Read Banggai YOHANES 16 Bible Online

YOHANES 16 - Banggai bible

YOHANES 16

¹Sasaibino doiya Kupailukene doi komuyu sulano komuyu naaki podampas.

²Komuyu siniika doi bonua-bonua kaledaan. Tukon naikon lubat kotempono baikon komian mo akateyo komuyu naikon yana anggene tulutiyo ko Mian Bisa.

³Yanila kubaiyo doiya doi komuyu sabab yanila akiyoon natingoniiyo ko Tamang-Ku mau Yaku.

⁴Bai budodoiya Yaku bantile doi komuyu, sulano doiya kalu naikon teali, komuyu poneneeke baikon Yaku lapamo pailukene doi komuyu.” “Langge nia aki Kupailukene tumbeno doi komuyu, mangaani Yaku daano polaing-laing komuyu.

⁵Bai budodoiya Yaku naikon ampakon doi Yana mo bintekene Yaku; tukon akiyo komeeng doi komuyu momansadaikene doiyaa Kuampakonan.

⁶Budodoiya tolongo susa konoamu, padungga Yaku mobantilemo do langgedoo doi komuyu.

⁷Bai Yaku bantile komo bisa doi komuyu: Lobian monondok kona tuukan doi komuyu, mangaani kalu aki Kuampakon, Potomboniidoo aki nalubat doi komuyu. Bai kalu Yaku ampakon, Yaku naikon sumboliiyo Yana doi komuyu.

⁸Kalu Yana lubat, Yana naikon okitakanggene doi dunia koalatino mobisa dolalimoo, doi oila komo bisa, tukon komo doi Mian Bisa naukuman.

⁹Yana naikon okitakanggene baikon indee miano komo aki naanggayo Yaku doiya lalim;

¹⁰baikon Yaku bisa, tobikon Yaku ampakon doi Tamang-Ku tukon akimo naikon pokitayo Yaku koidan;

¹¹tukon baikon ko Mian Bisa atambuunemo kona baukumanan, mangaani kopamarenta doi dunia nia lapamo inukum.

¹²Badaang koidan komo Yaku yase bontiikene doi komuyu, mau naiya budodoo komuyu akiyoon ponggoola talimayo.

¹³Bai kalu Rohdoo lubat, doiya Yanamo komo okitakanggene ko Mian Bisa nabisa-bisaan, komuyu linolaing sulano potingoniiyo sasaibino kona bisaan. Yana aki nabasalita tolongo butongo susuungo bai Yana bantile oila komo lapamo lengele, tukon Yana naikon pailukene doi komuyu oila naikon komo teali oloyo doibundu.

¹⁴Yana akabasale Yaku, mangaani oila Napinolonggon doi komuyu, yanila talimayo doi Yaku.

¹⁵Sasaibino komo daano doi Tama mau doiya bai Koonggumo. Doiyamo komo mangaanikene tobikon Kubantile baikon oila ko Roh napinolonggon doi komuyu, doiya talimayo doi Yaku.”

¹⁶“Baino soisik kotempono komuyu akimo pokitayo Yaku koidan, tukon koidan baino soisik kotempono komuyu kitayo Yaku.”

¹⁷Moimoiya Yesus napololaing tambuuno posadai meeng tukon bailon, “Oila komaanano Yana mobantile doi kita: ‘Baino soisik kotempono komuyu akimo pokitayo Yaku koidan, tukon baino soisik kotempono komuyu naikon kitayo Yaku’? Oila komaanano koidan tukon: ‘Yaku ampakon doi Tamang-Ku’?”

¹⁸Yanila mansadai momeeng, “Oila komaanano, ‘soisik kotempo’? Kita aki nda mangalatikene Yana salitayo kaliangano oila!”

¹⁹Yesus toiyo yanila yase mansadai doi Yana. Jadi Yana bantile, “Budodoiya Yaku bantile, ‘Baino soisik kotempono, komuyu akimo naikon pokitayo Yaku, tukon koidan baino soisik kotempono komuyu naikon kitayo Yaku.’ Doiyamo kopo pinonggeelekikon doi komuyu nokon?

²⁰Poanggayomo, komuyu naikon kokiil tukon uwookon, bai komian doi dunia tolongo tedes-tedes. Komuyu naikon susa konoamuyu, bai kopo susanoo bolii teali laba-labaan.

²¹Kalu meeng koboine adukono mosuung, yana susa, sabab laatemo kotempono kona sakisaawan. Bai kalu kona pau sosuungo, boinedoo toliminggenemo kona susaan mangaani yana laba baikon meeng kopau sosuungo doi dunia.

²²Bunomo doiya lakon komuyu: Budodoiya komuyu susa konoamuyu, bai Yaku pososuung koidan tukon komuyu, maka konoamuyu naikon laba-laba; tukon akiyo komeeng komian monggoola alayo kopolabaano doi noamuyu.

²³Doi oloyodoo, komuyu akimo pomansadai oioila koidan doi Yaku. Poanggayomo: Oilamo kopo kinabi doi Tama luwe sambung-Ku, doiya naikon Tama beekene doi komuyu.

²⁴Polong doi oloyo nia komuyu akiyoon pomangkabi oioila moluwedoi sambung-Ku. Pomangkabi, maka komuyu naikon mantalima, sulano kopoo labaan monondok.”

²⁵“Sasaibino naiya Yaku bantile doi komuyu tukon andean. Bai naikon nalaate kotempono, Yaku akimo kumongkubai andean koidan, bai Yaku basalita tukon natala-talaangan doi komuyu Tama kaliangano.

²⁶Doiya kotempono komuyu mangkabi doi Tama mangatas doi sambung-Ku; potoiyo, Yaku aki naikon kumangkabi doi Tama motuuk doi komuyu,

²⁷sabab Tama susuungo seseange komuyu. Yana mamaasikene komuyu mangaani komuyu mamaasikene Yaku, tukon anggayo baikon Yaku lubat doi Mian Bisa.

²⁸Takainomo Yaku luwedoi Tama, tukon lapamo Kulubat doi dunia lalomo. Bai budodoiya Yaku tinggalemo kodunia sulano kuabali doi Tama.”

²⁹Maka Yesus napololaing-pololaing mansadai doi Yana, “Budodoiya Temeneno basilingan tukon tala-talaang akimo napake andean,

³⁰tukon kami toiyomo baikon Yesus toiyo kolangge sasaibino. Akimo napalaluu daano komeeng komian momansadai oioila doi Temeneno. Mangaani doiyamo kami anggayomo Temeneno luwedoi Mian Bisa.”

³¹Yesus timbiliyo yanila, “Jadi budodoiya komuyu anggayomo?

³²Neneeke! Kotempono naikon lubat, bai lapamo lubat, komuyu pinobabandakon. Komuyu mule doi pobonua meeng-meeng tukon tinggale Yaku susuunggu. Bai Yaku aki natolongo susuunggu sabab ko Tamang-Ku daano polaing Yaku.

³³Sasaibino naiya Yaku bantile sulano komuyu pomalaat monondokan sabab pomeenggon tukon Yaku. Doi dunia komuyu naikon sakisaa. Bai poekeenggele konoamuyu! Yaku lapamo lungguiyo kodunia!”