Read Banggai YOHANES 14 Bible Online

YOHANES 14 - Banggai bible

YOHANES 14

¹“Inai nasusa konoamu,” Yesus bantile doi yanila. “Pomangangga doi Mian Bisa, tukon poanggayomo doi Yaku koidan.

²Doi Tamang-Ku nabonua daano badaang kolipu dungolan. Yaku taus indaa sulano Kusadiayo kodungolan motuuk doi komuyu. Yaku aki naikon Kubantile buno doiya doi komuyu, kalu doiya aki nabisa.

³Kalu Yaku lapamo sadaiyayo kopodungolan, Yaku abali koidan tukon ndokiiyo komuyu, sulano inaando Kuanoan, idoomo koidan kopoo dungolan.

⁴Doi lipu Kutausan kololoono komuyu toiyo.”

⁵Maka Tomas bantile doi Yesus, “Temeneno, kami aki mai toiyo inaando Temeneno natausan, bulaando komai toiyano kololoono?”

⁶Yesus timbiliyo, “Yakumo kololoon sulano nda toiyo ko Mian Bisa tukon malaat tuboan. Akiyo komeeng komian momoola lubat doi Tama, kalu aki nalolo doi Yaku.

⁷Kalu kai komuyu tingoniiyo Yaku, tantu komuyu naikon tingoniiyo ko Tamang-Ku koidan. Budodoiya komuyu tingoniiyomo Yana, tukon lapamo kitayo Yana.”

⁸Maka Filipus bantile doi Yesus, “Temeneno, tudoikene Tama doi kami, sulano mai toiyo tuuno.”

⁹Bai Yesus timbiliyo, “Buunia kolumbi-lumbito daku polaingan komuyu, tukon koidan ikoo akiyoon mutingoniiyo Yaku, Filipus? Mian mo lapamo kitayo Yaku, lapamo kitayo ko Tama. Bulaando ikoo nggoola bantile, ‘Tudoikene ko Tama doi kami?’

¹⁰Filipus! Kai aki muanggayo, baikon Yaku pomeenggon tukon Tama, tukon Tama pomeenggon Yaku? Oila Kubinotiikon doikoo, aki kubantile doi butong-Ku susuunggu. Tama mo daano pomeenggon tukon Yaku, yanamo komo limange doiya sasaibino.

¹¹Poanggayo doi Yaku, baikon Yaku pomeenggon tukon Tama tukon Tama pomeenggon Yaku. Kalu naakiyan, poanggayomo tobikon oila komo lapamo Yaku kubaiyo.

¹²Bisa tuuno Kubantilan nia: Mian mo mangangga doi Yaku, naikon kubaiyo oila mo lapamo Yaku kubaiyo — kai lobian babasal Nakinubai koidan — sabab Yaku ampakon doi Tamang-Ku.

¹³Tukon oilamo kopoo kinabi mo mangatas doi sambung-Ku, doiya naikon Yaku kubaiyo tuuk doi komuyu, sulano Tama kinabasal lolo doi Pau.

¹⁴Oila kopoo kinabi luwedoi sambung-Ku naikon Yaku kubaiyo.”

¹⁵“Kalu komuyu mamaasikene Yaku, komuyu naikon ampakonggene Kuparenta.

¹⁶Yaku naikon kabiyo doi Tama, tukon Yana naikon beekene doi komuyu meeng ko Potombonii bailon, naikon mondoong polaing komuyu polong posidutukon.

¹⁷Yanadoo Mian Bisa Na Roh mo okitakanggene ko Mian Bisa nabisa-bisaan. Dunia aki nanggoola talimayo Yana, sabab aki napo kitayo kabai tingoniiyo. Bai komuyu tingoniiyo Yana, sabab Yana ndoong polaing komuyu tukon pomeenggon komuyu.

¹⁸Komuyu aki kutinggale meeng-meeng kopau pokakana kopau tuboon. Yaku naikon abali doi komuyu.

¹⁹Baino budodoiya tolong komian doi dunia akimo nakitayo Yaku. Bai komuyu kitayo Yaku. Tukon tobikon Yaku tubo, mau komuyu bai tubo.

²⁰Kalu laate kooloyono, komuyu toiyo baikon Yaku pomeenggon tukon Tama komuyu pomeenggon tukon Yaku, tukon Yaku pomeenggon komuyu.

²¹Mian mo talimayo Kuparenta-parenta tukon kubaiyo, yanamo komo mamaasikana-Ku. Tamang-Ku naikon mamaasikene komian mo mamaasikene Yaku. Yaku bai naikon mamaasikene mianoo tukon okitakene kobutong-Ku doi yana.”

²²Yudas (bolikon Yudas Iskariot) mansadai doi Yesus, “Temeneno, bulaando Temeneno yase okitakanggene kobuto-Mu doi kami bolikon mian doi dunia?”

²³Yesus timbiliyo, “Mian mo mamaasikene Yaku, naikon loloiyo Kuotunggul. Tamang-Ku naikon mamaasikene yana. Tama tukon Yaku naikon lubat doi yana tukon podungoli yana.

²⁴Mian mo aki namamaasikana-Ku, aki naloloiyo Kuotunggul. Otunggul komuyu mondongoliiyodoo, bolikon doi Yaku, bai luwedoi Tama mo bintekene Yaku.

²⁵Sasaibino doiya Kubantile doi komuyu, modaano Yaku podungoli komuyu.

²⁶Bai ko Mian Bisa Na Roh, Potombonii naikon Tama bintekene luwedoi sambung-Ku, Yanamo komo otunggukene komuyu kolangge tukon ingotiikene komuyu sasaibino komo lapamo Yaku bantile doi komuyu.

²⁷Monondok Yaku otinggale doi komuyu. Kumonondokan susuunggu Yaku mo beekene komuyu. Kubineekon doiya bolikon buno mian doi dunia nabineekon doi komuyu. Inai posusa, inai pomatakut.

²⁸Komuyu lapamo lengele Kubantilan, ‘Yaku naikon ampakon, bai Yaku lubat koidan doi komuyu’. Kalu komuyu mamaasikene Yaku, komuyu naikon sanaang Yaku ampakon doi Tamang-Ku, sabab Tamang-Ku lobian kona babasalan doi Yaku.

²⁹Yaku pailukene doiya budodoo doi komuyu, akiyoon sasaibino nateali, sulano kalu tealimo, komuyu anggayomo.

³⁰Yaku akimo Kubasalita lobian badaang koidan tukon komuyu, sabab laatemo kotempono kopamarenta dunia nalubatan. Bai yana aki nakuasaiyo kobutong-Ku.

³¹Mau sasaibino doiya sio nateali sulano dunia natoiyo baikon Yaku mamaasikene Tama tukon kubaiyo sasaibino Tama napinarentakon doi Yaku. Oh, maimo kita nda ampakon naimbaa.”