Read Banggai YOHANES 18 Bible Online

YOHANES 18 - Banggai bible

YOHANES 18

¹Sambuno lapa Yesus sambeang buno doiya, Yana tukon Napololaing-pololaingoo ampakon doi Kidron Paisunobatango sembeleng. Idoo daano komeeng koasi, maka Yesus tukon Napololaing-pololaingoo usok doi asidoo.

²Yudas poloilokisoo, toiyo do lipudoo; sabab Yesus biasamo pototongi idoo tukon Napololaing-pololaing.

³Maka Yudas ampakon doi lipudoo tukon babayo komeeng kopasukan suludadu Romawi tukon moimoiya kopadagai Temeneno Na Bonua imam-imam kapalano mo sumboliiyo tukon Parisi mian-miano. Yanila makanggi sinapan, lantela tukon posi.

⁴Yesus toiyo sasaibino komo naikon teali doi Nabutong. Jadi Yana kolaniyo dopai mianoo badaang tukon mansadai, “Komuyu indee miano kopo inumbal?”

⁵“Yesus, Nasaret miano,” yanila timbiliyo. “Yakumo nia,” Yesus bantile. Yudas poloilokisoo daano mokokondong tukon yanila.

⁶Singgatoo Yesus bantil doi yanila, “Yakumo nia,” yanila sasaibino tangabalinggon maka tolubang doi buta.

⁷Yesus sadaiyo koidan doi yanila, “Indee kopo inumbal?” “Yesus Nasaret miano,” yanila timbiliyo.

⁸“Lapamo Kubantile Yakumo nia,” Yesus bantile. “Tukon kalu bisa Yakumo kopoo inumbolii, sodiiyomo yanila bailon naampakono.” (

⁹Tukon nabantilano mobuno doiya, tealimo oila komo lapamo Yesus bantile loolukonoo: “Tama, doi mian badaang Tama mo beekene doi Yaku, akiyo komeeng komian komo lapus.”)

¹⁰Simon Petrus mo makanggi meeng kobakoko, yana bubute maka tabase imam babasal naata botol kotolingaino bakalingano. Kosambuno do atadoo Markus.

¹¹ Maka Yesus bantil doi Petrus, “Usekene koidan komu bakoko doi salungo! Oilakai ikoo pikikene Yaku aki naikon kuinume kopaisu doi galaas sakisaawan Tama mo beekene doi Yaku?”

¹²Maka suludadu-suludadu Romawi tukon nakomondaan tukon padagai-padagai Yahudi lakoyo tukon keete Yesus.

¹³Tumbe-tumbeno yanila babayo Yesus mangadap doi Hanas, Kayafas namonianan malane. Kayafas daano meeng koimam babasal doi taundoo.

¹⁴ Tukon yanamo komo lapamo beena otunggul doi pamarenta Yahudi baikon lobian monondok doi meeng komian momate motuuk doi sasaibino kobangsa.

¹⁵Simon Petrus tukon tulano meeng bailon lainge Yesus. Pololaingoo bailon imam babasal tingoniiyo; jadi yana usok polaing-laing tukon Yesus doi imam babasal nabonua basaleano,

¹⁶bai Petrus montotiili doi tonggulung, doi tataapon. Doibundu pololaingoo bailon ampakon doi tonggulung tukon posalitai meeng koboine peleleani padagai tataapon, maka babayo Petrus usok doi lalom.

¹⁷Peleleani boinedoo padagai tataapon bantil doi Petrus, “Eh, bolikon kai ikoo koidan kona pololaing?” “Bolikon,” Petrus timbiliyo.

¹⁸Doiya kosinggatoo kolipu kumelon, jadi kopeleleani-peleleani tukon padagai-padagaidoo yanila lapamo bangokoiti aung tukon yanila balalango idoo. Petrus ampakon doi aungoo maka kokondong balalang polong yanila.

¹⁹Imam babasal sadaikene Yesus kaliangano doi napololaing-pololaing tukon naotunggul kaliangano.

²⁰Yesus timbiliyo, “Yaku sidutu basilingan tukon tala-talaang doi mian badaang salaano. Yaku sidutu mongotunggul doi bonua-bonua kaledaan tukon doi Mian Bisa Na Bonua, lipu Yahudi miano napototongian sidutu. Aki nabiasa Yaku mabantil oioila motosookon.

²¹Jadi bulaando Tuan momansadaikene Yaku? Sadaiyo yanila mo lapamo molongol Kuotunggul. Tantu yanila toiyo oila Kubinantil.”

²²Sambuno Yesus bantile buno doiya, daano komeeng dopadagaidoo idoo tapiyo tukon bantile, “Barani tuuno Ikoo bantile buno doiya doi imam babasal!”

²³Yesus timbiliyo, “Kalu Yaku mabantil meeng kolangge mo sala, bantilemo naimbaa oila kona salaan! Bai kalu Kubinantiloo bisa, bulaando ikoo motapiyo Yaku?”

²⁴Doibundu Hanas sumboliiyo komian babayo Yesus tukon kinoot doi Imam Babasal Kayafas.

²⁵Simon Petrus daano mokokondong tukon balalang idoo. Mian badaang idoo bantil doi yana, “Bolikon kai ikoo komeeng kopololaingo mianoo?” Bai Petrus nggeelek, konabantilano, “Bolikon!”

²⁶Meeng koimam babasal naata, doiyamo tolidano doi Petrus natinabas kotolingaino, bantile, “Baanggon aki kukitayomo ikoo doi asidoo mopolaing-laing tukon Yana?”

²⁷Maka Petrus nggelekiyo koidan, “Aki,” — tukon pokonoi doiya kosinggatoo komanuk kokuuwa.

²⁸Dodowasoono yanila babayomo Yesus doi Kayafas nabonua doi gubernur nabatomundoan. Yahudi miano yanila aki nausok doi batomundoanoo lalomo, sulano yanila naaki teali kulokis manurut atulan agama, sabab yanila malaing kaan kaanan Paskah.

²⁹Tobikon doiya Pilatus tobuat ampakon doi yanila tukon mansadai, “Oila kopo pangasalakon doi mian nia?”

³⁰Yanila timbiliyo, “Andeno Yana akiyo kona sala, kami aki mai babayo doi Tama Gubernur.”

³¹Pilatus bantile doi yanila, “Poleleiyo Yana tukon potindokiiyo manurut poukum susuumuyu!” Bai Yahudi miano timbiliyo, “Kami aki namoola ukume mate komian.” (

³² Naiya teali sulano natotoi oila Yesus nabinantil kaliangano naikon Yana mate.)

³³Pilatus usok koidan doi nabatomundoan tukon uange Yesus, maka sadaiyo, “Kai Ikoo tomundo Yahudi miano?”

³⁴Yesus timbiliyo, “Kai napasadai nia doikoo susuumu kabai daano komian bailon molapamo bontiikene doikoo kaliangano doi Yaku?”

³⁵Pilatus timbiliyo, “Oilakai yaku nia Yahudi miano? Komo beekene Ikoo doi yaku muturunano susuumu tukon imam-imam kapalano. Oila komo lapamo Ikoo kubaiyo?”

³⁶Yesus bantile, “Kubatomundoan bolikon doi dunia nia. Ande-andeno Kubatomundoan nai dunia nia, Kumian badaang balajuang sulano Yaku aki kubineekon doi pamarenta Yahudi. Bai bisa Kubatomundoan bolikon doi dunia nia!”

³⁷Maka Pilatus sadaiyo doi Yana, “Kalu buno doiya, Ikoo tomundo?” Yesus timbiliyo, “Ikoo bantile baikon Yaku tomundo. Yaku sosuung tukon lubat doi dunia daano meeng kopituu, doiyamo mebee salita doi nabisaan. Mian mo luwedoi nabisaan doiya ndongoliiyo Yaku.”

³⁸Pilatus mansadai doi Yana, “Oila komaanano dona bisaanoo?” Maka Pilatus tobuat koidan doi nabatomundoan tukon bantil doi Yahudi miano, “Yaku aki kulaate meeng kona kasalaan doi Yana.

³⁹Bai mololoi pokabiasaan, yaku sidutu sodiiyo meeng komian doi talunggu doi Oloyo Babasal Paskah. Komuyu yase sulano kusodiiyo ko Yahudi miano natomundo motuuk doi komuyu?”

⁴⁰Yanila timbiliyo, tukon nggele-nggeleamon, “Aki, inai Yana, bai Barnabas!” (Barnabas meeng komian pondikuk.)