboan mobisa tukon posidutukon. Maka Yaku pelenggene buno Tama nainotunggukon Yaku.”