Read Banggai YOHANES 19 Bible Online

YOHANES 19 - Banggai bible

YOHANES 19

¹Doibundu Pilatus usok maka mosumbolii mian moumbase Yesus.

²Suludadu-suludadudoo mongkubaimo meeng kosapeyo doi kayung-kayung pangano mopalatadian, maka yanila songgoikene doi Yesus oluno. Lapamo doiya yanila pekeikene kojubah mosamelaon doi Yana,

³maka sidutu lubat doi Yana tukon bantile, “Tubo kotomundo Yahudi miano!” Boobus yanila tapiyo Yana.

⁴Lapa doiya Pilatus tobuat tukon bantile doi mian mobadaangoo. “Kitayo! Yaku babayo Yana tobuat doi komuyu, sulano potoiyo yaku aki kumalaat mau nabaino meeng kona salaan.”

⁵Yesus tobuat tukon pakeyo kosapeyo mopalatadian tukon jubah mosamelaon. Pilatus bantile doi yanila, “Pokitayo do mianoo.”

⁶Sambuno imam-imam kapalano tukon padagai-padagaidoo kitayo Yesus, yanila nggeleamon, “Sempange Yana! Sempange Yana!” Pilatus bantil doi yanila, “Poleleiyo Yana, tukon posempangemo komuyu susuumuyu, yaku aki kumalaat meeng kona salaan doi Yana.”

⁷Yahudi mianodoo timbiliyo, “Manulut komai ukum, Yana sio nainukum mate sabab Yana akuiyo kobutongo Mian Bisa na Pau.”

⁸Sambuno Pilatus ndongoliiyo yanila bantile buno doiya, yana lobian matakut koidan.

⁹Maka yana usok koidan doi nabatomundoan lalomo tukon sambuno Yesus binaba usok, Pilatus sadaiyo doi Yana, “Ikoo komu luwean doiyaando?” Bai Yesus aki namotimbili.

¹⁰Boobus Pilatus sadaiyo koidan, “Ikoo aki muyase basilingan tukon yaku? Mutoiyo, yaku balakuasa mosodiiyo Ikoo, tukon kuasa mosempanggene Ikoo!”

¹¹Yesus timbiliyo, “Kalu Mian Bisa aki nabeekene do kuasadoo doikoo, ikoo mau nabulaamo akiyo komu kuasa doi Yaku. Tobikon doiya komian mo beekene Yaku doikoo, lobian babasal kona lalim doikoo.”

¹²Sambuno Pilatus ndongoliiyo doiya, yana berusaha sulano nasodiiyo Yesus. Bai Yahudi miano nggele-nggeleamon, “Kalu Tuan sodiiyo Yana, Tuan bolikon Kaisar tulano! Mian mo akuiyo kobutongo tomundo, doiya Kaisar namusu!”

¹³Sambuno Pilatus ndongoliiyo do bantilan-bantilanoo, yana babayo Yesus tobuat maka yana osulange doi kursi bangurusan doi tampatoo kosambuno Sowaan Batu. (Doi silingan Ibrani kosambuno Gabata.)

¹⁴Doiya kosinggatoo adukono batong songulo lua suun kooloyo, oloyo akiyoon ko Oloyo Babasal Paskah. Pilatus bantile doi mian badaangoo, “Naiyamo kopoo tomundo!”

¹⁵Yanila nggele-nggeleamon, “Akateyo Yana! Akateyo Yana! Sempange Yana!” Pilatus mansadai, “Kai momoola kusempange kopo tomundo?” Imam-imam kapalano timbiliyo, “Tongo Kaisar komai tomundo!”

¹⁶Boobus Pilatus beekenemo Yesus doi yanila sulano napo sempange. Yanila ndokiiyo Yesus, maka yanila ampakon babayo Yana.

¹⁷Yesus tobuat tukon tanggunge kona kayung sempang susuungo ampakon doi lipudoo mo sinombuikon “Mangabosan Olu”. (Doi silingan Ibrani binantil Golgota.)

¹⁸Indaa Yana sinempanggon. Posinggat-singgat tukon Yana daano koidan lua komian bailon mo sinempanggon; komeeng doi bobono talikon, tukon komeeng doi bakalingano talikon tukon Yesus doi tanga-tanga.

¹⁹Doi kayung pesempango Yesus, Pilatus mosumboliikene inoliit kotulisan nia: “Yesus doi Nasaret, Yahudi Miano na Tomundo.”

²⁰Badaang ko Yahudi miano mobasayo do tulisanoo, sabab do lipudoo Yesus nasinempangan aki naodoon doi kota. Tulisanoo lalomo silingan Ibrani, Latin, tukon Yunani.

²¹Imam-imam kapalano bantile doi Pilatus, “Inai motulise ‘Yahudi miano na Tomundo,’ bai tulisemo, ‘Mian nia bantile, Yaku Yahudi miano na Tomundo.’ ”

²²Bai Pilatus timbiliyo, “Komo lapamo yaku tulise, tataap totulis.”

²³Sambuno suludadu-suludadudoo lapa sempanggene Yesus, yanila alayo Napakean. Pakeanoo inobos sangkap: meeng-meeng malaat meeng koobos. Yanila alayo koidan Najubah. Jubahdoo akiyo kona kinoitian — tinonum doi babu polong bilit.

²⁴ Suludadu-suludadudoo yanila pobotiionggon meeng tukon bailon, “Inai nda potoliyo najubah nia. Tadu nda mongkubai undian sulano natotong indee komo laate.” Doiya langgedoo teali sulano natakabai oila komo totulis doi Kitab Moliyous lalomo doiyamo: “Yanila ebes-ebese Kupakean, tukon mongkubai undian doi Kujubah.” Tukon bisa-bisa do suludadu-suludadudoo kubaiyo buno doiya.

²⁵Doi ponggaupan Yesus nasinempanggonan kokondong Yesus tina-No utuso boine, Maria Klopas naboloki, tukon Maria Magdalena.

²⁶Sambuno Yesus kitayo kotinano tukon Napololaing Yana mamaasikene yanila modaano mokokondong idoo, Yesus bantile doi tina-No, “Tina, naiyamo komu pau.”

²⁷Doibundu Yana bantile doi napololaingoo, “Ndaiya tinamuyu.” Doiya kosinggatoo Yesus Napololaing talimayomo Yesus tinano sulano nandoong doi napoo bonua.

²⁸ Yesus toiyo baikon sasaibino doiya lapamo boobus, tukon sulano oilamo komo totulis doi Kitab Moliyous lalomo moola teali, Yana bantile, “Yaku molou.”

²⁹Idoo daano komeeng komanggo momoono tukon suka paisuno mo meele. Maka daano komeeng konggalanggang kinomok doi suka paisunodoo maka tinabokon doi meeng kokayung hisop pangano, maka tinutumikon doi Yesus suungo bibilo.

³⁰Yesus lemese do sukadoo paisuno tukon bantile, “Lapamo kabus!” Maka Yana totukukene kooluno tukon mate.

³¹Kopamarenta aki nayase ko mian-mian mo daano tosempang Kobajano taitude doi kayung sempang doi oloyo Tadean, baino kai naiya oloyo Tadeandoo Oloyo Babasal mo tangalaas. Sabab oloyo doiya singgatoo Yesus nasinempanggonan pokokonoi akiyoon oloyo Tadean, Yahudi miano mangkabi palamisi doi Pilatus sulano yanila nalotoiyo do mian-mianoo aino mo lapamo sinempanggon tukon obulusene do bajan-bajanoo doi kayung sempang.

³²Maka suludadu-suludadudoo ampakon tukon lotoiyo tumbe-tumbeno koaino domianoo molua mo sinempanggon posinggat Yesus.

³³Sambuno yanila polong doi Yesus, yanila kitayo Yana lapamo mate. Jadi yanila akimo napo lotoiyo koaino.

³⁴Bai Yesus lisuko sinubok tukon kalait doi meeng komian doi suludadudoo; tukon mosobit tokundang kosau tukon paisu.

³⁵Mian mo kitayo susuungo kadadianoo, yanamo komo babotilanggene doiya langgedoo, sulano komuyu anggayo. Tukon kona salitadoo bisa.

³⁶ Langgedoo doiya teali sulano nateali oila komo lapamo totulis doi Kitab Moliyous lalomo, doiya “Akiyo komeeng kai luwedoi buku-No naikon nailotoan”.

³⁷ Doi Kitab Moliyous lalomo koidan totulis: “Yanila naikon mbalenge Yana mo lapamo yanila tebeke”.

³⁸Lapa doiya Yusuf doi Arimatea mangkabi palamisi doi Pilatus sulano napo babayo Yesus bajano. (Yusuf daano meeng Yesus napololaing bai aki natotingonii, sabab yana matakutene kopamarenta Yahudi.) Pilatus loasene doi yana, jadi yanila ampakono leleiyo Yesus bajano.

³⁹ Nikodemus, mo loolukoo biasa lubat popook doi Yesus, ampakon polaing tukon Yusuf. Nikodemus mababa pobilat tukon kayung gaharu — sasaibino naiya uga-ugaate tolu kolono kokilogram kona kadaang.

⁴⁰Do mianoo molua ndokiiyo Yesus bajano maka yanila bunguse tukon toik moalus polaing tukon lambadoo mobabangi menurut Yahudi miano naadat bakibulan.

⁴¹Doi lipudoo Yesus nasinempanggonan daano komeeng koasi. Doi asidoo lalomo daano komeeng kokibul moboolu, mo akiyoon napinake batadinan mian mate.

⁴²Sabab do kibuloo lolani, tukon oloyo Tadean adukono minulai, yanila tadinemo Yesus indaa.