Read Banggai YOHANES 17 Bible Online

YOHANES 17 - Banggai bible

YOHANES 17

¹Sambuno lapa bantile buno doiya, Yesus lelengea doi timbu tukon bantile, “Tama, budodoiya laatemo kotempono. Akabasalemo komu Pau, sulano komu Pau akabasale Tama.

²Tama lapamo mebee kuasa doi sasaibino kobanggapi doi mu Pau, sulano Yana namebee tuboan mobisa tukon posidutukon doi sasaibino komian Tama mo beekene doi Yana. Naiyamo kotuboan mobisa tukon posidutukon;

³sulano komian natingoniiyo Tama, tolongo Yana ko Mian Bisa mo bisa, tukon tingoniiyo Yesus Kristus Tama mo bintekene.

⁴Yaku lapamo akabasale Tama doi dunia nia bungkukono tukon alapayo kona limang Tama mo beekene doi Yaku.

⁵Tama! Akabasalemo Yaku budodoiya doi Tama, tukon babasalan mo daano doi Yaku pomeenggon Tama salataa dunia nia akiyoon napinasitaka.

⁶Yaku lapamo okitakanggene Tama doi mian badaang nai dunia nia mo lapamo Tama beekene doi Yaku. Yanila Tama na mian-mian, tukon Tama lapamo beekene doi Yaku. Yanila loingiyomo Tama nabantilan.

⁷Budodoiya yanila toiyomo baikon sasaibino Tama nabineekon Yaku luwedoi Tama.

⁸Lapamo Kupelenggene doi yanila kobantilan Tama mo beekene doi Yaku; tukon yanila lapamo talimayo. Yanila toiyo baikon Yaku bisa-bisa lubat doi Tama tukon yanila anggayo baikon Tama komo bintekene Yaku.

⁹Yaku sambeang tuuk doi komuyu. Yaku aki kusambeang motolongo tuuk doi dunia bai mian badaang doi dunia mo lapamo Tama beekene doi Yaku, sabab yanila Tama koona.

¹⁰Sasaibino Kulangge Tama nalangge koidan; tukon sasaibino Tama nalangge daano Kulangge koidan. Yaku inakabasal doi yaniladoo.

¹¹Budodoiya Yaku lubat doi Tama. Yaku akimo kundoong koidan doi dunia; bai yanila daanoon doi dunia. Tama mo moliyous! Dagaiyo yanila tukon kuasa Tama sambuno, doiya sambu mo lapamo Tama beekene Yaku — sulano yanila teali meeng, pokakana buno Tama tukon Yaku koidan meeng.

¹² Modaanoon Yaku polaing yanila, Yaku lapamo dagaiyo yanila tukon kuasa moluwe Tama sambuno — sambu Tama mo beekene doi Yaku. Yaku lapamo dagaiyo yanila tukon akiyo komeeng komian doi yaniladoo molapus; kasuali Yana mo takainomo lapamo lapus; sulano tukon doiyadoo tealimo oila komo totulis doi Kitab Moliyous lalomo.

¹³Budodoiya Yaku lubat doi Tama. Sasaibino nia Yaku bantile modaanoon Yaku nai dunia nia; sulano yanila tukon totubo kona tuboan toupiyo Kulabaan.

¹⁴Yaku lapamo pelenggene Tama nabantilan doi yanila, tukon dunia nia mosikitene yanila, sabab yanila bolikon dunia koona, pokakana buno Yaku koidan bolikon dunia koona.

¹⁵Yaku aki kukabiyo sulano Tama nandokiiyo yanila doi dunia nia, bai Yaku kabiyo sulano Tama nadagaiyo yanila doi Ibiliis.

¹⁶Pokakanamo buno Yaku bolikon dunia koona, mau yanila bolikon koidan dunia koona.

¹⁷Tealikene yanila mumian motangalaas doi Tama luwedoi nabisaan; Tama nabantilan doiyamo komo bisa.

¹⁸Pokakana Tama lapamo bintekene Yaku doi dunia, bunomo koidan Yaku bintekene yanila doi dunia.

¹⁹Tuuk yanila napalaluu, Yaku salakanggene kobutonggu buno Tama koona, sulano yaniladoo teali tongo Tama koona motangalaas lolo doi nabisaan.

²⁰Bolikon tuuk yanila nia Kusinambeanggon. Bai Yaku koidan sambeang tuuk doi mian badaang naikon mo anggayo doi Yaku doi napo bantilan yanila nia.

²¹Yaku kabiyo, Tama, sulano yanila sasaibino teali meeng buno Tama pomeenggon Yaku, tukon Yaku maka Tama. Boliisi yanila nateali meeng tukon kita sulano komian doi dunia anggayo baikon Tama komo bintekene Yaku.

²²Yaku lapamo beekene doi yanila kobabasalan Tama mo beekene doi Yaku, sulano yanila teali meeng, pokakana buno kita meeng;

²³Yaku tukon yanila, tukon Tama maka Yaku; sulano yanila bisa-bisa meeng. Maka dunia naikon toiyo baikon Tama komo bintekene Yaku, baikon Tama mamaasikene yanila buno Tama mamaasikene Yaku.

²⁴Tama, Yaku yase sulano yanila, mo Tama beekene doi Yaku, daano polaing-laing Yaku doi lipu kudaanoan, sulano yanila kitayo Kukinabasalan; doiyamo kabasalan Tama mo beekene doi Yaku, sabab Tama mamaasikene Yaku akiyoon kodunia natinealikon.

²⁵Tama mo adil! Dunia aki natingoniiyo Tama, bai Yaku tingoniiyo Tama; tukon mian madaang nia toiyo baikon Tama komo bintekene Yaku.

²⁶Yaku lapamo bontiikene Tama sambuno doi yanila; tukon Yaku lapamo kubaiyo buno doiya, sulano Tama namaasi doi Yaku tataap doi noanoila lalomo tukon Yaku pomeenggon yanila.”