Read Banggai YOHANES 13 Bible Online

YOHANES 13 - Banggai bible

YOHANES 13

¹Meeng kooloyo akiyoon ko Oloyo Babasal Paskah, Yesus toiyo baikon laatemo kotempono Yana tinggalano nadunia nia sulano abali doi Tamano. Yana mamaasikene ko mian-mian mo tealimo namian doi dunia nia, tukon Yana tataap mamaasikene yanila polong doi napupusan.

²Yesus tukon Napololaing-pololaing daanoon mokaan popook. Ibiliis usokiyo Yudas noano lalomo Simon Iskariot napau sulano nakulokisanggene Yesus.

³Yesus toiyo baikon Tama beekenemo sasaibino kokuasa doi Yana. Yana toiyo koidan baikon Yana lubat doi Mian Bisa tukon naikon Yana abali doi Mian Bisa.

⁴Sambuno buno doiya Yana kokondong, bukayo Najubah, tukon pagete anduk kooako.

⁵Lapa doiya Yana mokundang paisu doi meeng kosombe, maka atambuune kumosiyo Napololaing-pololaing aino tukon itase anduk mo tokooton doi oakodoo.

⁶Polong Yana doi Simon Petrus, mo bantile, “Temeneno, bulaando Temeneno mo kumosiyo koainggu?”

⁷Yesus timbiliyo, “Budodoiya ikoo aki mumangalatikene oila Kukinubai nia, bai totiiliyo naikon ikoo mangalatikene.”

⁸“Inai, Temeneno,” Petrus bantile doi Yesus, “Inai Temeneno mokumosiyo koainggu!” Bai Yesus timbiliyo, “Kalu Yaku aki kukumosiyo koaimu ikoo akiyo komu potaamian tukon Yaku.”

⁹Simon Petrus bantile, “Kalu buno doiya, Temeneno, inai motolongo ainggu tolong bai limanggu maka olunggu koidan!”

¹⁰“Mian mo lapamo basau, lapamo bilisii sasaibino,” Yesus bantile doi Petrus. “Yana akimo napalaluu kinumosi koidan; baino aino. Komuyu nia lapamo bilisii bai aki nasasaibino.” (

¹¹Yesus toiyomo indee naikon komo kulokisanggene Yana. Doiyamo kosababpo Yana bantile, “Komuyu naiya lapamo bilisii, bai aki nasasaibino.”)

¹² Sala lapa Yesus kumosiyo yanila aino, Yana pakeyo koidan Najubah maka osulang. Maka Yana bantile doi yanila, “Komuyu kai alatiyo indee kolangge mo sodo lapa Kukubaiyo doi komuyu?

¹³Komuyu uange Yaku Guru tukon Temeneno. Takainomo bunomo doiya.

¹⁴Kalu Yaku buno Temeneno tukon po Guru kumosiyo koaimu, komuyu koidan sio popokumosi aimuyu.

¹⁵Yaku mebee sontoh nia doi komuyu, sulano mau komuyu koidan kubaiyo indee komo lapamo Yaku kubaiyo doi komuyu.

¹⁶ Bisa tuuno Kubantilan nia: komeeng koata aki nalobian kona babasalan doi natuan dungolan, tukon meeng kobito-bito aki nalobian kona babasalan doi mian mo bintekene.

¹⁷Kalu komuyu lapamo toiyo sasaibino nia, monondoko kalu komuyu kubaiyomo.

¹⁸ Oila Kubinantil nia bolikon tuuk doi komuyu sasaibino. Yaku toiyo inde-indee komo lapamo Yaku lilike. Bai indee komo lapamo totulis doi Kitab Moliyous, sio nateali, doiyamo ‘Mian mo kaan polaing Yaku, naikon lobosia-Ku.’

¹⁹Langgedoo Yaku pelenggene doi komuyu budodoiya, akiyoon nateali, sulano kalu do langgedoo tealimo naikon, komuyu naikon anggayomo baikon Yakumo Yana mo binantil YAKU DAANO.

²⁰ Bisa tuuno Kubantilan nia: Indee komo talimayo komian Yaku mo bintekene, talimayo Yaku. Tukon indee komo talimayo Yaku, talimayo Yana bintokana-Ku.”

²¹Sala lapa Yesus bantile buno doiya, Yana teali poloon tuuno. Maka Yana bantile, “Bisa tuuno Kubantilan nia: Daano meeng komian doi komuyu komo kulokisanggene Yaku.”

²²Napololaing-pololaing pombaleng meeng tukon bailon tukon yanila masaingding sabab yanila aki napo toiyo indee komiano.

²³Pololaing Yesus mo seseange osulang doi Yesus bibilo.

²⁴Simon Petrus beena kodean doi yana sulano yana mansadai doi Yesus indee komiano mo minakisuuti.

²⁵Maka dona pololaing koolaniyo Yesus, tukon mansadai, “Indee yana, Temeneno?”

²⁶Yesus timbiliyo, “Mian mo Yaku mobeekene koroti Yaku mo kemeke doi mangko lalomo, doiyamo komiano.” Maka Yesus mangala meeng koroti patolo, yana kemeke doi mangko lalomo; maka beekene doi Yudas Simon Iskariot napau.

²⁷Mosobit tuuno sambuno Yudas talimayo do rotidoo, Ibiliis usokiyomo konoano lalomo. Maka Yesus bantile doi yana, “Kubaiyomo mosobit oila komo ikoo yase kubaiyo.”

²⁸Akiyo komeeng doi yaniladoo mo osulang kaan idoo moalatiyo bulaando Yesus mobantile doi Yudas buno doiya.

²⁹Daano komo aanggene Yesus bintekene Yudas mongoli meeng kolangge mo palaluu doi lameanoo, kai mebee doy soisik doi mian motalalais — sabab Yudas pangabos doy.

³⁰Sambuno Yudas talimayo do rotidoo yana polaing tobuat. Oloyo popooko.

³¹Sambuno lapa Yudas ampakon, Yesus bantile, “Budodoiya Manusia na Pau inakabasal, tukon Mian Bisa inakabasal lolo doi Yana.

³²Kalu Mian Bisa inakabasal lolo doi Yana, mau Yana inakabasal lolo doi Nabutong susuungo. Tukon Mian Bisa akabasale Yana tukon soisobiton.

³³ Daku pau-pau, Yaku akimo kudungol malumbit tukon komuyu. Komuyu naikon umboliiyo Yaku, bai pokakanamo mo lapamo Yaku bantile doi pamarenta Yahudi, bunomo koidan Kubantilan doi komuyu; doi lipu Kuampakonan, komuyu akipo nggoola lubat.

³⁴ Parenta boolu Kubeekene doi komuyu: Poposeang meeng tukon bailon. Buno pokakana Yaku seange komuyu, bunomo lakon doiya komuyu sio po poseang.

³⁵Kalu komuyu toiyo poseang, sasaibino komian toiyo baikon komuyu Kupololaing-pololaing.”

³⁶“Temeneno, Temeneno yase ampakon doiyaa?” Simon Petrus sadaiyo doi Yesus. Yesus timbiliyo, “Doi yaando Kuampakonan, budodoiya ikoo aki nanggoola malaing. Ikoo naikon lainge Yaku doibundu.”

³⁷“Temeneno, bulaando yaku aki namoola lainge Temeneno budodoiya?” Petrus mansadai koidan. “Yaku yase mate tuuk doi Temeneno!”

³⁸Yesus timbiliyo, “Bisa kai ikoo moyase mate motuuk doi Yaku? Mutoiyo, akiyoon nakokuuwa komanuk naikon, ikoo tolumo luunggon mubantile baikon ikoo aki mutingoniiyo Yaku!”