Read Banggai YOHANES 15 Bible Online

YOHANES 15 - Banggai bible

YOHANES 15

¹Yesus bantile koidan, “Yaku anggur batango mo bisa, tukon Tamang-Ku komo limange kona asi.

²Meeng kopangano doi batangodoo mo aki nasao, pinatol, tukon pangano mo sao, pinupui koloono bailon tukon binilisii sulano nalobian badaang kosaano koidan.

³Komuyu lapamo bilisii sabab otunggul mo lapamo Yaku beekene doi komuyu.

⁴Potataap pomeenggon tukon Yaku tukon Yaku tataap pomeenggon tukon komuyu. Kokayung pangano susuungo aki nanggoola sao, kasuali yana tataap liit doi batango. Bunomo lakon doiya komuyu nggoola sao, kalu tataap pomeenggon tukon Yaku.

⁵Yakumo koanggur batango, tukon komuyu kopanga-pangano. Mian mo tataap pomeenggon tukon Yaku tukon Yaku maka yana, naikon sao badaang; sabab kalu bolikon Yaku, komuyu aki nggoola mongkubai oioila.

⁶Mian mo aki natataap pomeenggon tukon Yaku, naikon sinakukon buno kayung pangano, boobus teali motuul. Kayung-kayung pangano mo buno doiya, naikon pinototongikon tukon sinakukon doi aung lalomo, maka nasinua.

⁷Kalu komuyu tataap pomeenggon tukon Yaku tukon Kuotunggul ano doi noamuyu lalomo, pomangkabimo doi Tama indeemo kopo iniyas; domu kakabidoo tinalima.

⁸Kalu komuyu sao badaang, Tamang-Ku inakabasal; tukon buno doiya komuyu bisa-bisa teali Kupololaing.

⁹Buno Tama mamaasikene Yaku, bunomo lakon doiya Yaku mamaasikene komuyu. Siokai komuyu potataap tubo buno mian Yaku mo mamaasikene.

¹⁰Kalu komuyu ampakonggene Kuparenta-parenta, komuyu tataap tuuno doi Kumaasi, pokakana buno Yaku tataap tuuno doi Tama namaasi sabab ampakonggene Kona parenta-parenta.

¹¹Sasaibino naiya Kubontiikene doi komuyu, sulano Kulabaanoo daano doi noamuyu lalomo, tukon komu labaan teali monondok.

¹² Naiyamo Kuparenta: po poseseang meeng tukon bailon, pokakana buno Yaku mamaasikene komuyu.

¹³Mian mo seange tuuno kona sobat-sobat doiya miano mo nggoola kona tuboan motuuk doi yanila.

¹⁴Komuyu daano Kusobat-sobat, kalu komuyu kubaiyo kolangge mo Yaku parentakene doi komuyu.

¹⁵Komuyu akimo Kuanggene ata, sabab koata aki natoiyo oila komo daano tumbuno kubaiyo. Komuyu kuuange sobat, sabab sasaibino Kulinongol doi Tamang-Ku lapamo Kupailukene doi komuyu.

¹⁶Bolikon komuyu komo piliyo Yaku. Yakumo komo piliyo komuyu, tukon sumboliiyo komuyu ampakon sulano posao badaang — saono mo aki nalokis. Maka Tama naikon beekene doi komuyu oilamo komuyu nakinabi doi Yana moluwe tukon sambung-Ku.

¹⁷Naiyamo Kuparenta doi komuyu: Poposeang meeng tukon bailon.”

¹⁸“Kalu kai dunia mosikitene komuyu, poneneeke baikon Yaku lapamo lolukon dunia mosikitana-Ku.

¹⁹Andeno komuyu dunia namian, komuyu nia dunia mamaasikene sabab namian. Bai lapamo Yaku lilike komuyu doi dunia, jadi komuyu bolikono dunia namian. Doiyamo kosababpo dunia namosikitene komuyu.

²⁰ Poneneeke oila komo lapamo Yaku pailukene doi komuyu, ‘Koata aki nalobian babasal doi moodungele.’ Kalu yanila lapamo sakisaayo Yaku, yanila naikon sakisaayo komuyu koidan. Kalu yanila loloiyo Kuotunggul, yanila loloiyo kopo otunggul koidan.

²¹Sasaibino doiya yanila kubaiyo tuuk doi komuyu, sabab komuyu pololaingo Yaku, sabab yanila aki natingoniiyo Yana mo bintekene Yaku.

²²Kalu andeno aki Kulubat tukon aki Kubontiikene sasaibino doiya doi yanila, yanila aki nadaano kona lalim. Bai budodoiya yanila akiyono kona poalasan koidan motuuk yanila nalalim.

²³Mian mosikitene Yaku, mosikitene ko Tamang-Ku.

²⁴Kalu kai doi yaniladoo Yaku aki Kubaiyo kolangge-langge mo akiyoon idan mian bailon kubaiyo, yanila akiyo kona lalim. Bai budodoiya yanila lapamo kitayo oila Kukinubai, tukon yanila mosikitenemo Yaku maka Tamang-Ku.

²⁵ Takainomo bunomo doiya, sulano natealimo oila komo totulis doi yanila na Buku Ukum lalomo, doiyamo: ‘Yanila mosikitene Yaku mau naakiyo kona poalasan.’

²⁶Yaku naikon mosumbolii doi komuyu komeeng ko Potombonii mo luwedoi Tama. Yanamo ko Roh mobisa mo okitakene ko Mian Bisa nabisa-bisaan tuuno. Kalu Yana lubat, Yana mebee salita motuuk doi Yaku.

²⁷Tukon komuyu koidan sio pobeena salita motuuk doi Yaku, sabab komuyu lapamo polaing Yaku salataa doi tempono.